മാലിക ആയി ശിവരാജ് കുമാര്‍; ഉത്തരകാണ്ഡയിലെ ഫസ്റ്റ് ലുക്ക് പുറത്ത് 

ആരാധകരും സിനിമാ പ്രേമികളും ഏറെ ആവേശത്തോടെ കാത്തിരിക്കുന്ന, ഉത്തരകാണ്ഡ എന്ന ബ്രഹ്മാണ്ഡ കന്നഡ ചിത്രത്തിലെ ശിവരാജ് കുമാറിന്റെ ഫസ്റ്റ് ലുക്ക് പോസ്റ്റര്‍ റിലീസ് ചെയ്തു. ഡോക്ടര്‍ ശിവരാജ് കുമാറിന്റെ ജന്മദിനത്തോടനുബന്ധിച്ചാണ് ഈ ചിത്രത്തിലെ അദ്ദേഹം അവതരിപ്പിക്കുന്ന ' മാലിക' എന്ന് പേരുള്ള കഥാപാത്രത്തിന്റെ ഫസ്റ്റ് ലുക്ക് പുറത്ത് വിട്ടത്. 

ഓരോ ചിത്രത്തിലും വ്യത്യസ്ത മേക്കോവറില്‍ ആരാധകരെ ത്രസിപ്പിക്കുന്ന  ശിവരാജ് കുമാര്‍, ഈ ചിത്രത്തിലും ആ പതിവ് തെറ്റിക്കുന്നില്ല. ചോര പുരണ്ട മുഖവും ശരീരവുമായി മാസ്സ് അവതാരമായാണ് അദ്ദേഹം ഉത്തരകാണ്ഡയിലും എത്തുന്നത്. ഉത്തരകാണ്ഡ ടീം ഇതിനോടകം പുറത്ത് വിട്ട ഓരോ പോസ്റ്ററുകളും പോലെ ഈ വ്യത്യസ്തമായ പോസ്റ്ററും സമൂഹ മാധ്യമങ്ങളില്‍ വലിയ കയ്യടിയാണ് നേടുന്നത്.

കന്നഡ സിനിമാ ഇന്‍ഡസ്ട്രിയിലെ വമ്പന്‍ ചിത്രങ്ങളിലൊന്നായ ഉത്തരകാണ്ഡ സംവിധാനം ചെയ്തിരിക്കുന്നത് രോഹിത് പടകിയും, കെആര്‍ജി സ്റ്റുഡിയോയുടെ ബാനറില്‍ ഈ ചിത്രം നിര്‍മ്മിച്ചിരിക്കുന്നത് കാര്‍ത്തിക് ഗൗഡ, യോഗി ജി രാജു എന്നിവര്‍ ചേര്‍ന്നുമാണ്. സംവിധായകന്‍ രോഹിത്, ശരത് മഞ്ജുനാഥ് എന്നിവര്‍ ചേര്‍ന്നാണ് ഈ ചിത്രത്തിന്റെ തിരക്കഥ രചിച്ചിരിക്കുന്നത്. പ്രശസ്ത ഗായകനും സംഗീതജ്ഞനുമായ അമിത് ത്രിവേദി സംഗീത സംവിധാനം നിര്‍വഹിക്കുന്ന ഈ ചിത്രത്തിന് വേണ്ടി കാമറ ചലിപ്പിച്ചിരിക്കുന്നത് അദ്വൈത ഗുരുമൂര്‍ത്തിയാണ്. 

നടരാക്ഷസ ദാലി ധനഞ്ജയ, ഭാവന മേനോന്‍, ഐശ്വര്യ രാജേഷ്, ദിഗാന്ത് മഞ്ചലേ എന്നിവരും വേഷമിട്ടിരിക്കുന്ന ഈ ആക്ഷന്‍ ഡ്രാമക്ക് കലാസംവിധാനം നിര്‍വഹിച്ചിരിക്കുന്നത് വിശ്വാസ് കശ്യപ്, എഡിറ്റ് ചെയ്യുന്നത് അനില്‍ അനിരുദ്ധ്, പശ്ചാത്തല സംഗീതം ചരണ്‍ രാജ് എന്നിവരാണ്. പിആര്‍ഒ ശബരി.