അപകട വാര്‍ത്ത പരക്കുന്നതിനിടെ ഭാര്യയ്ക്കും മകന്‍ അബ്രഹാമിനും ഒപ്പം മുംബൈ വിമാനത്താവളത്തിലെത്തി നടന്‍ ഷാരൂഖ്;  പ്രചരിച്ചത് വ്യാജ വാര്‍ത്തയെന്ന് അടുത്ത വൃത്തങ്ങള്‍

മൂക്കിന് പരിക്കുപറ്റിയതിനെ തുടര്‍ന്ന് ശസ്ത്രക്രിയ നടത്തി മുംബൈയിലെ വീട്ടില്‍ വിശ്രമിക്കുകയാണെന്ന വാര്‍ത്തകള്‍ക്ക് പിന്നാലെ മുംബൈയില്‍ വിമാനമിറങ്ങി ഷാരൂഖ് ഖാന്‍. സിനിമാ ചിത്രീകരണത്തിനിടെ ഷാരൂഖ് ഖാന് പരിക്കേറ്റെന്ന റിപ്പോര്‍ട്ടുകള്‍ ഇന്നലെയാണ് പുറത്തു വന്നത്. ലോസ് ആഞ്ചെലെസില്‍ നടന്ന ഷൂട്ടിംഗിനിടെ കിംഗ് ഖാന്റെ മൂക്കിന് പരിക്കേറ്റുവെന്നും ശസ്ത്രക്രിയക്ക് വിധേയനായെന്നുമായിരുന്നു റിപ്പോര്‍ട്ട്. ഇതിനിടെ പങ്കാളി ഗൗരിക്കും മകന്‍ അബ്രാമിനുമൊപ്പം ഷാരൂഖിനെ മുംബൈ എയര്‍പോര്‍ട്ടില്‍ കണ്ടത് ആരാധകര്‍ക്ക് ആശ്വാസമായി.

ഷാരൂഖിന് അപകടം പറ്റിയതായുള്ള വാര്‍ത്തകള്‍ വാസ്തവവിരുദ്ധമാണെന്ന് നടനുമായി അടുത്ത വൃത്തങ്ങള്‍ പിടിഐയോട്സ്ഥിരീകരിച്ചു. മൂക്കിന് പരിക്ക് പറ്റി ശസ്ത്രക്രിയയ്ക്ക് വിധേയനായ താരം മുംബൈയിലെ വീട്ടില്‍ വിശ്രമത്തിലാണെന്നായിരുന്നു വാര്‍ത്തകള്‍. എന്നാല്‍ ഇന്ന് പുലര്‍ച്ചെയാണ് ഷാരൂഖ് മടങ്ങിയെത്തിയത്. നിരവധി ആരാധകരാണ് താരത്തിന്റെ സുഖവിവരങ്ങള്‍ തിരക്കുന്നത്.

അറ്റ്ലിയുടെ 'ജവാനും' രാജ്കുമാര്‍ ഹിരാനി സംവിധാനം ചെയ്യുന്ന 'ഡങ്കി'യുമാണ് ചിത്രീകരണത്തിലുള്ള ഷാരൂഖ് ചിത്രങ്ങള്‍. ഷാരൂഖ് ഖാന്‍ ഇരട്ട വേഷത്തിലെത്തുന്ന ചിത്രം നയന്‍താരയുടെയും അറ്റ്ലിയുടെയും ബോളിവുഡ് അരങ്ങേറ്റ ചിത്രമാണ്. സെപ്തംബര്‍ ഏഴിനാണ് ജവാന്‍ തിയേറ്ററുകളിലെത്തുന്നത്. ഈ വര്‍ഷം ഡിസംബറിലാണ് ഡങ്കിയുടെ റിലീസ്.