നല്ലൊരു മനുഷ്യനായിരിക്കണം, പാചകം ചെയ്യാന്‍ അറിയാവുന്ന ആളുകൂടിയാണെങ്കില്‍ വളരെ നന്നായിരുന്നു; കരുണയും ഉത്തരവാദിത്തബോധവും വേണമെന്ന് താരം; ജീവിതപങ്കാളിയെക്കുറിച്ച് മനസ്സുതുറന്ന് സായ് പല്ലവി; അഭിപ്രായം കോന്‍ ബനേഗ ക്രോര്‍പതി വേദിയില്‍

 സിനിമയിലെ തിളക്കമാര്‍ന്ന സാന്നിധ്യമായ നടി സായ് പല്ലവി തന്റെ ജീവിതപങ്കാളിയില്‍ നിന്ന് എന്താണ് പ്രതീക്ഷിക്കുന്നതെന്ന് തുറന്നുപറഞ്ഞ വിവരങ്ങളാണ് ഇപ്പോള്‍ സോഷ്യല്‍ മീഡിയയില്‍ തരംഗമാകുന്നത്. പ്രശസ്തമായ 'കോണ്‍ ബനേഗ ക്രോര്‍പതി 18' എന്ന റിയാലിറ്റി ഷോയുടെ വേദിയിലാണ് താരം തന്റെ നിലപാടുകള്‍ കൃത്യമായി വ്യക്തമാക്കിയത്. മെഗാസ്റ്റാര്‍ അമിതാഭ് ബച്ചന്‍ അവതാരകനായ പരിപാടിയിലാണ് സായ് പല്ലവി തന്റെ സ്വപ്ന പങ്കാളിയെക്കുറിച്ചുള്ള ചിന്തകള്‍ പങ്കുവെച്ചത്. കേവലം സൗന്ദര്യത്തിനോ ബാഹ്യമായ കാര്യങ്ങള്‍ക്കോ പ്രാധാന്യം നല്‍കാതെ കരുണയും സ്വയം തിരുത്താനുള്ള മനസ്സുമാണ് ഒരു പങ്കാളിക്ക് വേണ്ടതെന്ന് താരം ആവര്‍ത്തിച്ചു.

വരാനിരിക്കുന്ന ബിഗ് ബജറ്റ് ചിത്രമായ 'രാമായണ: പാര്‍ട്ട് 1' എന്ന സിനിമയുടെ പ്രചാരണത്തിന്റെ ഭാഗമായാണ് സായ് പല്ലവി ഷോയിലെത്തിയത്. ചിത്രത്തിലെ സഹതാരങ്ങളായ രണ്‍ബീര്‍ കപൂര്‍, രവി ദുബെ എന്നിവരും താരത്തിനൊപ്പം അമിതാഭ് ബച്ചന് മുന്നില്‍ അതിഥികളായി പങ്കെടുത്തു. ഭാവി ജീവിതപങ്കാളിയില്‍ എന്തൊക്കെ ഗുണങ്ങളാണ് പ്രതീക്ഷിക്കുന്നത് എന്ന അമിതാഭ് ബച്ചന്റെ ചോദ്യത്തിന് വളരെ ലളിതവും എന്നാല്‍ കാമ്പുള്ളതുമായ മറുപടിയാണ് സായ് നല്‍കിയത്. നല്ലൊരു മനുഷ്യനായിരിക്കണം എന്നതിനൊപ്പം പാചകം ചെയ്യാന്‍ അറിയാവുന്ന ആളുകൂടിയാണെങ്കില്‍ വളരെ നന്നായിരുന്നു എന്ന് താരം തമാശയായി കൂട്ടിച്ചേര്‍ത്തു.

'ആദ്യം അദ്ദേഹം നല്ലൊരു മനുഷ്യനായിരിക്കണം' എന്ന മറുപടിയോടെയാണ് സായ് പല്ലവി തന്റെ പ്രതീക്ഷകള്‍ അമിതാഭ് ബച്ചന് മുന്നില്‍ വിവരിച്ചു തുടങ്ങിയത്. സ്വന്തം കാര്യങ്ങളില്‍ മാത്രം ശ്രദ്ധ കേന്ദ്രീകരിക്കുന്ന സ്വാര്‍ത്ഥനായ ഒരു വ്യക്തിയാകരുത് തന്റെ പങ്കാളിയെന്ന് താരം അല്‍പ്പം ഗൗരവത്തോടെ തന്നെ വ്യക്തമാക്കി. സ്വന്തം പെരുമാറ്റത്തെയും തെറ്റുകളെയും പറ്റി സ്വയം വിലയിരുത്താനും ചിന്തിക്കാനും കഴിവുള്ള ഒരാളായിരിക്കണം അദ്ദേഹം. മനുഷ്യനാകുമ്പോള്‍ തെറ്റുകള്‍ സംഭവിക്കുക സ്വാഭാവികമാണെങ്കിലും അത് തിരുത്താനുള്ള മനസ്സ് ഉണ്ടായിരിക്കണമെന്നാണ് നടി ചൂണ്ടിക്കാണിക്കുന്നത്.

തെറ്റുകള്‍ സംഭവിക്കുമ്പോള്‍ അത് മറ്റുള്ളവരുടെ തലയില്‍ കെട്ടിവെച്ച് രക്ഷപ്പെടാന്‍ ശ്രമിക്കുന്ന പ്രകൃതം ഉണ്ടാകരുതെന്നും സായ് പല്ലവി തറപ്പിച്ചു പറഞ്ഞു. തെറ്റ് പറ്റിയാല്‍ അത് സമ്മതിക്കാനും അത് പരിഹരിക്കാനും തയ്യാറാകുന്ന വ്യക്തിത്വമാണ് പങ്കാളിക്ക് വേണ്ടത്. സങ്കീര്‍ണ്ണമായ പ്രതീക്ഷകളുടെ വലിയൊരു പട്ടിക തനിക്കില്ലെന്നും നല്ലൊരു മനുഷ്യനായിരിക്കുക എന്നതുതന്നെയാണ് തന്റെ പ്രധാന നിബന്ധനയെന്നും താരം കൂട്ടിച്ചേര്‍ത്തു. സായ് പല്ലവിയുടെ മറുപടി വേദിയിലുണ്ടായിരുന്ന കാണികളുടെയും പ്രേക്ഷകരുടെയും വലിയ കൈയടിയോടെയാണ് സ്വീകരിക്കപ്പെട്ടത്.

അതോടൊപ്പം, വൈദ്യശാസ്ത്ര പഠനത്തില്‍ നിന്ന് അഭിനയരംഗത്തേക്ക് കടന്നുവന്ന സ്വന്തം ജീവിതയാത്രയെക്കുറിച്ചും സായ് പല്ലവി പരിപാടിയില്‍ വികാരാധീനയായി സംസാരിക്കുകയുണ്ടായി. എം.ബി.ബി.എസ് പഠനം പൂര്‍ത്തിയാക്കിയ താന്‍ എങ്ങനെയാണ് ക്യാമറയ്ക്ക് മുന്നിലേക്ക് എത്തിയതെന്ന ചോദ്യത്തിന് ദൈവത്തിന്റെ നിശ്ചയമായിരുന്നു ഇതെന്ന് താരം മറുപടി നല്‍കി. അപ്പോള്‍ 'അത് ദൈവത്തിന്റെ പ്രിസ്‌ക്രിപ്ഷന്‍ ആയിരുന്നു സര്‍' എന്ന് രണ്‍ബീര്‍ കപൂര്‍ തമാശയായി കൂട്ടിച്ചേര്‍ത്തത് വേദിയില്‍ ചിരി പടര്‍ത്തി. സിനിമയ്ക്ക് പുറത്തും ലളിതമായ ജീവിതശൈലി പിന്തുടരുന്ന താരത്തിന്റെ വ്യക്തിത്വത്തിന് അനുയോജ്യമായ നിലപാടുകളാണിത്.

സായ് പല്ലവി സീതയായി വേഷമിടുന്ന നിതേഷ് തിവാരിയുടെ ഇതിഹാസ ചിത്രം 'രാമായണ: പാര്‍ട്ട് 1' റിലീസിന് തയ്യാറെടുക്കുകയാണ്. ചിത്രത്തില്‍ ശ്രീരാമനായി രണ്‍ബീര്‍ കപൂറും രാവണനായി യഷും ലക്ഷ്മണനായി രവി ദുബെയുമാണ് പ്രധാന വേഷങ്ങളില്‍ എത്തുന്നത്. അരുണ്‍ ഗോവില്‍, സണ്ണി ഡിയോള്‍, ലാര ദത്ത തുടങ്ങി വന്‍ താരനിര തന്നെ ചിത്രത്തില്‍ അണിനിരക്കുന്നുണ്ട്. ഏറെ പ്രതീക്ഷയോടെ കാത്തിരിക്കുന്ന ഈ ബിഗ് ബജറ്റ് ചിത്രം വരും ദിവസങ്ങളില്‍ തീയേറ്ററുകളില്‍ എത്തുമെന്നാണ് റിപ്പോര്‍ട്ടുകള്‍.