'സ്ത്രീകളെ ഒബ്ജക്ടിഫൈ ചെയ്യുന്നത് തെന്നിന്ത്യന്‍ സിനിമകള്‍ മാത്രമല്ല'; വാണിജ്യ സിനിമകള്‍ ചെയ്യുന്നതില്‍ എതിര്‍പ്പില്ല; അതിരുവിട്ടാല്‍ 'നോ' പറയുമെന്നും റാഷി ഖന്ന 

സിനിമകളില്‍ സ്ത്രീകളെ ഒബ്ജക്ടിഫൈ ചെയ്യുന്നതിനെതിരെ ശക്തമായ നിലപാടുമായി നടി റാഷി ഖന്ന. തെന്നിന്ത്യന്‍ ചിത്രങ്ങളില്‍ മാത്രമല്ല, വടക്കേ ഇന്ത്യന്‍ ചിത്രങ്ങളിലും സ്ത്രീകളെ ഒബ്ജക്ടിഫൈ ചെയ്യുന്നത് വ്യാപകമായി കാണാറുണ്ടെന്ന് അവര്‍ പറഞ്ഞു. സൂമിന് നല്‍കിയ അഭിമുഖത്തിലാണ് റാഷി ഖന്ന ഈ പ്രതികരണം നടത്തിയത്. തന്റെ കഥാപാത്രത്തെ പരിധിവിട്ട് മോശമായി ചിത്രീകരിക്കുന്നുവെന്ന് തോന്നിയാല്‍ ആ സിനിമ നിരസിക്കാന്‍ മടിക്കില്ലെന്നും നടി വ്യക്തമാക്കി. 

സിനിമ വ്യവസായത്തിലെ ഈ പ്രവണത തെന്നിന്ത്യന്‍ ചിത്രങ്ങളില്‍ മാത്രമുള്ളതല്ലെന്നും, വടക്കേ ഇന്ത്യന്‍ സിനിമകളിലും ധാരാളമായി കണ്ടിട്ടുള്ള ഒന്നാണെന്നും റാഷി ഖന്ന വ്യക്തമാക്കി. ഇത്തരം കാര്യങ്ങള്‍ ഓരോ അഭിനേതാവിന്റെയും തിരഞ്ഞെടുപ്പിനെ ആശ്രയിച്ചിരിക്കും. ചില താരങ്ങള്‍ക്ക് ഇത്തരം ചിത്രീകരണങ്ങളില്‍ ബുദ്ധിമുട്ടുണ്ടാകില്ല, എന്നാല്‍ മറ്റുചിലര്‍ക്ക് അത് അംഗീകരിക്കാന്‍ കഴിഞ്ഞെന്ന് വരില്ല. താന്‍ തെന്നിന്ത്യയില്‍ നിരവധി വാണിജ്യ സിനിമകളുടെ ഭാഗമായിട്ടുണ്ടെന്നും എന്നാല്‍ ഹിന്ദിയില്‍ കൂടുതല്‍ ഉള്ളടക്കമുള്ള ചിത്രങ്ങള്‍ ചെയ്യാനാണ് ഇപ്പോള്‍ ആഗ്രഹിക്കുന്നതെന്നും റാഷി ഖന്ന കൂട്ടിച്ചേര്‍ത്തു. വാണിജ്യ സിനിമകള്‍ ചെയ്യുന്നതില്‍ എതിര്‍പ്പില്ലെങ്കിലും, തനിക്കുമൊരു പരിധിയുണ്ടെന്നും ഓരോ അഭിനേതാവിനും അവരുടേതായ പരിമിതികളുണ്ടെന്നും അത് അവരെ നിര്‍വചിക്കുന്നുവെന്നും റാഷി ഖന്ന ചൂണ്ടിക്കാട്ടി. 

'ഞാന്‍ ചെയ്യുന്ന കാര്യത്തില്‍ സംതൃപ്തിയുണ്ടാവുക എന്നത് വളരെ പ്രധാനമാണ്. പരിധിവിട്ട് എന്നെ മോശമായി ചിത്രീകരിക്കുന്നുവെന്ന് തോന്നിയാല്‍, ഞാന്‍ 'നോ' പറയും,' നടി ഉറപ്പിച്ചു പറഞ്ഞു. ഓരോ അഭിനേതാവിനും അവരുടേതായ കംഫര്‍ട്ട് സോണ്‍ ഉണ്ടെന്നും അതിനെ താന്‍ ആരെയും വിധിക്കാറില്ലെന്നും അവര്‍ കൂട്ടിച്ചേര്‍ത്തു. റാഷി ഖന്നയുടെ ഒടുവില്‍ പുറത്തിറങ്ങിയ ചിത്രം ഫര്‍ഹാന്‍ അക്തര്‍ നായകനായ '120 ബഹാദൂര്‍' ആണ്. ഈ ചിത്രത്തില്‍ ഫര്‍ഹാന്‍ അക്തറിന്റെ ഭാര്യ കഥാപാത്രത്തെയാണ് റാഷി അവതരിപ്പിച്ചത്. തീയേറ്ററുകളില്‍ മികച്ച പ്രതികരണം ലഭിച്ച ഈ ചിത്രം ഇതുവരെ ഏകദേശം 15 കോടി രൂപ കളക്ഷന്‍ നേടിയിട്ടുണ്ട്.