മലയാളികളുടെ പ്രിയങ്കരിയായ നടി ആനി തോമസുമായുള്ള തന്റെ ബന്ധത്തെക്കുറിച്ച് ഹൃദയസ്പര്‍ശിയായ കുറിപ്പുമായി ഗായിക മഞ്ജു തോമസ്. പഴയകാല ഓര്‍മ്മകള്‍ അയവിറക്കിക്കൊണ്ടുള്ള കുറിപ്പിനൊപ്പം ആനിയുമൊത്തുള്ള അപൂര്‍വ്വ ചിത്രങ്ങളും മഞ്ജു സോഷ്യല്‍ മീഡിയയില്‍ പങ്കുവെച്ചു.നടി ആനി തന്റെ അകന്ന ബന്ധുവാണെന്നും, കുട്ടിക്കാലത്ത് ആനിയുടെ ബന്ധുവാണെന്ന് കൂട്ടുകാരോട് അഭിമാനത്തോടെ പറഞ്ഞിരുന്ന ആനന്ദനിമിഷങ്ങളെ കുറിച്ചും മഞ്ജു കുറിപ്പില്‍ പറയുന്നു. ബന്ധുക്കള്‍ വീട്ടില്‍ ചെന്നാല്‍ ഒരു സാധാരണ ചേച്ചിയെ പോലെ മിണ്ടിപ്പറഞ്ഞിരിക്കുന്ന ആനിയുടെ വിശേഷങ്ങളും മഞ്ജു പങ്കുവച്ചു. പഴയ ചിത്രങ്ങള്‍ കണ്ടപ്പോള്‍ ഇതൊക്കെ ഓര്‍മ വന്നുവെന്നും മഞ്ജു തോമസ് കുറിച്ചു.
കുറിപ്പിന്റെ പൂര്‍ണ രൂപം: അമ്മയാണേ സത്യം! ഇത് ഒരു 'ചിത്ര'കഥയാണ്. ഞാന്‍ എട്ടാം ക്ലാസ്സില്‍ പഠിക്കുമ്പോഴായിരുന്നു എന്റെ അമ്മയുടെ ഫസ്റ്റ് കസിന്‍ സോഫിയാന്റിയുടെ കല്യാണം. കല്യാണാലോചന വന്നപ്പോഴേ കുടുംബത്തില്‍ ചര്‍ച്ചയായ ഒരു വ്യക്തി, ചെക്കന്റെ ചേട്ടന്റെ മകളായിരുന്നു. പത്താം ക്ലാസ്സില്‍ പഠിക്കുന്ന ആ കുട്ടിയെ ബാലചന്ദ്രമേനോന്റെ പുതിയ സിനിമയില്‍ അഭിനയിക്കാന്‍ വിളിച്ചിട്ടുണ്ടെന്ന് കുട്ടിയുടെ പേര് ആനി. വീട്ടില്‍ വിളിക്കുന്നത് ചിത്ര എന്നാണത്രേ. എന്നെപ്പോലെ ഒരു ടീനേജ് പെണ്‍കുട്ടിക്ക് ആനന്ദലബ്ധിക്കിനിയെന്ത് വേണ്ടൂ . പഠിക്കുന്ന ക്ലാസ്സിലും കൂട്ടുകാരുടെയിടയിലും ഒക്കെ ന്യൂസ് പരന്നു. മഞ്ജു തോമസിന്റെ കസിന്‍ ആണ് 'അമ്മയാണേ സത്യ'ത്തിലെ നായിക ആനി. പിന്നീടങ്ങോട്ട് ചിത്രച്ചേച്ചിയുടെ ഉയര്‍ച്ചയില്‍ ഞങ്ങളെല്ലാവരും ഏറെ അഭിമാനിച്ചു. ചേച്ചിയുടെ ഷൂട്ടിങ് ലൊക്കേഷനിലെ ഫോട്ടോസ് ഒക്കെ ഫ്രണ്ട്‌സിനെ കാണിച്ച് കുറേ ഷൈന്‍ ചെയ്തിട്ടുണ്ട് അന്നൊക്കെ.
ഇത്രയും നക്ഷത്രത്തിളക്കത്തില്‍ നില്‍ക്കുമ്പോഴും ഞങ്ങള്‍ ബന്ധുക്കള്‍ അവരുടെ വീട്ടില്‍ ചെന്നാല്‍ ഒരു സാധാരണ ചേച്ചിയെ പോലെ ഞങ്ങളോടൊക്കെ മിണ്ടിപ്പറഞ്ഞിരിക്കുമായിരുന്നു. ഓരോ തവണ പോകുമ്പോഴും ചിത്രച്ചേച്ചിയുടെ വക എന്തെങ്കിലും ഒരു ഡെസേര്‍ട്ട് ചേച്ചി വിളമ്പുമായിരുന്നു. കുടുംബത്തിനുള്ളിലും പുറത്തുള്ളവര്‍ക്കും മോശമായി പറയാന്‍ ഒന്നുംതന്നെ ഉണ്ടായിരുന്നില്ല (16 വയസ്സുള്ള ആനിയുടെ കാര്യമാണ് പറയുന്നത് കേട്ടോ) ഇപ്പോഴും ഒരു മാറ്റവുമില്ല.
ഞങ്ങളുടെ കുടുംബത്തിലുള്ള മിക്ക കല്യാണങ്ങള്‍ക്കും ചേച്ചി ഒരു താരസാന്നിധ്യമായിരുന്നു. എനിക്ക് പണ്ടേ ഫോട്ടോ ഒരു വീക്ക്‌നെസ്സ് ആയതുകൊണ്ട് എപ്പോള്‍ കണ്ടാലും ചേച്ചിയുടെ കൂടെ ഫോട്ടോ എടുക്കുമായിരുന്നു.
1) എട്ടാം ക്ലാസ്സില്‍ വച്ച് ചിത്രച്ചേച്ചി അമ്മയാണെ സത്യത്തിന്റെ ഷൂട്ട് കഴിഞ്ഞ സമയത്ത് എന്റെ വീട്ടില്‍ വന്നപ്പോള്‍ എടുത്തതാണ്.
2) ഞാന്‍ പ്രീഡിഗ്രീ ഒന്നാം വര്‍ഷം പഠിക്കുമ്പോള്‍ ട്രിവാന്‍ട്രം ലൂര്‍ദ്ദ് പള്ളിയില്‍ വച്ച് ഒരു കല്യാണത്തിന് കണ്ടപ്പോള്‍ എടുത്തത്.
3) എന്റെ കല്യാണത്തിന്, ചേച്ചിയും മോനും.
4) 2019 ല്‍ മറ്റൊരു കല്യാണത്തിന് കണ്ടപ്പോള്‍... കൂടെയുള്ളത് എന്റെ മകനാണ്.
ഇതിലെ ഹൈലൈറ്റ് ഈ 32 വര്‍ഷങ്ങളില്‍ ചേച്ചിയുടെ സ്‌നേഹത്തിനും സൗഹൃദത്തിനും ഒരു കുറവും വന്നിട്ടില്ല എന്നതാണ്. ഇന്ന് പഴയ ഫോട്ടോസ് കണ്ടപ്പോള്‍ ഇതൊക്കെ ഓര്‍മ വന്നു. നിങ്ങളോട് ഷെയര്‍ ചെയ്യണമെന്ന് തോന്നി.
Premium Lifestyle and Entertainment website
ബിഎഡ് ചെയ്തോണ്ടിരിക്കുന്ന സമയത്ത് ആദ്യ വിവാഹം; ആറ് മാസം മുതല്‍ ചെറിയ പ്രശ്‌നങ്ങള്‍ തുടങ്ങി; പ്രഗ്‌നന്റായ സമയത്ത് കൃത്യമായ ഭക്ഷണം പോലും കിട്ടുന്നില്ലായിരുന്നു; മോള്‍ക്ക് ഒരു വയസും മൂന്ന് മാസവും ആയപ്പോള്‍ നില്‍ക്കാന്‍ പറ്റാത്ത അവസ്ഥയായി;വിദ്യാഭ്യാസമുള്ളത് കൊണ്ട് ആരുടെ മുന്നിലും തല താഴ്ത്താതെ ജീവിക്കാന്‍ കഴിഞ്ഞു; അര്‍ജ്ജുന്റെ ചേട്ടന്റെ ഭാര്യായി എത്തിയ വിദ്യക്ക് പറയാനുള്ളത്
മോളിവുഡ് നടി ദുസരാ വിജയന്‍ കാട്ടാളനിലൂടെ മലയാളത്തിലേക്ക്; പോസ്റ്റര്‍ പുറത്ത്