അഭിനേതാവെന്ന നിലയില്‍ സ്വാര്‍ഥനാണ്;തനിക്ക് രാഷ്ട്രീയമുണ്ട് പക്ഷേ രാഷ്ട്രീയക്കാരനല്ല; നാട്ടില്‍ നടക്കുന്നതും നടക്കാന്‍ പാടില്ലാത്തതുമെല്ലാം കാണുന്നുണ്ട്; മനസ് തുറന്ന് മമ്മൂട്ടി

റാം സംവിധാനം ചെയ്ത് മമ്മൂട്ടി നായകനായ ചിത്രം പേരന്‍പ് തമിഴിലും മലയാളത്തിലും ഒക്കെ മികച്ച അഭിപ്രായം നേടി മുന്നോട്ട് പോകുകയാണ്. മമ്മൂട്ടി എന്ന അഭിനേതാവിന്റെ കരിയറിലെ മറ്റൊരു ഏടാണ് ചിത്രമെന്ന് കണ്ടവര്‍ ഉറപ്പിക്കുന്നു.നീണ്ട പത്ത് വര്‍ഷത്തെ ഇടവേളയ്ക്ക് ശേഷം തമിഴിലേക്ക് എത്തിയ മമ്മൂട്ടി പ്രോമോഷന്‍ പരിപാടികളും സ്റ്റേജ് പരിപാടികളുമായി തമിഴില്‍ തിരക്കിലാണ്. തമിഴ് ചാനലായ 'തന്തി ടിവി'ക്ക് നല്‍കിയ അഭിമുഖത്തില്‍ മമ്മൂട്ടി സിനിമാ ജീവിതത്തെക്കുറിച്ചും ്രാഷ്ട്ര്ീയത്തെക്കുറിച്ചും മനസ് തുറന്നതാണ് ചര്‍ച്ചയാകുന്നത്.

അഭിനേതാവെന്ന നിലയില്‍ സ്വാര്‍ത്ഥനാണ് താനെന്ന് മമ്മൂട്ടി. അതിനാലാണ് സിനിമയില്‍ നിന്ന് താന്‍ വിട്ടു പോകാത്തതെന്നും അദ്ദേഹം വ്യക്തമാക്കി.അഭിനേതാവെന്ന നിലയില്‍ ഞാന്‍ സ്വാര്‍ഥനാണ്, എല്ലാ സിനിമകളിലും ഞാന്‍ തന്നെ അഭിനയിക്കണമെന്നും, എല്ലാ കഥാപാത്രങ്ങളും എനിക്ക് തന്നെ ചെയ്യണമെന്നും ആഗ്രഹിക്കുന്ന വ്യക്തിയാണ്. അതുകൊണ്ടാണ് എന്നില്‍ നിന്നും സിനിമ വിട്ടു പോകാത്തതും സിനിമയില്‍ നിന്ന് ഞാന്‍ വിട്ടു പോകാത്തതും.

ഡാന്‍സ് ചെയ്യാനറിയില്ല എന്ന വിമര്‍ശനത്തോടും അഭിമുഖത്തില്‍ നടന്‍ പ്രതികരിച്ചു. ഡാന്‍സ് ചെയ്യാന്‍ ചെറിയ നാണമുണ്ട്. അതുകൊണ്ടാണ് കളിക്കാത്തത്. കാണുമ്പോള്‍ ഇത് എളുപ്പമാണെന്ന് തോന്നും. പക്ഷേ അവിടെ ചെന്നു നില്‍ക്കുമ്പോള്‍ ആ താളത്തിന് അനുസരിച്ച് എനിക്ക് ചെയ്യാന്‍ കഴിയില്ല, ദളപതി സിനിമയ്‌ക്കൊക്കെ കഷ്ടപ്പെട്ടാണ് ചെയ്തത്. ഡാന്‍സ് ചെയ്യുമ്പോള്‍ റിയലിസ്റ്റിക്കാവില്ലെന്ന് താന്‍ പറയുന്നത് ശരിക്കും ഒരു ഒഴികഴിവ് മാത്രമാണ്.സത്യത്തില്‍ തനിക്ക് കളിക്കാന്‍ അറിയില്ലെന്നതും നാണമാണെന്നതുമാണ് കാരണം. ചെയ്യാന്‍ ശ്രമിച്ചിരുന്നു, പക്ഷേ തന്റെ നാണം ചിത്രങ്ങളില്‍ കാണാന്‍ കഴിയുമെന്നും മമ്മൂട്ടി കൂട്ടിച്ചേര്‍ത്തു

ഓരോ സിനിമയെ സമീപിക്കുമ്പോഴും അതിന്റെ രാഷ്ട്രീയ വശങ്ങളെക്കുറിച്ചും ചിന്തിക്കാറുണ്ട്. നമുക്ക് രാഷ്ട്രീയമുണ്ടാവണമെന്ന നിലപാടുള്ള വ്യക്തിയാണ് താനെന്നും അദ്ദേഹം വ്യക്തമാക്കി. 'തനിക്ക് രാഷ്ട്രീയമുണ്ട്, പക്ഷേ രാഷ്ട്രീയക്കാരനല്ല, നമുക്ക് രാഷ്ട്രീയമുണ്ടാവണം എന്നു തന്നെയാണ് എന്റെ നിലപാട്. നാട്ടില്‍ നടക്കുന്നതും നടക്കാന്‍ പാടില്ലാത്തതുമെല്ലാം എല്ലാം ഞാന്‍ കാണുന്നുണ്ട്. രാഷ്ട്രീയത്തില്‍ ഇറങ്ങിയെന്നാണ് മലയാളത്തില്‍ പറയുന്നത്. സിനിമയുള്ളപ്പോള്‍ നമുക്കെന്തിനാ രാഷ്ട്രീയം?'- എന്നും മമ്മൂട്ടി ചോദിക്കുന്നു.