പൊങ്കല്‍ ആശംസകള്‍ നേര്‍ന്ന് സംവിധായകന്‍ ശങ്കര്‍ ഇന്ത്യന്‍ 2 വിന്റെ ഫസ്റ്റ് ലുക്ക് പോസ്റ്റര്‍ പുറത്ത്‌വിട്ടു; അനീതിക്കെതിരെ വിരല്‍ ചൂണ്ടുന്ന സേനാപതിയുടെ ലുക്ക് ഏറ്റെടുത്ത് ആരാധകര്‍

ഇന്ത്യന്‍ സിനിമയുടെ ഉലകനായകന്‍ കമല്‍ഹാസന്‍ വീണ്ടും എത്തുന്നത് മറ്റൊരു സസ്‌പെന്‍സുമായിട്ടാണ്.  കമല്‍ഹാസന്‍ ആരാധകര്‍ക്ക് പൊങ്കല്‍ വിരുന്നായി ഏറെ പ്രതീക്ഷയോടെ കാത്തിരിക്കുന്ന പുതിയ ചിത്രം 'ഇന്ത്യന്‍ 2' ന്റെ ഫസ്റ്റ് ലുക്ക് പോസ്റ്റര്‍ പുറത്തിറക്കി. പൊങ്കല്‍ ആശംസകള്‍ നേര്‍ന്ന് സംവിധായകന്‍ ശങ്കര്‍ തന്നെയാണ്  പോസ്റ്റര്‍ പുറത്തുവിട്ടത്. അനീതിക്കെതിരെ വിരല്‍ ചൂണ്ടുന്ന പഴയ സേനാപതിയെ തന്നെയാണ് പോസ്റ്ററില്‍ കാണാന്‍ കഴിയുക. 22വര്‍ഷങ്ങള്‍ക്ക് മുന്‍പ് പുറത്തിറങ്ങിയ ഇന്ത്യന്‍ എന്ന ചിത്രത്തിന്റെ രണ്ടാം ഭാഗമാണിത്. ചിത്രത്തില്‍ കാജല്‍ അഗര്‍വാളാണ് കമലിന്റെ നായികയായി എത്തുന്നത്. ബോളിവുഡ് താരം അജയ് ദേവ്ഗണ്‍ ചിത്രത്തില്‍ പ്രധാന വേഷത്തിലെത്തുന്നു എന്നതാണ് മറ്റൊരു പ്രത്യേകത.ഹൈദരാബാദ് ഫിലിം സിറ്റിയായിരിക്കും ചിത്രത്തിന്റെ പ്രധാന ലൊക്കേഷന്‍.

രാഷ്ട്രീയ പ്രവേശനം നടത്തുന്ന കമല്‍ഹാസന്റെ അഭിനയ ജീവിതത്തിലെ അവസാന ചിത്രമായിരിക്കും ഇന്ത്യന്‍2 എന്നാണ് സൂചനകള്‍. തമിഴിന് പുറമെ ഹിന്ദി,തെലുങ്ക് ഭാഷകളിലും ചിത്രം പുറത്തിറങ്ങുന്നുണ്ട്. ആദ്യ ചിത്രത്തിന്റെ ക്ലൈമാക്സില്‍ തന്നെ രണ്ടാം ഭാഗത്തിനുള്ള സൂചന നല്‍കിയാണ് ചിത്രം പൂര്‍ത്തിയാകുന്നത്. പഴയ ചിത്രത്തിലുള്ള കഥാപാത്രങ്ങള്‍ പുതിയ ചിത്രത്തിലും ഉണ്ടോ എന്ന് വ്യക്തമല്ല. അതേസമയം മലയാളത്തിന്റെ സ്വന്തം ദുല്‍ഖര്‍ സല്‍മാനും ചിത്രത്തില്‍ ഉണ്ടാകുമെന്നാണ് ഇപ്പോള്‍ പുറത്ത് വരുന്ന സ്ഥിരീകരിക്കാത്ത റിപ്പോര്‍ട്ട്.ആദ്യ ഭാഗത്തിലുള്ളതു പോലെ, നെടുമുടി വേണുവും ചിത്രത്തില്‍ വേഷമിടുന്നുണ്ട്. പുറത്തു വിട്ട പോസ്റ്റര്‍ പ്രകാരം, ആദ്യ ചിത്രത്തിലെ അതേ ഗെറ്റപ്പിലാണ് കമല്‍ഹാസന്‍ വീണ്ടും എത്തുന്നത്. ജനുവരി 18 ഓടെ ചിത്രത്തിന്റെ ഷൂട്ടിങ് ആരംഭിക്കും.

എ.ആര്‍ റഹ്മാന്‍ തന്നെയാണ് രണ്ടാം ഭാഗത്തിനും സംഗീതം ഒരുക്കുന്നത്. . രവിവര്‍മ്മനാണ് ഛായാഗ്രഹണം. നിരവധി ചിത്രങ്ങളിലെ ആക്ഷന്‍ രംഗങ്ങളിലൂടെ പ്രേക്ഷകരെ ഞെട്ടിച്ച പീറ്റര്‍ ഹെയ്നാണ് ചിത്രത്തിന് സംഘട്ടനം ഒരുക്കുന്നത്. 200കോടി രൂപ ബഡ്ജറ്റിലാണ് ഇന്ത്യന്‍2 ഒരുക്കുന്നത്സാബു സിറിലാണ് കലാസംവിധാനം.