മരങ്ങള്‍ക്കിടയില്‍ ഇരിക്കുക; പച്ചപ്പ് ശ്വസിക്കുക; ഇത് വെറുമൊരു കഫേ മാത്രമല്ല.ശാഖകളിലേക്ക് പടര്‍ന്ന ഒരു സ്വപ്നമാണ്; പോണ്ടിച്ചേരിയ്ക്ക് സമീപം മരത്തിന് മുകളില്‍ കഫേ തുടങ്ങിയ സന്തോഷം പങ്കുവച്ച് ഹരീഷ് ഉത്തമന്‍

മലയാളികള്‍ക്കും തമിഴ് പ്രേക്ഷകര്‍ക്കും ഒരുപോലെ സുപരിചിതനായ നടന്‍ ഹരീഷ് ഉത്തമന്‍ അഭിനയത്തിന് പുറമെ പുതിയൊരു മേഖലയിലേക്ക് കൂടി ചുവടുവെച്ചിരിക്കുകയാണ്. പ്രകൃതിയോട് ഇണങ്ങി നില്‍ക്കുന്ന രീതിയില്‍ തമിഴ്നാട്ടില്‍ ഒരു 'ട്രീ ടോപ്പ് കഫേ' ആരംഭിച്ചിരിക്കുകയാണ് താരം. മരത്തിന് മുകളില്‍ നിര്‍മ്മിച്ച ഈ കഫേ ഇതിനോടകം തന്നെ സഞ്ചാരികളുടെയും ഭക്ഷണപ്രേമികളുടെയും ശ്രദ്ധ പിടിച്ചുപറ്റി കഴിഞ്ഞു.

മരത്തിന് മുകളില്‍ അതിമനോഹരമായൊരു കഫേ പണിതിരിക്കുകയാണ് നടന്‍. ഇതുപോലെയൊന്ന് ലോകത്ത് ആദ്യമാണെന്നാണ് നടന്‍ പറയുന്നത്. കഫേയുടെ ചിത്രങ്ങളും വീഡിയോകളും അദ്ദേഹം സോഷ്യല്‍ മീഡിയയിലൂടെ പങ്കുവച്ചിട്ടുണ്ട്. രാവിലെ എട്ടു മണി മുതല്‍ രാത്രി എട്ടു വരെയാണ് തമിഴ്നാട്ടിലെ ഓറോവില്ലിനടുത്തുളള ട്രീ ടോപ്പ് കഫേ പ്രവര്‍ത്തിക്കുന്നത്. 

ഇങ്ങനെയൊരു സംരംഭം തുടങ്ങാനുണ്ടായ കാരണത്തെ കുറിച്ചും അതിന്റെ പ്രവര്‍ത്തനത്തെ കുറിച്ചുമെല്ലാം വിവരിച്ചുകൊണ്ട് സോഷ്യല്‍ മീഡിയയില്‍ ഒരു കുറിപ്പും ഹരീഷ് പങ്കുവച്ചിട്ടുണ്ട്. 

എപ്പോഴും സ്പെഷ്യലായത് എന്തെങ്കിലുമൊന്ന് സൃഷ്ടിക്കണമെന്ന് ഞാന്‍ എപ്പോഴും ആഗ്രഹിച്ചിരുന്നു. ഇന്ന് ട്രീ ടോപ്പ് കഫേയെ കുറിച്ച് ലോകത്തിന് മുന്നില്‍ പങ്കുവെക്കുമ്പോള്‍ എന്റെ ഹൃദയം നിറയുന്നു. കഴിഞ്ഞ ജൂണിലാണ് ഈ സ്വപ്നത്തിന്റെ വിത്ത് പാകിയത്. എന്റെ സുഹൃത്ത് ശങ്കറും ഞാനും ഒരുമിച്ച് ആദ്യമായി ഇതിനെക്കുറിച്ച് ആലോചിച്ചത് അപ്പോഴായിരുന്നു.

സത്യം പറഞ്ഞാല്‍, ഈ സ്വപ്നം ഇതിലും എത്രയോ കാലം മുന്‍പേ ഉള്ളതാണ്. 2008 മുതല്‍, ഒരു കഫേയുടെയോ റസ്റ്റൊറന്റിന്റെയോ ഭാഗമാകാനുള്ള ആഗ്രഹം ഞാന്‍ ഉള്ളില്‍ കൊണ്ടു നടന്നിരുന്നു. ജീവിതം മുന്നോട്ട് പോയി, സിനിമ സംഭവിച്ചു, അപ്പോഴും ആ സ്വപ്നം അതിന്റെ സമയത്തിനായി ക്ഷമയോടെ കാത്തുനിന്നു.

വര്‍ഷങ്ങള്‍ക്ക് ശേഷം ഞാന്‍ പോണ്ടിച്ചേരിയിലെ കീത്ത് ഹൗസിന്റെ സ്ഥാപകനായ ശങ്കറിനെ കണ്ടുമുട്ടി. ഒരിക്കല്‍ അദ്ദേഹത്തിന്റെ വീട് സന്ദര്‍ശിക്കവെ, ആ സ്ഥലത്തിന്റെ ഊഷ്മളതയും അദ്ദേഹത്തിന്റെ കാഴ്ചപ്പാടിലെ സത്യസന്ധതയും എന്നെ ആഴത്തില്‍ സ്പര്‍ശിച്ചു. ആത്മബന്ധം തോന്നി. ആ സംഭാഷണങ്ങള്‍ക്കിടയിലും പങ്കുവെച്ച നിമിഷങ്ങള്‍ക്കിടയിലും ഒരു ലളിതമായ ചിന്തയുണര്‍ന്നു.

എന്തുകൊണ്ട് ഒരുമിച്ച് എന്തെങ്കിലുമുണ്ടാക്കിക്കൂടാ? അങ്ങനെ പതുക്കെ, ആ ചിന്ത ട്രീ ടോപ്പ് കഫേയായി വളര്‍ന്നു'', ഹരീഷ് കുറിച്ചു. ഒപ്പം തന്റെ സ്വപ്നത്തിന് കൂടെ നിന്നവരോടും ഹരീഷ് നന്ദി പറഞ്ഞിട്ടുണ്ട്. 'നിങ്ങള്‍ പോണ്ടിച്ചേരിയുടെ അടുത്താണെങ്കില്‍, ദയവായി വന്ന് സ്വയം അനുഭവിച്ചറിയുക.

മരങ്ങള്‍ക്കിടയില്‍ ഇരിക്കുക, പച്ചപ്പ് ശ്വസിക്കുക, ഞങ്ങളുമായി ഒരു നിമിഷം പങ്കിടുക. കാരണം ഇത് വെറുമൊരു കഫേ മാത്രമല്ല. ഇത് വര്‍ഷങ്ങളോളം കാത്തുകിടന്ന് ഒടുവില്‍ വഴി കണ്ടെത്തി, ശാഖകളിലേക്ക് പടര്‍ന്ന ഒരു സ്വപ്നമാണ്''-എന്നും നടന്‍ കുറിച്ചിട്ടുണ്ട്.