കാര്‍വാന്‍ തുണച്ചു..! ; ഇനി ദുല്‍ഖറിന് ബോളിവുഡ് മതി..!!; കാര്‍വാന്റെ വിജയത്തുടര്‍ച്ചയില്‍ ദുല്‍ഖറിന്റെ ഡേറ്റിനായി പ്രമുഖ ബോളിവുഡ് സംവിധായകര്‍

ബോളിവുഡ് അരങ്ങേറ്റ ചിത്രമായ കാര്‍വാന്‍ വിജയിച്ചതോടെ ദുല്‍ഖര്‍ സല്‍മാന്‍ ബോളിവുഡിന്റെ രാശിയായി മാറിയെന്ന് റിപ്പോര്‍ട്ട്. ദുല്‍ഖറിന്റെ ഡേറ്റിനായി മുന്‍നിര സംവിധായകരാണ് നടനുമായി ബന്ധപ്പെട്ടിരിക്കുന്നത്. പലതും പരിഗണനയിലുണ്ടെങ്കിലും സോയാ ഫാക്ടറാണ് നടന്റേതായി എത്തുന്ന അടുത്ത ബോളിവുഡ് ചിത്രം. കാര്‍വാന്റെ വിജയക്കുതിപ്പിനൊപ്പം ദുല്‍ഖറിന്റെ രണ്ടാമത്തെ ബോളിവുഡ് ചിത്രം സോയാഫാക്ടറിനെക്കുറിച്ച് നിരവധി വാര്‍ത്തകളാണ് സോഷ്യല്‍ മീഡിയയിലൂടെ പുറത്തുവന്നുകൊണ്ടിരിക്കുന്നത്.

സോയാഫാക്ടര്‍ എന്നു പേരിട്ടിരിക്കുന്ന ദുല്‍ഖറിന്റെ രണ്ടാമത്തെ ചിത്രത്തില്‍ നടന്‍ ക്രിക്കറ്റ് താരം വിരാട് കോഹ്ലിയുടെ വേഷത്തിലാണ് എത്തുക എന്ന് അഭ്യൂഹങ്ങളും പ്രചരിച്ചിരുന്നു. എന്നാല്‍ അങ്ങനെയല്ലെന്ന് പറഞ്ഞാണ് ഇപ്പോള്‍ ദുല്‍ഖര്‍ രംഗ്‌ത്തെത്തിയിരിക്കുന്നത്.

അഭിഷേക് ശര്‍മ്മ സംവിധാനംചെയ്യുന്ന സോയാ ഫാക്ടറാണ് ദുല്‍ഖറിന്റെ രണ്ടാമത്തെ ബോളിവുഡ് ചിത്രമായി പ്രഖ്യാപിക്കപ്പെട്ടത്. ചിത്രത്തില്‍ ഇന്ത്യന്‍ ക്രിക്കറ്റ് ടീം നായകന്‍ വിരാട് കോഹ്ലിയായി ദുല്‍ഖര്‍ എത്തുന്നുവെന്നായിരുന്നു പുറത്തു വന്ന വാര്‍ത്തകള്‍. ദുല്‍ഖര്‍ വിരാട് കോഹ്ലിയായി എത്തുന്നുവെന്ന വാര്‍ത്ത ഇരുവരുടേയും ആരാധകരില്‍ ഒന്നടങ്കം സന്തോഷമുണ്ടാക്കിയിരുന്നു. എന്നാല്‍ സോയാ ഫാക്ടറിലെ കഥാപാത്രം വിരാട് കോഹ്ലിയുടെത് അല്ലെന്ന് പറഞ്ഞാണ് ഇപ്പോള്‍ ദുല്‍ഖര്‍ രംഗത്തെയിരിക്കുന്നത്. കാര്‍വാനിലെത് പോലെ മികച്ചൊരു കഥാപാത്രമായതിനാലാണ് സോയാ ഫാക്ടറിലും അഭിനയിക്കാമെന്ന് സമ്മതിച്ചത്.എന്നാല്‍ തന്റെ കഥാപാത്രം ഒരിക്കലും വിരാട് കോഹ്ലിയുടേതല്ലെന്നും അദ്ദേഹം പറഞ്ഞു. ചിത്രത്തെ സംബന്ധിച്ച് പുറത്തു വന്ന അഭ്യൂഹങ്ങളെല്ലാം തള്ളിക്കൊണ്ടാണ് ദുല്‍ഖര്‍ ഇക്കാര്യം പറഞ്ഞത്. സോയാ ഫാക്ടര്‍ എഴുതപ്പെട്ടത് ഏറെക്കാലം മുന്‍പാണെന്നും അത് എതെങ്കിലും ഒരാളെക്കുറിച്ച് ഉളളതാണെന്ന് താന്‍ കരുതുന്നില്ലെന്നും ദുല്‍ഖര്‍ കൂട്ടിച്ചേര്‍ത്തു. അനൂജ ചൗഹാന്റെ സോയ ഫാക്ടര്‍ എന്ന നോവലിനെ അടിസ്ഥാനമാക്കിയാണ് ഒരുങ്ങുന്നത്. പുസ്തകം പൂര്‍ണമായും കഥയാണെന്നും അതില്‍ യാഥാര്‍ഥ്യങ്ങളില്ലെന്നും ദുല്‍ഖര്‍ കൂട്ടിച്ചേര്‍ത്തു.