കുറച്ച് നേരം കണ്ടിരുന്നിട്ട് പോകാം എന്ന് കരുതിയിരുന്ന ഞാന്‍ പെര്‍ഫോമന്‍സ് കണ്ട് ഞെട്ടിപ്പോയി മുഴുവനും കണ്ടു; വര്‍ഷങ്ങള്‍ക്കു ശേഷം മികച്ച നടനുളള അവാര്‍ഡ് അദ്ദേഹത്തിന്റെ കൈകളില്‍ എത്തിച്ചേര്‍ന്നു ; കുറിപ്പുമായി അശ്വത് ലാല്‍ 

ഹൃദയം' സിനിമയിലെ ആന്റണി താടിക്കാരനായി എത്തി മലയാളികളുടെ ഇഷ്ടം നേടിയെടുത്ത നടനാണ് അശ്വത് ലാല്‍. താരം സോഷ്യല്‍ മീഡിയയില്‍ പങ്കുവെച്ച പുതിയ പോസ്റ്റാണ് ഇപ്പോള്‍ ശ്രദ്ധ നേടുന്നത്. ഏറ്റവും പ്രിയപ്പെട്ട ആള്‍ മികച്ച നടനുളള നാടക പുരസ്‌കാരം സ്വന്തമാക്കിയ സന്തോഷമാണ് അശ്വത് പങ്കുവെച്ചത്. 

ജീവിതത്തില്‍ ആദ്യമായി ഞാന്‍ സിനിമയില്‍ അഭിനയിക്കാന്‍ പോയ ദിവസം ,ഒരിക്കലും മറക്കാനാവാത്ത ആ രാത്രി (മാനസികാവസ്ഥ നിങ്ങള്‍ക്ക് മനസിലാകുമെന്ന് കരുതുന്നു സ്വപ്നത്തിലേക്കുള്ള ആ യാത്ര)അന്നുരാത്രി വെഞ്ഞാറമൂട് ഒരു നാടകം നടക്കുന്നൊണ്ടാരുന്നു. നാടകത്തിന്റെ പേര് ''നളിനാക്ഷന്റേവിശേഷം ''നായകന്‍ പ്രമോദ് വെളിയനാട്. കുറച്ച് നേരം കണ്ടിരുന്നിട്ട് പോകാം എന്ന് കരുതിയിരുന്ന ഞാന്‍ പെര്‍ഫോമന്‍സ് കണ്ട് ഞെട്ടിപ്പോയി മുഴുവനും ഇരുന്നു കണ്ടു.

ആദ്യമായി ചേട്ടനെ കണ്ടപ്പോ ഞാന്‍ പറഞ്ഞതും ഇതുതന്നെയായിരുന്നു. കേട്ടപ്പോ അദ്ദേഹമെന്നെ കെട്ടിപ്പിടിച്ചു ,ചിരിച്ചു.ഏകദേശം 6 ഓളം സിനിമകളില്‍ ഞങ്ങള്‍ ഒരുമിച്ച് അഭിനയിച്ചു. ആശാനെ എന്നു ഞാന്‍ വിളിക്കുന്ന ഞങ്ങടെ പ്രമോദേട്ടന്‍ ഇന്ന് കൂടുതല്‍ സന്തോഷവാനാണ് . സംസ്ഥാന നാടക അക്കാദമിയുടെ മികച്ച നടനുള്ള അവാര്‍ഡ് ''മാടന്‍ മോക്ഷം''എന്ന നാടക്കത്തിലൂടെ വര്‍ഷങ്ങള്‍ക്കുശേഷം അദ്ദേഹത്തിന്റെ കൈകളില്‍ എത്തിച്ചേര്‍ന്നു. കൂടുതല്‍ സന്തോഷമെന്തെന്നുവെച്ച അന്നു ഞാന്‍ അത്ഭുതത്തോടെ നോക്കി നിന്ന ആ മനുഷ്യന്‍ ഇന്ന് എന്നോടൊപ്പമുണ്ട് ഈ സന്തോഷ വാര്‍ത്ത ഞങ്ങള്‍ ഒരുമിച്ച് ആഘോഷിക്കുന്നു. ഞങ്ങള്‍ ഒരുമിച്ച് അഭിനയിക്കുന്ന നിധിയും ഭൂതവും എന്ന സിനിമാസെറ്റില്‍ '' , അശ്വത് ലാല്‍ കുറിച്ചു.