ഇതാണ് യഥാര്‍ത്ഥ ഞാന്‍; ഇത്രയ്ക്കും ഭീകരമായ എഡിറ്റിങ് വേണ്ടിയിരുന്നോ? ഇത്തരം വ്യാജ വീഡിയോകള്‍ ദയവായി പ്രചരിപ്പിക്കരുത്; താരത്തിന്റെ വീഡിയോ എഡിറ്റ് ചെയ്തവര്‍ക്കെതിരെ പ്രതികരിച്ച് നടി അന്ന രേഷ്മ രാജന്‍

സോഷ്യല്‍ മീഡിയയില്‍ തന്റെ ശരീരത്തെ വികൃതമായി പ്രദര്‍ശിപ്പിച്ചെന്ന രീതിയില്‍ പ്രചരിക്കുന്ന എഡിറ്റുചെയ്ത വീഡിയോകള്‍ക്കെതിരെ ശക്തമായി പ്രതികരിച്ച് നടി അന്ന രേഷ്മ രാജന്‍. യഥാര്‍ത്ഥത്തില്‍ വിവാഹത്തിനോ, മറ്റ് പരിപാടികളിലോ ഒരു വെള്ള സില്‍ക്ക് സാരിയും ബ്ലൗസും ധരിച്ച താരത്തിന്റെ വീഡിയോ ആണ് എഡിറ്റു ചെയ്ത രൂപത്തിലാണ് ഇപ്പോള്‍ പ്രചരിക്കുന്നത്.

'എഡിറ്റിങ് ഭീതി സൃഷ്ടിക്കുന്നു, ഇത്രയ്ക്കു വേണ്ടിയിരുന്നോ? യഥാര്‍ത്ഥ വീഡിയോയ്ക്ക് പോലും ഇത്രയായി വ്യൂസ് ഇല്ല. എന്തിനായിരിക്കും ഇത്?' എന്നിങ്ങനെ അന്ന സ്റ്റോറിയില്‍ കുറിച്ചു. കൂടാതെ, ഇത്തരം വ്യാജ വീഡിയോകള്‍ പ്രചരിപ്പിക്കരുതെന്ന് ഞാന്‍ എല്ലാവരോടും അഭ്യര്‍ത്ഥിക്കുന്നു' എന്നും കുറിച്ചു. അന്ന, 'ഇതാണ് യഥാര്‍ത്ഥ ഞാന്‍' എന്ന കുറിപ്പോടുകൂടിയ മറ്റൊരു റീലും ഇന്‍സ്റ്റഗ്രാം സ്റ്റോറിയില്‍ പങ്കുവെച്ചിട്ടുണ്ട്. താരത്തിന്റെ ഈ പ്രതികരണത്തിന് സോഷ്യല്‍ മീഡിയയില്‍ വലിയ പിന്തുണ ലഭിച്ചു.

'ലിച്ചി' എന്ന നാമത്തില്‍ പ്രശസ്തയായ നടി അന്ന രേഷ്മ രാജന്‍ വിവിധ ആഘോഷ പരിപാടികളിലും സാന്നിധ്യം നല്‍കാറുണ്ട്. വസ്ത്രധാരണത്തെ സംബന്ധിച്ച് താരം സമൂഹമാധ്യമങ്ങളില്‍ പലപ്പോഴും വിമര്‍ശനങ്ങള്‍ നേരിടാറുണ്ട്. ലിജോ ജോസ് പെല്ലിശ്ശേരി സംവിധാനം ചെയ്ത 'അങ്കമാലി ഡയറീസ്' എന്ന ചിത്രത്തിലൂടെ അഭിനയരംഗത്തേക്ക് എത്തുകയും, ചിത്രത്തിലെ കഥാപാത്രത്തിന്റെ പേരായ ലിച്ചിയിലൂടെ പേരും നേടിയിട്ടുണ്ട്.