മോഹന്‍ലാലിന് ഭക്ഷണം വിളമ്പി ബാലയ്യ; ആടിപ്പാടി തെന്നിന്ത്യന്‍ സൂപ്പര്‍ താരങ്ങള്‍; പ്രഭാസ്- അനുഷ്‌ക എഐ വിവാഹ വിഡിയോ പങ്കുവെച്ച് ആര്‍ജിവി 

സിനിമ താരങ്ങളായ പ്രഭാസും അനുഷ്‌ക ഷെട്ടിയും തമ്മിലുള്ള എഐ (ആര്‍ട്ടിഫിഷ്യല്‍ ഇന്റലിജന്‍സ്) സാങ്കേതികവിദ്യ ഉപയോഗിച്ച് നിര്‍മ്മിച്ച വിവാഹം വിഡിയോ പങ്കുവെച്ച് സംവിധായകന്‍ രാം ഗോപാല്‍ വര്‍മ. 'ഹേയ് എഐ, എന്താ ഇത്?' എന്ന അടിക്കുറിപ്പോടെ എക്‌സിലാണ് വര്‍മ ഈ വിഡിയോ പോസ്റ്റ് ചെയ്തത്. പ്രമുഖ താരങ്ങളുടെ സാങ്കല്‍പ്പിക വിവാഹ വിഡിയോ സോഷ്യല്‍ മീഡിയയില്‍ വലിയ ചര്‍ച്ചകള്‍ക്ക് വഴിവെച്ചിരിക്കുകയാണ്. 

ക്രിയോവിയ എന്ന ഇന്‍സ്റ്റാഗ്രാം പേജിലാണ് ഈ എഐ വിഡിയോ ആദ്യമായി പ്രത്യക്ഷപ്പെട്ടത്. 'രാജ്യം മുഴുവന്‍ കാത്തിരുന്ന വിവാഹം! സൂപ്പര്‍ സ്റ്റാര്‍ മുതല്‍ ആത്മമിത്രങ്ങള്‍ വരെ - ഇതാണ് ഇതുവരെയുള്ളതില്‍ വച്ച് ഏറ്റവും വലിയ വിവാഹ ആഘോഷം!' എന്ന അടിക്കുറിപ്പോടെയാണ് ക്രിയോവിയ ഈ വിഡിയോ പങ്കുവെച്ചത്. ഈ സാങ്കല്‍പ്പിക വിവാഹ ചടങ്ങുകളില്‍ രാം ഗോപാല്‍ വര്‍മയെ പൂജാരിയായി അവതരിപ്പിച്ചിരിക്കുന്നു. 

തമിഴ് സിനിമാ ലോകത്തുനിന്ന് വിജയ്, അജിത്, രജനികാന്ത്, കമല്‍ ഹാസന്‍, സൂര്യ, ധനുഷ് എന്നിവരെയും മലയാളത്തില്‍നിന്ന് മോഹന്‍ലാല്‍, മമ്മൂട്ടി, ദുല്‍ഖര്‍ സല്‍മാന്‍, പൃഥ്വിരാജ് സുകുമാരന്‍, ഫഹദ് ഫാസില്‍ എന്നിവരെയും അതിഥികളായി വിഡിയോയില്‍ കാണാം. തൃഷ, കാജല്‍ അഗര്‍വാള്‍, നയന്‍താര, രമ്യ കൃഷ്ണന്‍ തുടങ്ങിയ നായികമാരും വിഡിയോയില്‍ നിറഞ്ഞുനില്‍ക്കുന്നു. ചെണ്ട കൊട്ടുന്ന റാം ചരണ്‍, നൃത്തം ചെയ്യുന്ന എസ്.എസ്. രാജമൗലി, വിവാഹ സദ്യ കഴിക്കുന്ന ഡോങ് ലീ, സദ്യ വിളമ്പുന്ന ബാലയ്യ തുടങ്ങിയ രസകരമായ ദൃശ്യങ്ങളും ഈ എഐ വിഡിയോയുടെ ഭാഗമാണ്. 

വര്‍ഷങ്ങളായി പ്രഭാസും അനുഷ്‌കയും പ്രണയത്തിലാണെന്ന അഭ്യൂഹങ്ങള്‍ സിനിമാ മേഖലയില്‍ ശക്തമാണ്. എന്നാല്‍ ഈ ഗോസിപ്പുകളോട് ഇരുവരും ഇതുവരെ ഔദ്യോഗികമായി പ്രതികരിച്ചിട്ടില്ല. 'ബാഹുബലി'യാണ് ഈ താരജോഡി ഒടുവില്‍ ഒരുമിച്ച് അഭിനയിച്ച ചിത്രം. സന്ദീപ് റെഡ്ഡി വാങ്ക സംവിധാനം ചെയ്യുന്ന 'സ്പിരിറ്റ്' ആണ് പ്രഭാസിന്റേതായി അണിയറയില്‍ ഒരുങ്ങുന്ന അടുത്ത ചിത്രം. സാമൂഹിക മാധ്യമങ്ങളില്‍ സജീവമായി തന്റെ അഭിപ്രായങ്ങളും നിലപാടുകളും രേഖപ്പെടുത്താറുള്ള വ്യക്തിയാണ് രാം ഗോപാല്‍ വര്‍മ.