ചന്ദ്രോത്ത് പണിക്കര്‍ക്ക് വേണ്ടി മാസങ്ങള്‍ കൊണ്ട് ഉണ്ടാക്കിയെടുത്ത മസില്‍സ് എല്ലാം കഴിഞ്ഞ നാല് മാസം കൊണ്ട് ഒഴിവാക്കി; മേപ്പടിയാന്‍ എന്ന പുതിയ ചിത്രത്തിനായി ഉണ്ണികുടയറുമായി ഉണ്ണി മുകുന്ദന്‍; പുതിയ ചിത്രം പങ്ക് വച്ച് നടന്‍

സിനിമകള്‍ക്കായി നായകന്‍മാര്‍ ശരീരത്തില്‍ രൂപമാറ്റങ്ങള്‍ വരുത്തുന്നത് നാം നിരവധി കാണാറുണ്ട്. മസില്‍സില്‍ രൂപമാറ്റം വരുത്തുന്നതി കൂടുതലായും ബോളിവുഡ് നടന്മാരിലാണ് കാണാറ്. മലയാളത്തിലെ മസില്‍മാനായ ഉണ്ണി മുകുന്ദന്‍ തന്റെ മസില്‍സില്‍ വരുത്തിയ മാറ്റമാണ് ഇപ്പോള്‍ സോഷ്യല്‍മീഡിയയില്‍ പങ്ക് വച്ചിരിക്കുന്നത്.

എം. പദ്മകുമാര്‍ സംവിധാനം ചെയ്ത മാമാങ്കത്തിലെ ഉണ്ണി മുകുന്ദന്റെ ചന്ദ്രോത്ത് പണിക്കര്‍ എന്ന കഥാപാത്രത്തില്‍ നിന്നും  മേപ്പടിയാന്‍ എന്ന ചിത്രത്തിന് വേണ്ടിയുള്ള രൂപമാറ്റത്തെക്കുറിച്ചാണ് നടന്റെ ഫെയ്‌സ്ബുക്ക് കുറിപ്പ്. കുടവയറനായ ഉണ്ണി മുകുന്ദന്റെ ചിത്രമാണ് ഫേസ്ബുക്ക് താരം പങ്കുവച്ചിരിക്കുന്നത്.

ചന്ദ്രോത്ത് പണിക്കര്‍ക്ക് വേണ്ടി ഉണ്ടാക്കിയെടുത്ത മസില്‍സ് എല്ലാം കഴിഞ്ഞ നാല് മാസം കൊണ്ട് ഒഴിവാക്കിയെന്നും മേപ്പടിയാന്‍ എന്ന ചിത്രത്തിന് വേണ്ടിയാണ് തന്റെ പുതിയ രൂപമെന്നും ഉണ്ണി പറയുന്നു. ഇതിനെ നായകനായ ജയകൃഷ്ണന്‍ ഒരു നാട്ടിന്‍പുറത്തുകാരനായ സാധാരണക്കാരനാണ്. അത്തരമൊരു വേഷം ചെയ്യുന്നതിനായി ഈ രൂപത്തിലേക്ക് മാറേണ്ടത് ആവശ്യകതയാണെന്നു മനസിലാക്കിയതിനാലാണ് ഈ മുന്നൊരുക്കമെന്നും ഉണ്ണി ഫേസ്ബുക്കില്‍ കുറിച്ചു.ഫേസ്ബുക്ക് കുറിപ്പിന്റെ പൂര്‍ണരൂപം
നമസ്‌കാരം,

ശാരീരികമായും, മാനസികമായും ചന്ദ്രോത്ത് പണിക്കര്‍ എന്ന കഥാപാത്രത്തിലേക്ക് എനിക്ക് എത്തിച്ചേരാന്‍ 11 മാസം വേണ്ടി വന്നു.

ചന്ദ്രോത്ത് പണിക്കരെ ഹൃദയത്തില്‍ ഏറ്റിയവര്‍ക്കും, സ്വീകരിച്ചവര്‍ക്കും നന്ദി. മാമാങ്കം കഴിഞ്ഞിരിക്കുന്നു. ഇനിയുള്ള യാത്ര പുതിയ കഥാപാത്രത്തിലേക്കുള്ളതാണ്. ചന്ദ്രോത്ത് പണിക്കര്‍ക്ക് വേണ്ടി ഉണ്ടാക്കിയെടുത്ത മസില്‍സ് എല്ലാം കഴിഞ്ഞ നാല് മാസം കൊണ്ട് ഒഴിവാക്കിയിരിക്കുകയാണ്.

ഇപ്പോള്‍ നിങ്ങള്‍ ഈ കാണുന്ന മാറ്റത്തിലേക്ക് എത്തിച്ചേര്‍ന്നിരിക്കുന്നത് എന്റെ പുതിയ ചിത്രത്തിനു വേണ്ടിയുള്ള ഒരുക്കങ്ങളുടെ ഭാഗമായാണ്.

'മേപ്പടിയാന്‍' എന്ന അടുത്ത ചിത്രത്തിലെ നായകന്‍ ജയകൃഷ്ണന്‍ ഒരു നാട്ടിന്‍പുറത്തുകാരനായ സാധാരണക്കാരനാണ്. അത്തരമൊരു വേഷം ചെയ്യുന്നതിനായി ഈ രൂപത്തിലേക്ക് മാറേണ്ടത് ആവശ്യകതയാണെന്നു മനസിലാക്കിയതിനാലാണ് ഈ മുന്നൊരുക്കം. അത് ചിത്രത്തിലൂടെ നിങ്ങള്‍ക്ക് ബോധ്യമാകുമെന്നു പ്രതീക്ഷയുണ്ട്.

എന്റെ ഓരോ വിജയങ്ങള്‍ക്ക് പിന്നിലും നിങ്ങള്‍ തന്ന വലിയ പിന്തുണ ഉണ്ടായിരുന്നു. അതിനു ഞാന്‍ നിങ്ങള്‍ ഓരോരുത്തരോടും കടപ്പെട്ടിരിക്കുന്നു. തുടര്‍ന്നും നിങ്ങളുടെ മനസ്സറിഞ്ഞ ഹൃദയത്തില്‍ തൊട്ടുള്ള പിന്തുണ കൂടെയുണ്ടാകണം. 

ഒരു സുപ്രധാന കാര്യം കൂടി നിങ്ങളുടെ ശ്രദ്ധയില്‍പ്പെടുത്താന്‍ ആഗ്രഹിക്കുകയാണ്. എന്റെ മറ്റു ചിത്രങ്ങളെ അപേക്ഷിച്ച് 'മേപ്പടിയാന്‍' എന്ന ചിത്രത്തില്‍ യാതൊരു തരത്തിലുള്ള ആക്ഷന്‍ രംഗങ്ങളും ഉണ്ടായിരിക്കുകയില്ല. ചിത്രം കുടുംബ പ്രേക്ഷകര്‍ക്കും, യുവാക്കള്‍ക്കും ഇഷ്ടപ്പെടുന്ന ഒരുപിടി നല്ല രംഗങ്ങള്‍ കൊണ്ട് സമ്പന്നമായിരിക്കും.