ആസിഫ് അലിയുടെ നായികയായി പാര്‍വതി വീണ്ടുമെത്തുന്നു; ഉയരെയ്ക്ക് ശേഷം സിദ്ദാര്‍ത്ഥ് ശിവ ചിത്രത്തിലും ഇരുവരും ഒരുമിക്കുന്നു

സിദ്ദാര്‍ത്ഥ് ശിവ സംവിധാം ചെയ്യുന്ന പുതിയ ചിത്രത്തില്‍  ആസിഫ് അലിയുടെ നായികയായി പാര്‍വതി എത്തുന്നു.  ഇരുവരും ഒന്നിക്കുന്ന നാലാമത്തെ ചിത്രമാകുമിത്. നിവിന്‍പോളി നായകനായ സഖാവിന് ശേഷമാണ് ആസിഫ് അലി, പാര്‍വതി എന്നിവരെ മുഖ്യവേഷങ്ങളിലെത്തിച്ച്  സിദ്ദാര്‍ത്ഥ് വീണ്ടുമെത്തുന്നത്.

ചിത്രത്തിന്റെ ഷൂട്ടിങ് മാര്‍ച്ചില്‍ ആരംഭിക്കും. ബെന്‍സി പ്രൊഡക്ഷന്‍സ് ആണ് ചിത്രം നിര്‍മ്മിക്കുന്നത് എന്നാണ് റിപ്പോര്‍ട്ടുകള്‍.നേരത്തെ മഹേഷ് നാരായണന്‍ സംവിധാനം ചെയ്യ്ത ടേക്ക് ഓഫിലാണ് ആസിഫും പാര്‍വ്വതിയും ഒരുമിച്ച് അഭിനയിച്ചത്. അന്തരിച്ച സംവിധായകന്‍ രാജേഷ് പിളളയുടെ അസോസിയേറ്റ് ആയിരുന്ന മനു അശോകന്‍ സംവിധാനം ചെയ്യുന്ന ഉയരെ എന്ന ചിത്രത്തിലാണ് ഇരുവരും ഇപ്പോള്‍ അഭിനയിക്കുന്നത്. 

ചിത്രത്തില്‍ ആസിഡ് ആക്രമണത്തിന് ഇരയാകുന്ന പെണ്‍കുട്ടിയുടെ വേഷമാണ് പാര്‍വ്വതിക്ക്. ആസിഫിനൊപ്പം ടൊവിനോയും ചിത്രത്തില്‍ പ്രധാന വേഷം അഭിനയിക്കുന്നു.നിപ വൈറസ് ബാധയെ ആസ്പദമാക്കി ആഷിഖ് അബു സംവിധാനം ചെയ്യുന്ന വൈറസിലും പാര്‍വ്വതിയും ആസിഫും ഒന്നിക്കുന്നുണ്ട്.നൂറ്റൊന്നു ചോദ്യങ്ങള്‍ എന്ന ചിത്രമായിരുന്നു സിദ്ധാര്‍ത്ഥ് ശിവയുടെ ആദ്യം ചിത്രം. ആ വര്‍ഷത്തെ മികച്ച സംവിധായകനുളള ദേശീയ പുരസ്‌കാരം ചിത്രത്തിലൂടെ അദ്ദേഹത്തിന് ലഭിച്ചിരുന്നു.