ഏറ്റവും നന്നായി കോർപറേറ്റ് ചെയ്യാൻ സാധിയ്ക്കുന്ന നായിക നടിയാണ് മീര; വെളിപ്പെടുത്തലുമായി സത്യൻ അന്തിക്കാട്

തന്റെ അഭിനയ മികവ് കൊണ്ട് പ്രേക്ഷകരുടെ ഇഷ്ടം നേടിയ നടിയാണ് മീര ജാസ്മിൻ. മലയാളത്തിന് പുറമെ  തമിഴ്, തെലുങ്ക്, കന്നഡ ഭാഷകളിൽ എല്ലാം തന്നെ താരത്തിന് തിളങ്ങാൻ സാധിക്കുകയും ചെയ്തു. ഏറെ നാളത്തെ ഇടവേളയ്ക്ക് ശേഷം താരം വീണ്ടും അഭിനയ മേഖലയിലേക്ക് തിരിച്ചു വരുകയാണ്. എന്നാൽ ഇപ്പോൾ മീര ജാസ്മിൻ എന്ന നടിയെ കുറിച്ച് സത്യൻ അന്തിക്കാട് പറഞ്ഞ വാക്കുകളാണ് ശ്രദ്ധ നേടുന്നത്.

ഒരുപാട് പ്രത്യേകതയുള്ള നടിയാണ് എന്നെ സംബന്ധിച്ച് മീര ജാസ്മിൻ. മീരയെ കുറിച്ച് ഒരുപാട് ആളുകൾ പലതും സംസാരിക്കാറുണ്ട്. മീര ജാസ്മിൻ അഹങ്കാരിയാണ്, അനുസരണയില്ലാത്ത നടിയാണ് എന്നൊക്കെ. പക്ഷെ എനിക്ക് ഏറ്റവും നന്നായി കോർപറേറ്റ് ചെയ്യാൻ സാധിയ്ക്കുന്ന നായിക നടിയാണ് മീര.

നമ്മൾ അങ്ങോട്ട് എങ്ങിനെ പെരുമാറുന്നോ അതാണ് അവർ തിരിച്ചു തരുന്നത്. മീര ജാസ്മിൻ അങ്ങനെ ഒരാളാണ്. എനിക്ക് മീര ജാസ്മിൻ എന്റെ സിനിമയിലേക്ക് വരുന്നു എന്ന് പറയുമ്പോൾ, എന്റെ കുടുംബത്തിലെ കുട്ടിയായിട്ടാണ് ഞാൻ കാണുന്നത്. ഞാൻ അത് പോലെയാണ് അവരെ സ്‌നേഹിക്കുന്നത്. അതെനിക്ക് മീര തിരിച്ചും തരുന്നു.

മീര ജാസ്മിന് പേഴ്‌സണൽ പ്രശ്‌നങ്ങൾ പലതും ഉണ്ടാവാം. പക്ഷെ അതിലേക്ക് ഞാൻ കയറാറില്ല. അഭിനേതാക്കൾ സെറ്റിൽ വരുമ്പോൾ അവർ ചെയ്യുന്ന കഥാപാത്രത്തെ കുറിച്ച് മാത്രമേ നമ്മൾ ചിന്തിക്കേണ്ടതുള്ളൂ, അവരുടെ വ്യക്തപരമായ കാര്യങ്ങൾ അന്വേഷിക്കേണ്ടതില്ല. മീര ജാസ്മിൻ ആയാലും ശോഭന ആയാലും ഉർവശി ആയാലും എന്നെ സംബന്ധിച്ച് അവർ ആർട്ടിസ്റ്റുകളാണ്. അത് കഴിഞ്ഞുള്ള കാര്യം എന്റെ വിഷയമല്ല.

മകൾ എന്ന സിനിമയിൽ മീര ജാസ്മിൻ വന്നാൽ നന്നായിരിയ്ക്കും എന്ന് എനിക്ക് തോന്നി. പക്ഷെ കോണ്ടാക്ട് ചെയ്യാൻ ഒരു മാർഗ്ഗവും ഇല്ല. എവിടെയാണെന്ന് പോലും അറിയില്ല. അവസാനം ദുബായിൽ ആണെന്നും അവിടെ ബിസിനസ്സ് നടത്തുകയാണ് എന്നും അറിഞ്ഞു. നമ്പറും കിട്ടി. അന്ന് ഞാൻ വാട്‌സ് ആപ്പിൽ ഒരു വോയിസ് മെസേജ് അയച്ചു, എന്റെ പുതിയ ചിത്രത്തിൽ മീര അഭിനയിക്കുമെങ്കിൽ നന്നായിരുന്നു എന്ന്. രാത്രി മീര വിളിച്ചു, ‘സിനിമ ഇപ്പോൾ എന്റെ മീഡിയ അല്ല, പക്ഷെ സത്യൻ അങ്കിൾ വിളിച്ചാൽ വരാതിരിക്കാൻ കഴിയില്ല’ എന്ന് പറഞ്ഞു.

മീര ജാസ്മിൻ ആദ്യമായി എന്റെ രസതന്ത്രം എന്ന സിനിമയിലാണ് അഭിനയിച്ചത്. അതും ആൺ കുട്ടിയായിട്ട്. വിനോദ യാത്ര എന്ന ചിത്രത്തിൽ ഞാൻ ഒരു പുതുമുഖ നടിയെയാണ് തീരുമാനിച്ചിരുന്നത്. നാലഞ്ച് ദിവസം അവരെ വച്ച് സിനിമ എടുക്കുകയും ചെയ്തു. പക്ഷെ എനിക്ക് തൃപ്തി വന്നില്ല. ആ സമയത്ത് മീര തമിഴിലിലെല്ലാം സിനിമ ചെയ്യുന്നത് കാരണം ഭയങ്കര തിരക്കിലാണ്. എന്നിട്ടും ഞാൻ പറഞ്ഞപ്പോൾ മറ്റ് തിരക്കുകൾ എല്ലാം മാറ്റി വച്ച് മീര വന്നു. അത് നമ്മളോടുള്ള ഒരു സ്‌നേഹമാണ്.