പ്രമോഷന്‍ പരിപാടികളില്‍ നിരന്തരം പങ്കെടുത്ത് തന്റെ ആരോഗ്യാവസ്ഥ മോശമായി; പനി ബാധിച്ചതോടെ ശബ്ദം നഷ്ടപ്പെട്ടു; 'ശാകുന്തളം' പ്രമോഷന്‍ പരിപാടികള്‍ ഒഴിവാക്കി സാമന്ത

സാമന്തയുടെ 'ശാകുന്തളം' ഏപ്രില്‍ 14ന് തിയേറ്ററുകളില്‍ എത്തുകയാണ്. എന്നാല്‍ ചിത്രത്തിന്റെ പ്രമോഷന്‍ പരിപാടികളില്‍ സജീവമായിരുന്ന സാമന്ത ഇപ്പോള്‍ അതില്‍ നിന്നും വിട്ടു നില്‍ക്കുകയാണ്. എന്നാലിപ്പോഴിതാ പ്രമോഷന്‍ പരിപാടികളില്‍ നിരന്തരം പങ്കെടുത്ത് തന്റെ ആരോഗ്യാവസ്ഥ അല്‍പം കൂടി പ്രശ്‌നത്തിലായിരിക്കുന്നു വെന്നാണ് താരം സോഷ്യല്‍ മീഡിയിയലൂടെ അറിയിച്ചിരിക്കുന്നത്. പനിയാണെന്നും ശബ്ദം പോയിരിക്കുകയാണെന്നുമാണ് സാമന്ത ഒരു ട്വീറ്റിലൂടെ അറിയിച്ചിരിക്കുന്നത്. 

സിനിമയുടെ പ്രമോഷന്‍ പരിപാടികളില്‍ പങ്കെടുക്കുന്നതിലും അതിലുള്ള ജനപങ്കാളിത്തത്തിലും സന്തോഷം അറിയിച്ച സാമന്ത, ഇതിന് ശേഷമാണ് തിരക്ക് പിടിച്ച ദിനങ്ങള്‍ തന്റെ ആരോഗ്യത്തെ ബാധിച്ചിരിക്കുന്നു എന്നും അറിയിച്ചത്.  നിരവധി പേരാണ് ഈ ട്വീറ്റിന് താഴെ സാമന്തയ്ക്ക് സൗഖ്യമാശംസിച്ചിരിക്കുന്നത്.

''നിര്‍ഭാഗ്യവശാല്‍ തിരക്കേറിയ ഷെഡ്യൂളുകളും പ്രമോഷനുകളും എന്നെ ബാധിച്ചു, ഞാന്‍ പനി ബാധിതയാണ്. എന്റെ ശബ്ദം നഷ്ടപ്പെട്ടു'' എന്നാണ് സാമന്ത ട്വീറ്റ് ചെയ്തിരിക്കുന്നത്. അടുത്തിടെയാണ് മയോസൈറ്റിസ് എന്ന രോഗത്തില്‍ നിന്നും സാമന്ത സുഖം പ്രാപിച്ചത്.

സാമന്തയുടെ ആരോഗ്യനില പരിഗണിച്ച് സംവിധായകന്‍ ദില്‍ രാജു ബുധനാഴ്ച രാത്രി നടത്താനിരുന്ന ശാകുന്തളം സിനിമയുടെ പ്രീമിയര്‍ ഷോ റദ്ദാക്കിയെന്നും വിവരമുണ്ട്. എന്നാല്‍ ചൊവ്വാഴ്ച സിനിമയുടെ പ്രത്യേക സ്‌ക്രീനിംഗ് നടന്നിരുന്നു.

ഏതാനും ദിവസങ്ങള്‍ക്ക് മുമ്പ് സിനിമയുടെ പ്രമോഷനിടെ മാധ്യമങ്ങള്‍ ഒന്നിച്ച് ഫോട്ടോയും വീഡിയോയും എടുക്കാന്‍ ശ്രമിച്ചപ്പോള്‍ കണ്ണിലേക്ക് ലൈറ്റടിച്ചതിനെ തുടര്‍ന്ന് തനിക്കിത് താങ്ങാന്‍ കഴിയുന്നതല്ല എന്ന് താരം പരസ്യമായി പറഞ്ഞിരുന്നു. 'മയോസൈറ്റിസ്' രോഗത്തിന്റെ ഭാഗമായി കടുത്ത കണ്ണ് വേദന അനുഭവിക്കുന്നതായി താരം നേരത്തെ തന്നെ വ്യക്തമാക്കിയിരുന്നു. കണ്ണിനകത്ത് സൂചി കുത്തുന്നത് പോലുള്ള അനുഭവമാണെന്നും കണ്ണട വച്ചിരിക്കുന്നത് സ്‌റ്റൈലിന് അല്ലെന്നുമായിരുന്നു താരം അറിയിച്ചിരുന്നത്. എന്തായാലും ആരാധകരെല്ലാം തന്നെ പ്രിയതാരത്തിന്റെ ആരോഗ്യകാര്യങ്ങളില്‍ എപ്പോഴും അന്വേഷണങ്ങള്‍ നടത്തുകയും സ്‌നേഹമറിയിക്കുകയും ചെയ്യുന്നുണ്ട്. ഇത് സാമന്തയുടെ സോഷ്യല്‍ മീഡിയ പേജുകള്‍ കാണുമ്പോള്‍ തന്നെ വ്യക്തമാകും.

കാളിദാസന്റെ 'അഭിജഞാന ശാകുന്തളം' ആസ്പദമാക്കിയാണ് ശാകുന്തളം ഒരുക്കിയിരിക്കുന്നത്. ദേവ് മോഹന്‍ ആണ് ചിത്രത്തില്‍ ദുഷ്യന്ത്യന്‍ ആയി വേഷമിടുന്നത്. മലയാളം, കന്നഡ, ഹിന്ദി, തമിഴ്, തെലുങ്ക് ഉള്‍പ്പടെ അഞ്ച് ഭാഷകളില്‍ ഒരുങ്ങുന്ന ശാകുന്തളം ത്രീഡിയില്‍ ആണ് റിലീസ് ചെയ്യുക.

ശകുന്തള'യുടെ വീക്ഷണകോണില്‍ നിന്നുള്ളതായിരിക്കും ചിത്രം. അല്ലു അര്‍ജുന്റെ മകള്‍ അര്‍ഹ, സച്ചിന്‍ ഖേഡേക്കര്‍, കബീര്‍ ബേദി, ഡോ. എം മോഹന്‍ ബാബു, പ്രകാശ് രാജ്, മധുബാല, ഗൗതമി, അദിതി ബാലന്‍, അനന്യ നാഗല്ല, ജിഷു സെന്‍ഗുപ്ത എന്നിവരാണ് ചിത്രത്തില്‍ മറ്റ് കഥാപാത്രങ്ങളെ അവതരിപ്പിച്ചിരിക്കുന്നത്.