അയാള്‍ നടനല്ല..! മഹാനടനാണ്; മക്കള്‍ സെല്‍വനെ വാഴ്ത്തി രജനികാന്തിന്റെ പ്രസംഗം; എഴുനേറ്റ് നിന്ന് നന്ദി അറിയിച്ച് വിജയ് സേതുപതിയും 

രജനികാന്ത് ചിത്രം 2.0 ക്ക് ശേഷം സൂപ്പര്‍ സ്റ്റാര്‍ രജനികാന്ത് നായകനായി എത്തുന്ന അടുത്ത ചിത്രമാണ് പേട്ട. ചിത്രത്തിന്റെ ഓഡിയോ ലോഞ്ചില്‍ രജനികാന്ത്, വിജയ് സേതുപതി എന്നിവരവരുടെ സാന്നിധ്യത്തില്‍ വിപുലമായ പരിപാടികളോടെയാണ് നടന്നത്. ചടങ്ങില്‍ വിജയ് സേതുപതിയെ വാഴ്ത്തി രജനികാന്ത് പറഞ്ഞ ഡയലോഗും ഇതിന് മക്കള്‍ സെല്‍വന്‍ നല്‍കിയ മറുപടിയുമാണ് വൈറലായത്.

ഷോര്‍ട്ട് ഫിലിമുകളിലൂടെ സിനിമ ലോകത്തെത്തിയ കാര്‍ത്തിക്ക് സുബ്ബരാജ് സംവിധാനം ചെയ്യുന്ന പേട്ടയില്‍ രജനിക്കൊപ്പം വില്ലനായി വിജയ് സേതുപതി എത്തുന്നു എന്ന വാര്‍ത്ത തമിഴകത്തെ പോലെ തന്നെ കേരളവും ആഘോഷമാക്കിയിരുന്നു. രജനി സിനിമയില്‍ വിജയ് സേതുപതി എത്തുന്നത് വില്ലന്‍ വേഷത്തിലാണ്. ചിത്രത്തിന്റെ ഓഡിയോ ലോഞ്ച് കഴിഞ്ഞദിവസമാണ് നടന്നത്. ഓഡിയോ ലോഞ്ചിനിടെ ആരാധകരെ കോരിത്തരിപ്പിച്ച് രജനി നടത്തിയ പ്രസംഗമാണ് വൈറലായി മാറിയിരിക്കുന്നത്. 

'വിജയ് സേതുപതി ജിത്തു എന്ന നെഗറ്റീവ് ടച്ചുള്ള കഥാപാത്രത്തെയാണ് അവതരിപ്പിക്കുന്നത്. കാര്‍ത്തിക് എന്നോട് ഈ ചിത്രത്തിന്റെ കഥ പറയുമ്പോള്‍ ഞാന്‍ ആദ്യം ചോദിച്ചത് ജിത്തു എന്ന കഥാപാത്രം ആരാണ് ചെയ്യുന്നതെന്നാണ്. അതിന് കാര്‍ത്തിക് തന്ന മറുപടി 'വിജയ് സേതുപതി' എന്നാണ്. ഞാന്‍ എന്താണോ പ്രതീക്ഷിച്ചത് അതിന് മുകളില്‍ ആ കഥാപാത്രത്തെ വിജയ് അനശ്വരമാക്കി. ഒരു കാര്യം മാത്രം പറയാം. വിജയ് സേതുപതി ഒരു നടനല്ല. മഹാനടനാണ്. ഒരു സംശയവുമില്ല'.-രജനി പറഞ്ഞു. രജനിയുടെ വാക്കുകള്‍ക്ക് നന്ദി പൂര്‍വം വിജയ് ഏഴുനേറ്റ് നിന്ന് അദ്ദേഹത്തെ കൈകൂപ്പു തൊഴുകയും ചെയ്തു. 

വേദിയിലേക്ക് വിജയ് സേതുപതി എത്തിയപ്പോള്‍ ലഭിച്ച സ്വീകരണവും ആരാധകരുടെ ആര്‍പ്പുവിളിയും എല്ലാവരെയും അക്ഷരാര്‍ഥത്തില്‍ അമ്പരപ്പിച്ചു. വിജയ് സേതുപതി എത്തിയപ്പോള്‍ എഴുന്നേറ്റ് നിന്നാണ് രജനി അദ്ദേഹത്തെ സ്വീകരിച്ചത്. ചിത്രത്തില്‍ ഒരു വലിയ താര നിര തന്നെയാണ് എത്തുന്നത്. നവാസുദിന്‍ സിദ്ദിഖി, വിജയ് സേതുപതി, സിമ്രാന്‍, തൃഷ, ശശികുമാര്‍ തുടങ്ങിയവരും ചിത്രത്തിന്റെ ഭാഗമാകുന്നു. 

ചിത്രത്തിന്റെ ആദ്യ പോസ്റ്ററുകള്‍ക്കും രജനികാന്തിന്റെ മനംമയക്കുന്ന ലുക്കിനും വലിയ സ്വീകരമാണ് ലഭിച്ചത്. അനിരുദ്ധ് ഈണമിട്ട ചിത്രത്തിലെ ഡപ്പാം കൂത്ത് നമ്പറും സോഷ്യല്‍ ലോകത്ത് വൈറലായിരുന്നു. സണ്‍ പിക്ചേഴ്സ് നിര്‍മിക്കുന്ന ചിത്രം അടുത്ത വര്‍ഷം പൊങ്കലിന് തിയറ്ററുകളില്‍ എത്തും.