റെഡ് സിഗ്നല്‍ മറികടന്നെത്തിയ ട്രക്ക് കാറില്‍ ഇടിച്ചു; കെജിഎഫ് താരം അവിനാഷ് രക്ഷപ്പെട്ടത് തലനാരിഴയ്ക്ക്; ബാംഗ്ലൂരില്‍ നടന്ന അപകടം നടന്‍ ജിമ്മിലേക്ക് പോകുമ്പോള്‍

പ്രശസ്ത കന്നഡ ചലച്ചിത്ര താരം ബി.എസ് അവിനാഷിന്റെ കാര്‍ ട്രക്കുമായി കൂട്ടിയിടിച്ചു അപകടം. കെ.ജി.എഫ് എന്ന ചിത്രത്തിലൂടെ ശ്രദ്ധേയനായ താരമാണ് അവിനാഷ്. അപകടത്തില്‍ നിന്ന് അത്ഭുതകരമായി നടന്‍ രക്ഷപ്പെട്ടു.ബംഗളൂരുവില്‍ വെച്ചാണ് അദ്ദേഹത്തിന്റെ മെഴ്സിഡസ് ബെന്‍സ് കാര്‍ അപകടത്തില്‍പ്പെട്ടത്..

കഴിഞ്ഞ ദിവസം രാവിലെ ആറു മണിയോടെയായിരുന്നു അപകടം. ജിമ്മിലേക്ക് പോകുകയായിരുന്ന നടന്റെ കാര്‍ അനില്‍ കുംബ്ലെ സര്‍ക്കിളില്‍ വച്ച് അപകടത്തില്‍ പ്പെടുകയായിരുന്നു.പ്രഭാതസവാരിക്ക് എത്തിയവരാണ് താരത്തെ കാറില്‍നിന്ന് പുറത്തെത്തിച്ചത്. ട്രക്ക് ഡ്രൈവറെ പൊലീസ് കസ്റ്റഡിയിലെടുത്തു. 

റെഡ് സിഗ്‌നല്‍ മറികടന്ന് എത്തിയ ട്രക്ക് കാറില്‍ ഇടിക്കുകയായിരുന്നു എന്ന് അവിനാഷ് പറഞ്ഞു. അപകടത്തില്‍ തനിയ്ക്ക് പരിക്കേറ്റിട്ടില്ലെന്നും കാറിന്റെ ബോണറ്റിന് മാത്രമാണ് കേടുപാടുകള്‍ സംഭവിച്ചതെന്നും അവിനാഷ് അറിയിച്ചു. കുടുംബത്തിനും ആരാധകര്‍ക്കും പോലീസിനുമെല്ലാം അദ്ദേഹം നന്ദി പറയുകയും ചെയ്തു. 

യാഷ് നായകനായെത്തിയ സൂപ്പര്‍ ഹിറ്റ് ചിത്രം കെജിഎഫില്‍ അവിനാഷ് പ്രധാന വേഷത്തില്‍ എത്തിയിരുന്നു. കെജിഎഫ്, കെജിഎഫ് ചാപ്റ്റര്‍ 2 എന്നീ ചിത്രങ്ങളില്‍ ആന്‍ഡ്രൂ എന്ന കഥാപാത്രമായാണ് അവിനാഷ് എത്തിയത്. രണ്ട് ചിത്രങ്ങളിലും നിര്‍ണായകമായ വേഷമായിരുന്നു അവിനാഷിന്റെ ആന്‍ഡ്രൂ.