'ഇരയും കുറ്റവാളിയും ഇതിഹാസവും'; ശക്തമായ സ്ത്രീ കഥാപാത്രവുമായി അനുഷ്‌ക ഷെട്ടി; 'ഘാട്ടി'യുടെ ഫസ്റ്റ് ഗ്ലിംപ്‌സ് വീഡിയോ പുറത്ത് 

തെന്നിന്ത്യന്‍ പ്രേക്ഷകരുടെ പ്രിയ താരമാണ് അനുഷ്‌ക ഷെട്ടി. തെലുങ്കില്‍ വീണ്ടുമൊരു തിരിച്ചു വരവിനൊരുങ്ങുകയാണ് താരമിപ്പോള്‍. അനുഷ്‌കയുടെ ആരാധകര്‍ക്ക് ആവേശം നല്‍കുന്ന വാര്‍ത്തയാണ് താരത്തിന്റെ പിറന്നാള്‍ ദിനത്തില്‍ പുറത്ത് വന്നത്. 'ഘാട്ടി' എന്ന വരാനിരിക്കുന്ന ചിത്രത്തിന്റെ ഫസ്റ്റ് ലുക്ക് വീഡിയോ ആണ് ഇപ്പോള്‍ സമൂഹ മാധ്യമങ്ങളില്‍ ശ്രദ്ധ നേടുകയാണ്. കൃഷ് സംവിധാനം ചെയ്യുന്ന ചിത്രം യുവി ക്രിയേഷന്‍സിന്റെ ബാനറില്‍ രാജീവ് റെഡ്ഡിയും സായ് ബാബുവും ചേര്‍ന്നാണ് നിര്‍മ്മിക്കുന്നത്. 

ബ്ലോക്ക്ബസ്റ്റര്‍ ഹിറ്റായ 'വേദം' എന്ന ചിത്രത്തിന് ശേഷം അനുഷ്‌കയും കൃഷും ഒന്നിക്കുന്ന ചിത്രം കൂടിയാണിത്. 45 സെക്കന്‍ഡ് ദൈര്‍ഘ്യമുള്ള വീഡിയോ ആണ് പുറത്ത് വന്നത്. 'ഇരയും കുറ്റവാളിയും ഇതിഹാസവുമായ ഒരു സ്ത്രീയുടെ കഥ' എന്ന ടാഗ് ലൈനാണ് വീഡിയോയ്ക്ക് അണിയറ പ്രവര്‍ത്തകര്‍ നല്‍കിയിരിക്കുന്നത്. 

ശക്തമായ കഥാപാത്രവുമായാണ് താരം എത്തുന്നത്. ബിഗ് ബഡ്ജറ്റില്‍ ഒരുങ്ങുന്ന ചിത്രം തെലുങ്ക്, തമിഴ്, കന്നഡ, മലയാളം, ഹിന്ദി ഭാഷകളിലാണ് പുറത്തിറങ്ങുന്നത്. മനോജ് റെഡ്ഡി കടസാനി ഛായാഗ്രഹണം നിര്‍വഹിക്കുന്ന ചിത്രത്തിന്റെ എഡിറ്റര്‍ ചാണക്യ റെഡ്ഡി തുരുപ്പു ആണ്. നാഗവെല്ലി വിദ്യാ സാഗര്‍ സംഗീത സംവിധായകന്‍.