എടാ..നീ ..ഞാൻ വിചാരിച്ചു ഇവൻ എനിക്ക് തരാൻ ആണെന്ന്; സുരേഷ് കുമാർ കേക്ക് കൊടുക്കാഞ്ഞതിൽ പരിഭവുമായി ലാലേട്ടൻ; അമ്മയുടെ ഇരുപത്തിയഞ്ചാം വാർഷികം ആഘോഷിക്കുന്ന താരങ്ങളുടെ വീഡിയോ വൈറൽ

താരസംഘടനയായ അമ്മയുടെ ഇരുപത്തിയഞ്ചാം വാർഷിക ആഘോഷം കഴിഞ്ഞ ദിവസം കൊച്ചിയിൽ നടന്നു. നിർമ്മാതാക്കളും അമ്മ ഭാരവാഹികളും ചേർന്നാണ് 'അമ്മ'യുടെ ജന്മദിനം ആഘോഷിച്ചത്. ആഘോഷവേളയ്ക്കിടിയിലെ രസകരമായ വീഡിയോ ആണ് ഇപ്പോൾ സോഷ്യൽമീഡിയയിൽ വൈറലാകുന്നത്.

തനിക്ക് കേക്ക് തരാത്തതിൽ പരാതി പറയുന്ന മോഹൻലാൽ ആണ് വിഡിയോയിൽ ഉള്ളത്. നിർമ്മാതാവും സുഹൃത്തുമായ സുരേഷ് കുമാറിനോടാണ് നടൻ പരിഭവം പറയുന്നത്. ഇതിന്റെ വീഡിയോ മോഹൻലാൽ അദ്ദേഹത്തിന്റെ ഫേസ്‌ബുക്ക് പേജിൽ പങ്കുവെച്ചിട്ടുണ്ട്.

മോഹൻലാൽ, സുരേഷ് കുമാർ, ബാബുരാജ്, ടിനി ടോം, രചന നാരായണൻകുട്ടി, എന്നിങ്ങനെ മലയാള സിനിമയിലെ പ്രമുഖരെല്ലാം വാർഷികാഘോഷവേളയിൽ ഒത്തുകൂടി സന്തോഷസൂചകമായി കേക്ക് മുറിക്കുകയായിരുന്നു. രചന, ലാലിനും ബാബുരാജിനും കേക്ക് വായിൽ വെച്ചുകൊടുത്തു. തുടർന്ന് സുരേഷ് കുമാർ കേക്ക് മുറിക്കുന്നത് കണ്ട മോഹൻലാൽ തനിക്കുള്ള കേക്ക് പ്രതീക്ഷിച്ച് നിന്നു.

എന്നാൽ സുരേഷ് കുമാർ സ്വന്തം വായിലേക്കു തന്നെ കേക്ക് വയ്ക്കുന്നത് കണ്ട മോഹൻലാൽ നിരാശനായി. 'എടാ..നീ ..ഞാൻ വിചാരിച്ചു ഇവൻ എനിക്ക് തരാൻ ആണെന്ന്' ലാൽ കൂടെയുണ്ടായിരുന്നവരോട് പറയുകയും ആ കമന്റ് ചിരിപടർത്തുകയും ചെയ്തു. ഏതായാലും തന്റെ ആത്മസുഹൃത്തിന്റെ നിരാശ കണ്ട സുരേഷ് കുമാർ ഉടൻ തന്നെ മോഹൻലാലിന്റെ വായിലേക്ക് കേക്ക് വെച്ചുകൊടുത്തു.