കമല്‍ഹാസന് പിന്മാറിയ തമിഴ് ബിഗ് ബോസിലേക്ക് പകരമെത്തുക നയന്‍താരയോ? അവതാരകയാകാന്‍ എന്‍ഡമോള്‍ ഷൈന്‍ ഗ്രൂപ്പ് നടിയെ സമീപിച്ചു; പ്രതിഫലം 130 കോടി രൂപയെന്നും സൂചന

ജനപ്രിയ റിയാലിറ്റി ഷോ ആയ ബിഗ് ബോസിന്റെ തമിഴ് പതിപ്പിന്റെ അവതാരക സ്ഥാനത്തുനിന്ന് ഒഴിവാകുന്ന കാര്യം ചലച്ചിത്രതാരം കമല്‍ ഹാസന്‍ ആഗസ്റ്റ് ആറിനാണ് അറിയിച്ചത്. 2017 ല്‍ ആരംഭിച്ച ആദ്യ സീസണ്‍ മുതല്‍ ഈ വര്‍ഷം ജനുവരിയില്‍ അവസാനിച്ച ഏഴാം സീസണ്‍ വരെ ബിഗ് ബോസ് തമിഴ് പതിപ്പില്‍ കമല്‍ ഹാസന്‍ മാത്രമാണ് അവതാരകനായി എത്തിയിട്ടുള്ളത്. 

സോഷ്യല്‍ മീഡിയയിലൂടെ പുറത്തിറക്കിയ കത്തിലൂടെയാണ് കമല്‍ ഇക്കാര്യം അറിയിച്ചത്. 7 വര്‍ഷം മുന്‍പു തുടങ്ങിയ ആ യാത്രയില്‍ നിന്നും ഞാനൊരു ബ്രേക്ക് എടുക്കുന്നു. മുന്‍പു ഏറ്റെടുത്ത ചില സിനിമകള്‍ പൂര്‍ത്തിയാക്കാന്‍ ഉള്ളതിനാല്‍ ബിഗ് ബോസ് സീസണ്‍ 8 ല്‍ തനിക്ക് അവതാരകനാകാന്‍ സാധിക്കില്ല', എന്നാണ് കമല്‍ഹാസന്‍ ആരാധകരെ അറിയിച്ചത്. സൂപ്പര്‍ താരത്തിന്റെ തീരുമാനം ആരാധകരില്‍ വലിയ ആഘാതമാണ് ഉണ്ടാക്കിയിരിക്കുന്നത്. 

എന്നാല്‍ കമല്‍ഹാസന്റെ ഈ തീരുമാനത്തിന് പിന്നാലെ കമലിന് പകരം ഇനി ആര് എന്ന ചോദ്യമാണ് ആരാധകര്‍ ഉറ്റുനോക്കുന്നത്. നടന്‍ ശരത് കുമാറിന്റെ പേര് ഉയര്‍ന്ന് വരുന്ന സാഹചര്യത്തില്‍ നടി നയന്‍താരയുടെയും പേര് വരുന്നുണ്ട്. ഷോയുടെ അവതാരകയാകാന്‍ പ്രൊഡക്ഷന്‍ കമ്പനിയായ എന്‍ഡമോള്‍ ഷൈന്‍ ഗ്രൂപ്പ് താരത്തെ സമീപിച്ചിട്ടുണ്ടെന്നാണ് റിപ്പോര്‍ട്ടുകള്‍. എന്നാല്‍ ഇക്കാര്യത്തില്‍ ഔദ്യോഗിക സ്ഥിരീകരണമൊന്നുമില്ല.

അതേസമയം നയന്‍താര എത്തിയാല്‍ നടിയ്ക്ക് കൂടുതല്‍ പ്രതിഫലവും നല്‍കേണ്ടി വരും. തമിഴില്‍ ഏറ്റവും കൂടുതല്‍ പ്രതിഫലം വാങ്ങുന്ന നടിയാണ് നയന്‍സ്. കഴിഞ്ഞ ബിഗ് ബോസ് സീസണിന് 130 കോടിയായിരുന്നു കമല്‍ഹാസന്‍ വാങ്ങിയ പ്രതിഫലം എന്നായിരുന്നു റിപ്പോര്‍ട്ടുകള്‍. നയന്‍താര വരുന്നതോടെ ഏകദേശം ഇത്രയൊക്കെ തന്നെ പ്രതിഫലം നടിയ്ക്കും നല്‍കേണ്ടതായി വരുമെന്നാണ് ആരാധകര്‍ പറയുന്നത്.

വിവാഹശേഷം കുടുംബത്തിനാണ് നയന്‍താര ഏറ്റവും കൂടുതല്‍ പ്രധാന്യം കൊടുക്കുന്നത്. മക്കള്‍ കൂടി വന്നതോടെ അവര്‍ക്കൊപ്പം സമയം ചിലവഴിക്കുന്നതിനാലാണ് നയന്‍താര സന്തോഷം കണ്ടെത്തുന്നത്. അതിനാല്‍ സിനിമകളുടെ കാര്യത്തില്‍ പോലും നയന്‍താര വളരെ സെലക്ടീവാണ്. 

നിരവധി കാഴ്ചക്കാരുള്ള ടെലിവിഷന്‍ റിയാലിറ്റി ഷോയാണ് ബിഗ് ബോസ്. ഹിന്ദിയില്‍ ആരംഭിച്ച പരിപാടി ഇന്ന് കന്നഡ,തമിഴ് , മലയാളം, തെലുങ്ക് തുടങ്ങി നിരവധി ഭാഷകളില്‍ പ്രദര്‍ശിപ്പിക്കുന്നുണ്ട്. എല്ലാ ഭാഷയിലും അവിടുത്തെ സൂപ്പര്‍ താരങ്ങളാണ് അവതാരകരായി എത്തുന്നത്. ഇതിനായി ഇവര്‍ വാങ്ങുന്ന തുകയും ഭീമമാണ്. ഹിന്ദിയില്‍ സല്‍മാന്‍ ഖാന്‍, തമിഴില്‍ കമല്‍ഹാസന്‍, മലയാളത്തില്‍ മാഹന്‍ലാല്‍, കന്നഡയില്‍ കിച്ച സുദീപ്, തെലുങ്കില്‍ നാഗാര്‍ജുന അക്കിനേനി എന്നിവരാണ് അവതാരകരായി എത്തുന്നത്.

ഇടയ്ക്ക് കമലിന്റെ ഔദ്യോഗിക തിരക്കുകള്‍ക്കിടയില്‍ ചില എപ്പിസോഡുകള്‍ ചിമ്പുവും, രമ്യകൃഷ്ണനും ബിഗ് ബോസ് അവതാരകരായി എത്തിയിരുന്നു. കമലിന് പകരം ആരായിരിക്കും തമിഴ് ബിഗ് ബോസ് എട്ടാം സീസണ്‍ അവതരിപ്പിക്കുക എന്ന ചോദ്യമാണ് ഇപ്പോള്‍ ഉയരുന്നത്.