അമ്പതിനായിരം രൂപ കൊടുത്താല്‍ വോട്ട് വാങ്ങാമെന്ന് അനുമോള്‍ പറഞ്ഞു; ഞങ്ങളെ കണ്ടാല്‍ ബെഡ്‌റൂം സീന്‍..എങ്ങനെയായിരിക്കും എന്ന് മാത്രം ചിന്തിക്കുന്നവര്‍; വീട്ടില്‍ അവശേഷിക്കുന്ന പങ്കാളിയില്‍ പ്രതീക്ഷ;ബിഗ് ബോസിലെ എവിക്ഷന്‍ പൊട്ടിത്തെറിയില്‍ ഔട്ടായ ആദില പങ്ക് വച്ചത്

ബിഗ് ബോസ് മലയാളം സീസണ്‍ 7ല്‍ നിന്നും ഒരു മത്സരാര്‍ത്ഥി കൂടി പുറത്തായിരിക്കുകയാണ്. ഗ്രാന്റ് ഫിനാലേക്ക് മുന്നോടിയായുള്ള മിഡ് വീക്ക് എവിക്ഷനിലൂടെ ആദിലയാണ് പുറത്തായിരിക്കുന്നത്.  സീസണ്‍ അവസാനിക്കാന്‍ ദിവസങ്ങള്‍ മാത്രം ബാക്കി നില്‍ക്കെ,  ലെസ്ബിയന്‍ ദമ്പതികളായ ആദിലയും നൂറയും പ്രേക്ഷകശ്രദ്ധ നേടിയിരുന്നു. ഇതിനിടെ, ഹൗസില്‍ നിന്ന് പുറത്തായ ആദിലയുടെ അഭിമുഖം പല വിഷയങ്ങള്‍ക്കും വെളിച്ചം വീശിയിരിക്കുകയാണ്. 

ഏറെ നാളത്തെ കാത്തിരിപ്പിന് ശേഷം, തൊണ്ണൂറ് ദിവസത്തിലേറെ ബിഗ് ബോസ് ഹൗസില്‍ നിന്ന ശേഷമാണ് ആദില പുറത്തായത്. ഷോയില്‍ ഇത്രയും നാള്‍ നില്‍ക്കാന്‍ കഴിയുമെന്ന് പ്രതീക്ഷിച്ചിരുന്നില്ലെന്ന് അവര്‍ പ്രതികരിച്ചു. പുറത്തായതിന് പിന്നാലെ ഒരു പ്രമുഖ ചാനലിന് നല്‍കിയ അഭിമുഖത്തിലാണ് ആദില തന്റെയും നൂറയുടെയും അനുഭവങ്ങളും മറ്റ് മത്സരാര്‍ത്ഥികളെക്കുറിച്ചുമുള്ള അഭിപ്രായങ്ങളും പങ്കുവെച്ചത്. 

ബിഗ് ബോസ് ഹൗസില്‍ ഏറ്റവും കൂടുതല്‍ നാടകീയത കാണിക്കുന്നയാള്‍ അനുമോളാണെന്നും, ഷാനവാസ് ആണ് ഡ്രാമ കിംഗ് എന്നും ആദില അഭിപ്രായപ്പെട്ടു. തന്റെ നിരീക്ഷണത്തില്‍ അനുമോളായിരിക്കും ഈ സീസണിലെ വിജയി എന്നും അവര്‍ വ്യക്തമാക്കി. ഇതിനുള്ള കാരണം അനുമോള്‍ക്ക് ശക്തമായ 'പി.ആര്‍' (Public Relations) ഉണ്ടെന്നതാണ്. തിരഞ്ഞെടുപ്പ് ജനങ്ങളുടെ കൈകളിലും പി.ആറിന്റെ കൈകളിലുമാണെന്നും, അമ്പതിനായിരം രൂപ കൊടുത്താല്‍ വോട്ട് വാങ്ങാമെന്ന് അനുമോള്‍ തന്നോട് പറഞ്ഞിരുന്നതായും ആദില വെളിപ്പെടുത്തി. 

എന്നാല്‍, അത്തരം കാര്യങ്ങളിലേക്ക് ഇനി കടക്കുന്നില്ലെന്നും, ഉള്ളതുപോലെ ഫലം വരട്ടെ എന്നും അവര്‍ കൂട്ടിച്ചേര്‍ത്തു. ഷാനവാസ് രണ്ടാമതെത്തുമെന്നും, കോമണറായ അനീഷ് മൂന്നാമതും നൂറ നാലാമതുമെത്തുമെന്നുമാണ് തന്റെ പ്രതീക്ഷയെന്നും ആദില കൂട്ടിച്ചേര്‍ത്തു. 

തങ്ങളോടുള്ള ആളുകളുടെ മനോഭാവത്തില്‍ മാറ്റമുണ്ടായെന്ന് കരുതുന്നതായും ആദില പറഞ്ഞു. ബിഗ് ബോസ് ഹൗസില്‍ തങ്ങള്‍ക്കുള്ള കാര്യങ്ങള്‍ തുറന്നുപറഞ്ഞിട്ടുണ്ടെന്നും, ഇരുപത്തിനാല് മണിക്കൂറും ആളുകള്‍ തന്നെയും നൂറയെയും വീക്ഷിച്ചെന്നും അവര്‍ ഓര്‍മ്മിപ്പിച്ചു. തങ്ങള്‍ക്കൊരു സ്വാധീനം ചെലുത്താനായെന്ന് കരുതുന്നു. ആളുകള്‍ തന്നെയും നൂറയെയും കണ്ടിരുന്നത്, 

'ഇവരെങ്ങനെയാണ് ഒരുമിച്ച് ജീവിക്കുന്നത്, ബെഡ്‌റൂമില്‍ എങ്ങനെയാണെന്നൊക്കെയായിരുന്നു ചിന്തിച്ചിരുന്നത്'. അതിനപ്പുറമുള്ള സ്‌നേഹത്തെക്കുറിച്ചോ മറ്റ് കാര്യങ്ങളെക്കുറിച്ചോ അവര്‍ ചിന്തിച്ചിരുന്നില്ല. എന്നാല്‍, തങ്ങള്‍ മറ്റ് ദമ്പതികളെപ്പോലെയാണെന്ന് ഇപ്പോള്‍ ആളുകള്‍ക്ക് മനസിലായിട്ടുണ്ടെന്നാണ് തോന്നുന്നതെന്നും ആദില പറഞ്ഞു. ലെസ്ബിയന്‍ എന്നതുകൊണ്ട് ഒരാള്‍ മുടിവെട്ടി ആണിനെപ്പോലെയാകണമെന്നൊക്കെയുള്ള ചിലരുടെ ധാരണകളില്‍ മാറ്റം വന്നിട്ടുണ്ടെന്നും അവര്‍ കൂട്ടിച്ചേര്‍ത്തു. 

തുടക്കത്തില്‍ ഒറ്റ മത്സരാര്‍ത്ഥിയായിട്ടായിരുന്നു ആദിലയും നൂറയും ബിഗ് ബോസ് ഹൗസില്‍ പ്രവേശിച്ചത്. പിന്നീട് ഇരുവരെയും രണ്ട് മത്സരാര്‍ത്ഥികളായി പരിഗണിക്കുകയായിരുന്നു. ഇരുവരും ഹൗസിനകത്ത് ഒരുമിച്ച് കഴിഞ്ഞത് പ്രേക്ഷകരില്‍ വലിയ ചര്‍ച്ചകള്‍ക്ക് വഴിവെച്ചിരുന്നു. ഇരുവരുടെയും വ്യക്തിജീവിതത്തെക്കുറിച്ചും ലൈംഗിക ആഭിമുഖ്യത്തെക്കുറിച്ചും നിരവധി സംശയങ്ങളും അഭിപ്രായങ്ങളും സോഷ്യല്‍ മീഡിയയില്‍ ഉയര്‍ന്നുവന്നിരുന്നു. 

എന്നാല്‍, തങ്ങളുടെ ജീവിതത്തെക്കുറിച്ചും സ്‌നേഹത്തെക്കുറിച്ചും തുറന്നുപറഞ്ഞ് ഈ ധാരണകളെ തിരുത്താന്‍ ആദിലയ്ക്കും നൂറയ്ക്കും സാധിച്ചുവെന്ന നിരീക്ഷണങ്ങളും പുറത്തുവരുന്നുണ്ട്. ഈ സീസണിലെ മത്സരാര്‍ത്ഥികളില്‍ നിന്ന് ബിഗ് ബോസ് ഹൗസിലെ അനുഭവങ്ങളെക്കുറിച്ച് പുറത്തുവരുന്ന ഇത്തരം തുറന്നുപറച്ചിലുകള്‍ പ്രേക്ഷക ശ്രദ്ധ നേടുകയാണ്.