ബോളിവുഡില്‍ തിളങ്ങി നില്ക്കുന്ന താരമാണ് വിദ്യ ബാലന്‍. ഇപ്പോഴിതാ ഓപ്പണ്‍ റിലേഷന്‍ഷിപ്പിനെക്കുറിച്ച് വിദ്യ പറഞ്ഞ വാക്കുകളാണ് സോഷ്യല്‍ മീഡിയ ഏറ്റെടുക്കുന്നത്. മിക്ക കമന്റുകളും താരത്തെ പരിഹസിച്ചാണ് വരുന്നത്.ജന്മം കൊണ്ട് മലയാളിയാണെങ്കിലും ബോളിവുഡില്‍ തന്റേതായ സ്ഥാനം ഉറപ്പിച്ച താരറാണിയാണ് വിദ്യ ബാലന്‍.
ബോളിവുഡിലെ മുന്‍നിര നായികയാണെങ്കിലും സ്വകാര്യ ജീവിതത്തില്‍ വിദ്യ ബാലന്‍ എന്നും സ്വകാര്യത കാത്തു സൂക്ഷിക്കാറുണ്ട്. ഭര്‍ത്താവ് സിദ്ധാര്‍ത്ഥ് റോയ് കപൂറിനൊപ്പം പോലും അപൂര്‍വമായേ വിദ്യയേ പൊതുവിടങ്ങളില്‍ കാണാറുള്ളൂ. സോഷ്യല്‍ മീഡിയയില്‍ ഭര്‍ത്താവിനൊപ്പമുള്ള ഫോട്ടോകള്‍ വിദ്യ പങ്കുവയ്ക്കുന്നതും കുറവാണ്.
2012 ലാണ് നിര്‍മ്മാതാവ് കൂടിയായ സിദ്ധാര്‍ത്ഥ് റോയ് കപൂറിനെ വിദ്യ ബാലന്‍ വിവാഹം ചെയ്തത്. ഇരുവരും പ്രണയത്തിലായിരുന്നു. താന്‍ വിവാഹിതയാകുമെന്ന് കരുതിയിരുന്നില്ലെന്നും എന്നാല്‍ സിദ്ധാര്‍ത്ഥ് ജീവിതത്തിലേക്ക് കടന്ന് വന്നതോടെ എല്ലാം മാറിയെന്നാണ് വിദ്യ ബാലന്‍ ഒരിക്കല്‍ പറഞ്ഞത്.ഭര്‍ത്താവ് നിര്‍മാതാവാണെങ്കിലും അദ്ദേഹത്തിന്റെ പ്രൊഡക്ഷനില്‍ സിനിമ ചെയ്യാന്‍ വിദ്യ താല്‍പര്യപ്പെടുന്നില്ല. കരിയറിലെ നേട്ടങ്ങള്‍ക്ക് കാരണം നിര്‍മാതാവിന്റെ ഭാര്യയായതാണെന്ന് ആരും പറയരുതെന്ന വിദ്യയുടെ തീരുമാനവും ഇതിന് പിന്നിലുണ്ട്.
ഇപ്പോഴിതാ ഓപ്പണ്‍ റിലേഷന്‍ഷിപ്പിനെതിരെ വിദ്യ ബാലന്‍ പറഞ്ഞ വാക്കുകളാണ് ശ്രദ്ധ നേടുന്നത്. തനിക്ക് അംഗീകരിക്കാന്‍ പറ്റാത്ത കാര്യമാണിതെന്ന് വിദ്യ പറയുന്നു.
'ഓപ്പണ്‍ റിലേഷന്‍ഷിപ്പ് എന്ന ആശയത്തെ എനിക്ക് മനസിലാകുന്നില്ല. എല്ലാത്തിലും പരസ്പരം ഓപ്പണാകാം. പക്ഷെ ഓപ്പണ്‍ റിലേഷന്‍ഷിപ്പില്‍ പങ്കാളി മറ്റാെരാളുടെ ഒപ്പമാകുന്നതില്‍ നിങ്ങള്‍ക്ക് കുഴപ്പമില്ല. ആരെങ്കിലുമായി പങ്കാളിയെ പങ്കുവെക്കുന്നു. ഞാനതിന് ഓക്കെയല്ല. ഞാന്‍ മോണോഗമിയില്‍ വിശ്വസിക്കുന്നു. പങ്കാളിയുമായി നിങ്ങള്‍ എത്രത്തോളം സെക്യൂറായാലും പങ്കാളി മറ്റൊരാള്‍ക്കൊപ്പം ഇരിക്കുന്നെന്ന ചിന്തപോലും എന്നെ ദേഷ്യപ്പെടുത്തുന്നു.
ഓപ്പണ്‍ റിലേഷന്‍ഷിപ്പ് എന്ന സങ്കല്‍പ്പത്തെ ഞാന്‍ തിരസ്‌കരിക്കുന്നു. നിങ്ങള്‍ക്കത് വര്‍ക്ക് ചെയ്യുന്നുണ്ടെങ്കില്‍ ഓക്കെ. ഞാന്‍ വളരെ ഇമോഷണലും പൊസസീവുമാണ്...'' വിദ്യ പറയുന്നു.
എന്നാല്‍ താരത്തിന്റെ പരാമര്‍ശം വൈറലായതോടെ സോഷ്യല്‍ മീഡിയയില്‍ പല കമന്റുകളും വരുന്നുണ്ട്. വിദ്യയുടെ അഭിപ്രായത്തോട് നിരവധി പേര്‍ യോജിച്ചു.
പക്ഷേ ചിലര്‍ താരത്തെ പരിഹസിക്കുകയും ചെയ്യുന്നുണ്ട്. 'അത്രയ്ക്ക് കാര്‍ക്കശ്യം വേണോ, നിങ്ങളുടെ ഭര്‍ത്താവ് നേരത്തെ രണ്ട് തവണ വിവാഹം ചെയ്തതല്ലേ, ഇത്രയും ഉയര്‍ന്ന മാനദണ്ഡങ്ങളുള്ള വിദ്യ എന്തിനാണ് മൂന്നാം ഭാര്യയായത്, ഭര്‍ത്താവ് പോളിഗാമിയിലാണ് വിശ്വസിക്കുന്നതെന്ന് തോന്നുന്നു...' എന്നിങ്ങനെ പോകുന്നു പരിഹാസ കമന്റുകള്‍.
വിവാഹമോചിതനായ ശേഷമാണ് സിദ്ധാര്‍ത്ഥ് വിദ്യയെ വിവാഹം ചെയ്യുന്നത്. ഇതും ഓപ്പണ്‍ റിലേഷന്‍ഷിപ്പും തമ്മില്‍ താര്യതമ്യം ചെയ്യാനാകില്ലെന്ന് ഇവര്‍ ചൂണ്ടിക്കാട്ടി. അഭിമുഖത്തില്‍ തന്റെ വിവാഹ ജീവിതത്തെക്കുറിച്ചും വിദ്യ സംസാരിക്കുന്നു. ''12 വര്‍ഷത്തോളമായി ഞാന്‍ വിവാഹിതയാണ്. ഈ വര്‍ഷങ്ങളിലൂടെ ഞാന്‍ മനസിലാക്കിയത് വിവാഹജീവിതത്തിലെ ഏറ്റവും പ്രധാനപ്പെട്ട കാര്യം എന്താണ് തോന്നുന്നതെന്ന് കമ്മ്യൂണിക്കേറ്റ് ചെയ്യുകയാണ്.
ചിലപ്പോള്‍ വളരെ സിംപിളായ കാര്യങ്ങളാകുമ്പോള്‍ അത് കഠിനമാണ്. പക്ഷെ കമ്മ്യൂണിക്കേറ്റ് ചെയ്യാന്‍ പരസ്പരം മനസിലാക്കാനും ബഹുമാനിക്കാനും കൂടുതല്‍ സ്‌നേഹിക്കാനും പറ്റും.വിവാഹം രണ്ട് വ്യക്തികള്‍ തമ്മില്‍ മാത്രമുള്ളതാണ്. ഒരു കുടുംബത്തെയാണ് വിവാഹം ചെയ്യുകയെന്ന് ഇന്ത്യയില്‍ പറയും. അത് സത്യമല്ല. എന്ത് സംഭവിച്ചാലും അത് നിങ്ങള്‍ക്കിടയില്‍ നില്‍ക്കണം. പലപ്പോഴും ദമ്പതികള്‍ പരസ്പരം കമ്മ്യൂണിക്കേറ്റ് ചെയ്യാതെ പങ്കാളിയെക്കുറിച്ച് മറ്റാരെങ്കിലുമായി കമ്മ്യൂണിക്കേറ്റ് ചെയ്യും. അത് വളരെ മോശമാണ്...'' വിദ്യ ബാലന്‍ പറഞ്ഞു.
Premium Lifestyle and Entertainment website
വെളളരിക്കയും ഉരുളക്കിഴങ്ങും തൊടില്ല; വര്‍ക്കൗട്ട് ചെയ്യുന്നത് സ്ഥിരം ശീലം; വെള്ളം കുടിയും മുടക്കില്ല; ഷൂട്ടിനിടയിലും മറക്കാതെയുള്ള ആഹാര ക്രമങ്ങള്‍; രഹസ്യങ്ങള്‍ പരസ്യമാക്കി താരം; രശ്മികയുടെ ബ്യൂട്ടി സീക്രട്ടിന് പിന്നില്‍!