നിന്റെ അമ്മ എല്ലാ കാര്യങ്ങളും അഡ്ജസ്റ്റ് ചെയ്യുന്നത് കാണുന്നതല്ലേ; അതുപോലെ നീയും ചെയ്യേണ്ടി വരും; നാളെ വന്നിട്ട്, ഡാഡി അങ്ങനെയാ ഇങ്ങനെയാ എന്ന് പറഞ്ഞ് കരഞ്ഞ് വന്നാല്‍ ഞാന്‍ വീട്ടിലൊന്നും കയറ്റില്ല;മോഹന്‍ലാലിനെ വിവാഹം കഴിക്കണമെന്ന് പറഞ്ഞപ്പോള്‍ അച്ഛന്‍ നല്‍കിയ ഉപദേശം ഇതായിരുന്നു; മനസ്സ് തുറന്ന് സുചിത്ര 

മോഹന്‍ലാലുമായുള്ള വിവാഹത്തെക്കുറിച്ചും അന്നത്തെ ഓര്‍മ്മകളെക്കുറിച്ചും മനസ്സ് തുറന്ന് ഭാര്യ സുചിത്ര മോഹന്‍ലാല്‍. 'മഞ്ഞില്‍ വിരിഞ്ഞ പൂക്കള്‍' സിനിമ കണ്ട സമയത്ത് മോഹന്‍ലാലിനോട് തനിക്ക് ഇഷ്ടമല്ലായിരുന്നുവെന്നും, പിന്നീട് 'എന്റെ മാമാട്ടിക്കുട്ടിയമ്മയ്ക്ക്' കണ്ടപ്പോഴാണ് ഇഷ്ടം തോന്നിയതെന്നും സുചിത്ര പറഞ്ഞു. മോഹന്‍ലാലിനെ വിവാഹം കഴിക്കണമെന്ന് വീട്ടില്‍ പറഞ്ഞപ്പോള്‍ തന്റെ അച്ഛന്‍ ബാലാജി നല്‍കിയ ഉപദേശത്തെക്കുറിച്ചും സുചിത്ര ഓര്‍ത്തെടുത്തു 

'ഞാന്‍ സിനിമയില്‍ അല്ലേ ചേട്ടനെ കണ്ടിട്ടുള്ളൂ. മഞ്ഞില്‍ വിരിഞ്ഞ പൂക്കളൊ'ക്കെ കാണുന്ന സമയത്ത് എനിക്ക് ഇഷ്ടമേയല്ല. അതുപോലെയാണിപ്പോള്‍ ആശിഷ് വന്നപ്പോള്‍, തിയറ്ററിലിരുന്ന് ആള്‍ക്കാര്‍ എന്തൊക്കെയാണ് പറയുന്നത്. അവന്‍ അത്ര നന്നായി ചെയ്തതു കൊണ്ടാണ് അങ്ങനെയൊരു റിയാക്ഷന്‍ കിട്ടുന്നത്. അതുപോലെ ചേട്ടന്‍ 'മഞ്ഞില്‍ വിരിഞ്ഞ പൂക്കളില്‍' അത്രയും നന്നായി ചെയ്തതുകൊണ്ടാണ് നമുക്ക് ഇഷ്ടക്കേട് തോന്നിയത്. അതുകഴിഞ്ഞ് 'എന്റെ മാമാട്ടിക്കുട്ടിയമ്മ'യ്ക്ക് കണ്ടു കഴിഞ്ഞപ്പോഴാണ് എനിക്ക് ഇഷ്ടമാകാന്‍ തുടങ്ങിയത്. തീര്‍ച്ചയായും സിനിമ കണ്ട് തന്നെയാണ് അദ്ദേഹത്തോട് ഇഷ്ടം തോന്നിയത്.' 

താന്‍ വലിയൊരു മോഹന്‍ലാല്‍ ഫാനായിരുന്നുവെന്നും, തമിഴില്‍ രജനികാന്തിനെയും മലയാളത്തില്‍ മോഹന്‍ലാലിനോടുമാണ് ആരാധന തോന്നിയിട്ടുള്ളതെന്നും സുചിത്ര പറഞ്ഞു. ''മെരിലാന്‍ഡ് സ്റ്റുഡിയോസിന്റെ കുടുംബത്തിലുള്ളവരും എന്റെ ഡാഡിയുമൊക്കെയായി നല്ല അടുപ്പമായിരുന്നു. അങ്ങനെ മുരുകന്‍ മാമന്റെ കല്യാണത്തിന് പോയപ്പോഴാണ് ചേട്ടനെ ഞാന്‍ ആദ്യമായി കാണുന്നത്. അന്നൊരു ഫാന്‍ ആയിട്ട് ചേട്ടന്റെ കൂടെ പോയി നിന്ന് ഫോട്ടോ ഒക്കെ എടുത്തു. ആ ഫോട്ടോ ഇന്നുവരെ എന്റെ കയ്യില്‍ കിട്ടിയിട്ടില്ല'' സുചിത്ര പറഞ്ഞു. 

മോഹന്‍ലാലിനോടുള്ള ഇഷ്ടം വീട്ടില്‍ പറഞ്ഞിട്ടും എതിര്‍പ്പ് ഒന്നും ഉണ്ടായിരുന്നില്ലെന്നും അച്ഛന് സുകുമാരിയെ നന്നായി അറിയാമായിരുന്നതിനാല്‍ ആ വഴി ചോദിക്കാമെന്ന് താന്‍ ആണ് പറഞ്ഞതെന്നും സുചിത്ര പറഞ്ഞു. ഭര്‍ത്താവ് എന്ന നിലയില്‍ തനിക്ക് മോഹന്‍ലാലിനെക്കുറിച്ച് പരാതികളൊന്നുമില്ലെന്നും സുചിത്ര പറഞ്ഞു. ''ഷൂട്ടിങ്ങിന് പോകുമ്പോള്‍ കുറേ ദിവസം ഞാന്‍ കാണാതെ ഒക്കെ ഇരിക്കും. ഇങ്ങനെയൊരാളെ കല്യാണം കഴിക്കണമെന്ന് പറഞ്ഞപ്പോള്‍ എന്റെ അച്ഛന്‍ എനിക്കൊരു ഉപ?ദേശം തന്നിരുന്നു''.

'നീ ആദ്യം ആലോചിച്ചിട്ട് വേണം. കാരണം, നീ ഇതുപോലെയൊരു ഇന്‍ഡസ്ട്രിയില്‍ ഇങ്ങനെയൊരു ജോലി ചെയ്യുന്ന ആളെയാണ് കല്യാണം കഴിക്കാന്‍ പോകുന്നത്. ചിലപ്പോള്‍ വീട്ടില്‍ താമസിച്ചു വരും, ചിലപ്പോള്‍ ഷൂട്ടിങ്ങിന് പോയിട്ട് കുറേ ദിവസം വന്നില്ലാ എന്നിരിക്കും, അപ്പോഴൊക്കെ വരുമ്പോള്‍ നീ മുഖം വീര്‍പ്പിച്ചിരുന്നാല്‍ ഇത് നടക്കില്ല, ശരിയാകില്ല. പിന്നെ ഈ ഇന്‍ഡസ്ട്രിയിലുള്ളപ്പോള്‍ നീ കുറേ കാര്യങ്ങള്‍ കേട്ടെന്നിരിക്കും. അതൊക്കെ നിനക്ക് നന്നായി കൈകാര്യം ചെയ്യാന്‍ പറ്റണം. നിന്റെ അമ്മ വളരെ ശാന്ത സ്വഭാവമുള്ള ഒരാളാണ്. 

നിന്റെ അമ്മ എല്ലാ കാര്യങ്ങളും അഡ്ജസ്റ്റ് ചെയ്യുന്നത് കാണുന്നതല്ലേ. അതുപോലെ നീയും ചെയ്യേണ്ടി വരും. നാളെ വന്നിട്ട്, ഡാഡി അങ്ങനെയാ ഇങ്ങനെയാ എന്ന് പറഞ്ഞ് കരഞ്ഞ് വന്നാല്‍ ഞാന്‍ നിന്നെ തിരിച്ച് വീട്ടിലൊന്നും കയറ്റില്ല. അതുകൊണ്ട് എല്ലാം ആലോചിച്ചിട്ട് നീ തീരുമാനിച്ചാല്‍ മതി' എന്ന് പറഞ്ഞു.  ''ഇതേ ഡാഡി തന്നെ എന്റെ കല്യാണം കഴിഞ്ഞ് കുറേ വര്‍ഷം കഴിഞ്ഞിട്ട് ചേട്ടന്റെ അടുത്ത് പറഞ്ഞു, 'ലാല്‍ നീ അവളെ നശിപ്പിക്കുകയാണെന്ന്'. അപ്പോള്‍ ചേട്ടന്‍ പറഞ്ഞു, 'ഡാഡി, ഡാഡി എങ്ങനെ വളര്‍ത്തിയോ അതിനേക്കാളും കുറച്ചു കൂടി നന്നായി ഞാന്‍ നോക്കണ്ടേ' എന്ന്. പിന്നെ ഞാന്‍ അര്‍ഹിക്കുന്ന ബഹുമാനം അദ്ദേഹം എനിക്ക് തരുന്നുണ്ട്. എപ്പോഴും എന്നോട് വളരെ സ്‌നേഹമാണ്. കല്യാണം കഴിയുന്നതിന് മുന്‍പും അതിന് ശേഷവും അദ്ദേഹത്തിനെ ഞാനിങ്ങനെ ഫോണ്‍ വിളിച്ചു കൊണ്ടിരിക്കുമായിരുന്നു. അതുകണ്ടിട്ട് ഡാഡി എന്റെ കസിന്റെ അടുത്ത് വന്നിട്ട് പറഞ്ഞു, 'ഇയാള്‍ എന്താ ഇത് ? ടെലിഫോണ്‍ എക്‌സ്‌ചേഞ്ച് ഇയാളുടെ ആണോ' എന്ന്. ''അന്നൊക്കെ എസ്ടിഡി കോള്‍ ആയിരുന്നല്ലോ. ഇപ്പോള്‍ നമുക്ക് വാട്‌സ്ആപ് കോള്‍ ഒക്കെയുണ്ട്. അന്ന് അതൊന്നുമില്ലല്ലോ. അപ്പോള്‍ ഡാഡി പറയും, 'ടെലിഫോണ്‍ എക്‌സ്‌ചേഞ്ച് ഇയാളുടെ ആണെന്നാണോ വിചാരം, ഇങ്ങനെ വിളിച്ചോണ്ടിരിക്കാന്‍' എന്നൊക്കെ. അതിപ്പോഴും മിണ്ടും. 

ഞാനിപ്പോള്‍ ചേട്ടനെ അങ്ങോട്ട് വിളിക്കാറേയില്ല, അദ്ദേഹം ഇങ്ങോട്ട് വിളിക്കും. സുചി, അല്ലെങ്കില്‍ അമ്മ എന്നാണ് ചേട്ടന്‍ എന്നെ വിളിക്കാറ്. എല്ലാ വീട്ടിലും അങ്ങനെയാണല്ലോ മമ്മി, പപ്പ എന്ന് പിള്ളേര് വിളിക്കുമ്പോള്‍ ഓട്ടോമാറ്റിക്ക് ആയിട്ട് ഭാര്യയും ഭര്‍ത്താവും അങ്ങോട്ടുമിങ്ങോട്ടും പപ്പ - മമ്മ എന്ന് വിളിക്കും. അതുപോലെയായിരിക്കും അദ്ദേഹം എന്നെ അമ്മ എന്ന് വിളിക്കുന്നത്. പക്ഷേ കൂടുതലും സുചി എന്നാണ് വിളിക്കാറ്'.- സുചിത്ര മോഹന്‍ലാല്‍ പറഞ്ഞു.