രാമലീലയുടെ ഒന്നാം പിറന്നാളിന് പ്രണവിന്റെ സെറ്റില്‍ ദിലീപ് എത്തി; സന്തോഷം പങ്കുവെച്ച് അരുണ്‍ഗോപി 

പ്രണവ് മോഹന്‍ലാലിനെ  നായകനാക്കി അരുണ്‍ഗോപി സംവിധാനം ചെയ്യുന്ന ഇരുപത്തിയൊന്നാം നൂറ്റാണ്ടിന്റെ സെറ്റില്‍ ദിലീപ് എത്തി. ദിലീപിനൊപ്പമുള്ള ചിത്രം പോസ്റ്റ് ചെയ്ത് അരുണ്‍ ഗോപിയാണ് വാര്‍ത്ത പങ്കുവച്ചത്. വാഗമണ്ണിലാണ് സിനിമയുടെ ചിത്രീകരണം നടക്കുന്നത്. രാമലീല റീലിസ് ചെയ്ത് ഇന്നലെ ഒരു വര്‍ഷം തികയുകയായിരുന്നു. ആ സന്തോഷം പങ്ക് വച്ച് അരുണ്‍ ഗോപി കുറിച്ച കുറിപ്പും ചിത്രവും ഏറെ ശ്രദ്ധ നേടുകയാണ്.

രാമലീലയ്ക്ക് ശേഷം, പ്രണവ് മോഹന്‍ലാലിനെ നായകനാക്കി അരുണ്‍ ഗോപി സംവിധാനം നിര്‍വ്വഹിക്കുന്ന ചിത്രമാണ് ഇരുപത്തിയൊന്നാം നൂറ്റാണ്ട്മുളകുപാടം ഫിലിംസിന്റെ ബാനറില്‍ ടോമിച്ചന്‍ മുളകുപാടമാണ് ഇരുപത്തിയൊന്നാം നൂറ്റാണ്ട് നിര്‍മ്മിക്കുന്നത്. രാമലീലയുടെ നിര്‍മ്മാണവും മുളകുപാടം ഫിലിംസ് ആയിരുന്നു.

രാമലീലയെക്കുറിച്ചുള്ള കണ്ണീര്‍ നനവുള്ള ഓര്‍മ്മകള്‍ അരുണ്‍ ഗോപി ഫേസ്ബുക്കിലൂടെ ആരാധകരുമായി പങ്കുവച്ചു.സ്പെറ്റംബര്‍ 28 കണ്ണുനീരിന്റെ നനവോടെ അല്ലാതെ ഓര്‍ക്കാനാകാത്ത ദിവസം.. കരിദിന ആഹ്വാനങ്ങള്‍ക്കും തിയേറ്റര്‍ തല്ലിപൊളിക്കുമെന്നുള്ള ആക്രോശങ്ങള്‍ക്കും നടുവിലേക്ക് രാമലീല എന്ന കന്നിചിത്രവുമായി ചങ്കിടിപ്പോടെ വന്ന ദിവസം... പക്ഷെ ദൈവവും പ്രേക്ഷകരും കൈവിട്ടില്ല സ്വപ്ന തുല്യമായ തുടക്കം നല്‍കി അവര്‍ ഞങ്ങളെ അനുഗ്രഹിച്ചു.. നന്ദി പറഞ്ഞാല്‍ തീരാത്ത കടപ്പാടുകള്‍ക്കു നടുവില്‍ ഇതാ ഒരു വര്‍ഷം, രാമലീല കാണരുതെന്ന് വിളിച്ചുകൂവിയ ചാനലുകള്‍ക്കു തല്ലിപൊളിക്കാന്‍ ആക്രോശിച്ചവര്‍ക്കു ബഹിഷ്‌കരിക്കാന്‍ നിര്ബന്ധ ബുദ്ധിയോടെ നിന്നവരോട് എല്ലാരോടും നന്ദി മാത്രം മനസ്സ് അനുഗ്രഹിച്ചു നല്‍കിയ ഈ വിജയത്തിന് !സ്നേഹപൂര്‍വ്വം.... അരുണ്‍ ഗോപി പ്രേക്ഷകര്‍ക്കായി കുറിച്ചു.