പ്രേക്ഷകരുടെ ഒടിവിദ്യ കാണാന്‍ കാത്തിരിക്കുന്നുവെന്ന് മോഹന്‍ലാല്‍, സിനിമാപ്രേമികള്‍ക്ക് ഗംഭീര അവസരമൊരുക്കി ഒടിയന്‍ പ്രോമോ വീഡിയോ കോണ്ടെസ്റ്

മോഹന്‍ലാലിന്റെ വമ്പന്‍ ചിത്രം ഒടിയന്‍ അണിയറയിലൊരുങ്ങുകയാണ്. എല്ലാ പ്രായത്തിലുള്ള സിനിമാപ്രേമികളും ഒരു പോലെ ചിത്രത്തിനായി കാത്തിരിക്കുമ്പോള്‍ പ്രേക്ഷകരുടെ പ്രീയപ്പെട്ട ഒടിയന്‍ മാണിക്യന്‍ ആയ മോഹന്‍ലാല്‍ തന്നെ സിനിമാ പ്രേമികള്‍ക്കായി ഒരു ഒടിയന്‍ കോണ്ടെസ്‌റ് ഒരുക്കുന്നു.
പതിനഞ്ചു കൊല്ലം കാശിയില്‍ ആയിരുന്നു ഒടിയന്‍ മാണിക്യന്‍. തേങ്കുറിശ്ശി വിട്ടു ഒരു രാത്രിയില്‍ അയാള്‍ പോയി. പിന്നീട് ഒരുനാള്‍ അയാള്‍ മടങ്ങി വന്നു. ബാക്കി വെച്ച് പോയ പ്രണയവും പകയും പ്രതികാരവുമെല്ലാം മുഴുമിപ്പിക്കാനും കണക്കു തീര്‍ക്കാനുമാണ് ഒടിയന്‍ മാണിക്യന്‍ തിരിച്ചു വന്നത്.

മാണിക്യന്റെ ആ തിരിച്ചു വരവിനെ തേങ്കുറിശ്ശിയിലെ പുതിയ തലമുറയും പഴയ തലമുറയും എങ്ങനെ നോക്കി കാണുന്നു എന്ന ആശയത്തെ മുന്‍നിര്‍ത്തി ഒരു മിനിട്ടു ദൈര്‍ഘ്യമുള്ള പ്രോമോ ഫിലിം ഒരുക്കല്‍ ആണ് മത്സരം. മൊബൈല്‍ കാമറ ഉപയോഗിച്ച് മാത്രം ഒരുക്കേണ്ട വീഡിയോ ആണിത്.

പ്രേക്ഷകരുടെ സൃഷ്ടികള്‍ കോണ്ടെസ്‌റ് അനൗണ്‍സ് ചെയ്തു കൊണ്ടുള്ള വിഡിയോയില്‍ ഉള്ള വിലാസത്തില്‍ അയച്ചു കൊടുക്കുക. ഒന്നാം സമ്മാനമായി ഒരു ലക്ഷം രൂപയും രണ്ടാം സമ്മാനമായി അന്‍പതിനായിരം രൂപയും മൂന്നാം സമ്മാനമായി ഇരുപത്തയ്യായ്യിരം രൂപയും മോഹന്‍ലാല്‍ വിജയികള്‍ക്ക് നല്‍കുന്നതായിരിക്കും.

ശ്രീകുമാര്‍ മേനോന്‍ സംവിധാനം ചെയ്യുന്ന ചിത്രത്തിന് ആക്ഷന്‍ രംഗങ്ങള്‍ ഒരുക്കുന്നത് പുലിമുരുകനിലെ ആക്ഷന്‍ രംഗങ്ങളിലൂടെ മലയാളക്കരയെ ത്രസിപ്പിച്ച പീറ്റര്‍ ഹെയ്‌നാണ്. മധ്യകേരളത്തില്‍ ഒരു കാലത്ത് നിലനിന്നിരുന്ന ഒടിവിദ്യയും മറ്റുമാണ് സിനിമയുടെ ഇതിവൃത്തമായി വരുന്നത്. ഫാന്റസി ഗണത്തിലാണ് സിനിമ നിര്‍മ്മിക്കുന്നത്. 30 മുതല്‍ 65 വയസ് വരെയുള്ള കഥാപാത്രങ്ങളെയാണ് മോഹന്‍ലാലിന്റെ മാണിക്യന്‍ എന്ന വേഷത്തിലൂടെ അവതരിപ്പിക്കുന്നത്.

ബിഗ് റിലീസായിട്ടാണ് ഒടിയന്‍ തിയേറ്ററുകളിലേക്ക് എത്തുന്നത്. നരേന്‍, സിദ്ദിഖ്, ഇന്നസെന്റ് എന്നിവരും ചിത്രത്തില്‍ പ്രധാനവേഷത്തിലെത്തുന്നു. ആന്റണി പെരുമ്പാവൂരാണ് ചിത്രം നിര്‍മ്മിക്കുന്നത്. ഡിസംബര്‍ 14 ന് ചിത്രം തിയറ്ററുകളിലെത്തും.