മനസ്സില്‍ സംഘര്‍ഷമുള്ള കാലഘട്ടത്തിലൂടെയാണ്​ നാം കടന്നുപോകുന്നത്; എല്ലാം ശുഭമായി വരും എന്ന്​ പ്രതീക്ഷിക്കാനേ കഴിയുന്നുള്ളൂ; ലോക്ക് ഡൗൺ വിശേഷങ്ങൾ തുറന്ന് പറഞ്ഞ് നടൻ ജഗദീഷ്

മലയാളികളുടെ പ്രിയ താരങ്ങളിൽ ഒരാളാണ് നടൻ ജഗദീഷ്. ഹാസ്യകഥാപാത്രമായും. നായകനായും എല്ലാം താരം വെള്ളിത്തിരയിൽ തിളങ്ങുകയാണ്.  'മൈ ഡിയർ കുട്ടിച്ചാത്തനിലൂടെ'യാണ് ജഗദീഷ് വെള്ളിത്തിരയിലേക്ക് ചുവട് വയ്ക്കുന്നത്. സ്ഥലത്തെ പ്രധാന പയ്യൻസ്, ഭാര്യ , സ്ത്രീധനം, മിമിക്സ് പരേഡ് തുടങ്ങി 250-ഓളം സിനിമകളിൽ അഭിനയിച്ചു. എന്നാൽ ഇപ്പോൾ ഈ ലോക്ക് ഡൗൺ കാലത്തെ വിശേഷങ്ങൾ ആണ്  താരം ഇപ്പോൾ  തുറന്ന് പറയുന്നത്. മനസ്സില്‍ സംഘര്‍ഷമുള്ള കാലഘട്ടത്തിലൂടെയാണ്​ നാം കടന്നുപോകുന്നത് എന്നാണ് ജഗദീഷ് ലോക്ക് ഡൗണിനെ കുറിച്ച് വിശേഷിപ്പിച്ചിരിക്കുന്നത്.

താരത്തിന്റെ വാക്കുകളിലൂടെ 

മനസ്സില്‍ സംഘര്‍ഷമുള്ള കാലഘട്ടത്തിലൂടെയാണ്​ നാം കടന്നുപോകുന്നത്​. മാനവരാശി മുഴുവന്‍ പ്രശ്​നത്തിലാണ്. ഞാനും ഈ വീട്ടിലിരിപ്പുകാലത്ത്​ അസ്വസ്​ഥനാണ്​. പുസ്​തകം വായന, എഴുത്ത്​, പൂന്തോട്ടമുണ്ടാക്കല്‍ തുടങ്ങിയ ഒന്നിനും എനിക്ക്​ മനസ്സ്​ കൊടുക്കാന്‍ കഴിയുന്നില്ല. ഈ സമയം പലരും ഫലപ്രദമായി ഉപയോഗിക്കുന്നതായി പത്രങ്ങളിലും മറ്റും കാണുന്നുണ്ട്​.

അവരോടൊക്കെ എനിക്ക്​ ബഹുമാനമേയുള്ളൂ. പക്ഷേ, എ​ന്‍റെ മനസ്സില്‍ ഇപ്പോള്‍ ഈ രോഗത്തെയും മനുഷ്യ​ന്‍റെ ഭാവിയെയും കുറിച്ചുള്ള ആശങ്കകള്‍ മാത്രമേയുള്ളൂ. എന്തെങ്കിലും സമയം പോകാനായി ചെയ്യാന്‍ എനിക്ക്​ മനസ്സുവരുന്നില്ല. പകരം ഞാന്‍ ഓരോ ദിവസവും പ്രതീക്ഷയോടെ വാര്‍ത്തകള്‍ കാണുകയും കേള്‍ക്കുകയും ചെയ്യുകയാണ്​. ഇന്നല്ലെങ്കില്‍ നാളെ ​ഈ രോഗത്തിനെതിരെ ഒരു വാക്​സിന്‍ കണ്ടുപിടിക്കും എന്ന പ്രതീക്ഷയിലാണ്​ ഞാനും.

കഴിഞ്ഞ ദിവസം ഒരു പ്രമുഖ ഇംഗ്ലീഷ്​ ചാനലില്‍ ഇറ്റലിയില്‍ കൊറോണ വൈറസിനെതിരെ വാക്​സിന്‍ കണ്ടുപിടിച്ചതായി ​ബ്രേക്കിങ്​​ ന്യൂസ്​ വന്നു. എനിക്ക്​ ആശ്വാസവും സന്തോഷവും തോന്നി. ഞാനീ വാര്‍ത്ത എ​ന്‍റെ കൂട്ടുകാരുമായി ആവേശത്തോടെ പങ്കുവെച്ചു. പക്ഷേ, കുറച്ചുകഴിഞ്ഞ​പ്പോള്‍ അത്​ വ്യാജ വാര്‍ത്തയാണ്​ എന്ന്​ മനസ്സിലായി. വലിയൊരു പ്രത്യാശയാണ്​ ആ വാര്‍ത്ത ​ അല്‍പനേര​ത്തേക്കെങ്കിലും നല്‍കിയത്​.

ഇവിടെ വീട്ടില്‍ എ​ന്‍റെ ഭാര്യയും രണ്ട്​ മക്കളും ഒരു മരുമകനും ഡോക്​ടര്‍മാരാണ്​. ഞാന്‍ ഇവരുമായി ഇപ്പോള്‍ സംസാരിക്കുന്നതു പോലും ഇത്തരം വിഷയങ്ങളാണ്​. റിവേഴ്​സ്​ ക്വാറന്‍റൈന്‍ എന്താണെന്നും ഹേഡ്​ ഇമ്യൂണിറ്റി (herd immunity) എന്താണെന്നുമൊക്കെ അവരെനിക്ക്​ പറഞ്ഞുതരുന്നുണ്ട്​. ഒരു സമൂഹത്തില്‍ 60 ശതമാനത്തിലധികം പേര്‍ക്ക്​ ഒരു രോഗം വന്നാല്‍ ആ സമൂഹം സ്വാഭാവികമായി പ്രതിരോധ​ശേഷി കൈവരിക്കും എന്ന തിയറിയെയാണ്​ 'ഹേഡ്​ ഇമ്യൂണിറ്റി'​ എന്നു പറയുന്നത്​. പക്ഷേ, അപ്പോഴും എനിക്ക്​ മനസ്സിന്​ പ്രയാസമാണ്​. ഇന്ത്യയെപ്പോലൊരു രാജ്യത്ത്​ ഇത്രയും പേര്‍ക്ക്​ രോഗം വരികയെന്നു​ പറഞ്ഞാല്‍ വലിയൊരു വിഭാഗം പേര്‍ക്ക്​ ജീവന്‍ നഷ്​ടമാവും. ഇതെല്ലാം കേള്‍ക്കു​മ്ബോള്‍ കടുത്ത ആശങ്കയാണ്​ ഉണ്ടാക്കുന്നത്​.

പ്രവാസികളെ നാട്ടിലേക്ക്​ തിരിച്ചുകൊണ്ടുവരുന്നത്​ ആശ്വാസകരം തന്നെ. പക്ഷേ, ഇവര്‍ക്ക്​ വേണ്ട സൗകര്യങ്ങളൊരുക്കുന്നതിലെ പ്രായോഗികതയെക്കുറിച്ച്‌​ ആലോചിക്കു​മ്പോൾ  ഉത്​കണ്​ഠയുണ്ട്​. കഴിഞ്ഞ ദിവസം എന്‍റെ സുഹൃത്ത്​ നസീര്‍ എനിക്ക്​ ഒരു 'വോയ്​സ്​ മെസേജ്​'​ അയച്ചുതന്നിരുന്നു. നസീറി​ന്‍റെ ഗള്‍ഫിലുള്ള സുഹൃത്തായ മറ്റൊരു നസീര്‍ അദ്ദേഹത്തിന്​ അയച്ച മെസേജ്​ എനിക്ക്​ ഫോര്‍വേഡ്​ ചെയ്​ത്​ തന്നതാണ്. ഈ വ്യക്തിയെ നേരില്‍ കണ്ടിട്ടില്ലെങ്കിലും അബൂദബിയില്‍ ​വെച്ച്‌​ ഞാന്‍ അദ്ദേഹത്തോട്​ ഫോണില്‍ സംസാരിച്ചിരുന്നു. അദ്ദേഹം മരിക്കുന്നതിന്​ തൊട്ടുമുൻപ് അയച്ച മെസേജായിരുന്നു അത്. തനിക്കു വേണ്ടി പ്രാര്‍ഥിക്കണമെന്നും ഗള്‍ഫിലെ അവസ്​ഥ മോശമാണെന്നും അതില്‍ പറഞ്ഞിരുന്നു.വിദേശത്ത്​ പോകുമ്പോൾ  പ്രവാസി മലയാളികള്‍ കാണിക്കുന്ന സ്​നേഹവും കരുതലും ഒന്നും മറക്കാന്‍ കഴിയുന്നതല്ല. എല്ലാം ശുഭമായി വരും എന്ന്​ പ്രതീക്ഷിക്കാനേ കഴിയുന്നുള്ളൂ.