കുട്ടികള്‍ക്കായി സിനിമയൊരുക്കി സംവിധാന രംഗത്തേക്ക് ചുവടുവയ്ക്കുകയാണ് മലയാളത്തിന്റെ സ്വന്തം മോഹന്‍ലാല്‍. ചരിത്രത്തിന്റെ ശേഷിപ്പുകള്‍ പറഞ്ഞുപോകുന്ന ബറോസ് എന്ന സിനിമ ഒക്ടോബറോടെ ചിത്രീകരണം ആരംഭിക്കും. ചിത്രത്തില്‍ മോഹന്‍ലാല്‍ ബറോസായി എത്തുമ്പോള്‍ മറ്റു താരനിരകള്‍ ആരൊക്കെ എന്നതിനേക്കുറിച്ച് യാതൊരു വിവരവും പുറത്തുവിട്ടിരുന്നില്ല.
എന്നാല്‍ സിനിമയിലെ താരങ്ങളെക്കുറിച്ചും പ്രധാന ലൊക്കേഷനെക്കുറിച്ചുമെല്ലാം വിവരിച്ച് ഇപ്പോള്‍ മോഹന്‍ലാല്‍ രംഗത്തെത്തിയിരിക്കുകയാണ്. ഫെയ്‌സ്ബുക്കിലൂടെ പങ്കുവച്ചിരിക്കുന്ന വീഡിയോയിലാണ് താരം കാര്യങ്ങള്‍ വിശദമാക്കുന്നത്. പാസ് വേഗ, റാഫേല്‍ അമാര്‍ഗോ എന്നീ സ്പാനിഷ് താരങ്ങളാണ് സിനിമയില്‍ അണിനിരക്കുന്നതെന്ന് താരം വീഡിയോയിലൂടെ പറയുന്നു. ബറോസില്‍ വാസ്‌കോഡഗാമയുടെ വേഷത്തിലാണ് റാഫേല്‍ അഭിനയിക്കുക. ഭാര്യയായി പാസ് വേഗയും. സ്പാന്‍ഗ്ലിഷ്, ഓള്‍ റോഡ്സ് ലീഡ്സ് ടു ഹെവന്‍, റാംബോ:ലാസ്റ്റ് ബ്ലഡ് എന്നീ സിനിമകളിലൂടെ ശ്രദ്ധിക്കപ്പെട്ട നടിയാണ് പാസ് വേഗ.
ലോകത്തില്‍ താന്‍ സഞ്ചരിച്ച വിവിധ സ്ഥലങ്ങളില്‍ നിന്നും കൊണ്ടു വന്ന രത്നങ്ങളും നിധികളും വാസ്‌കോഡഗാമ സൂക്ഷിച്ചിരുന്നു. ആ നിധികള്‍ക്കൊരു കാവല്‍ക്കാരനുണ്ടായിരുന്നു. അതാണ് ബറോസ്. അയാളുടെ കഥയാണ് ചിത്രം പറയുന്നത്. നാനൂറിലധികം വര്‍ഷങ്ങളായി അയാള്‍ അത് കാത്ത് സൂക്ഷിക്കുന്നു. ഗാമയുടെ പിന്‍ഗാമിയ്ക്കു മാത്രമേ ബറോസ് ആ വലിയ നിധി നല്‍കുകയുള്ളൂ. ഒരു ദിവസം സ്ഥലത്തേക്കൊരു കുട്ടി വരുന്നു. ഗാമയുടെ പിന്‍തുടര്‍ച്ചക്കാരനാണ് താനെന്ന് പറയുന്നു. ബറോസ് ആ കുട്ടി പറയുന്നത് ശരിയാണോയെന്നു കണ്ടെത്തുന്നതാണ് ചിത്രത്തിന്റെ പ്രമേയം.
കുട്ടികള്‍ക്കായുള്ള ഫാന്റസി 3ഡി സിനിമയാണിതെന്നും മോഹന്‍ലാല്‍ പറയുന്നു. ഒക്ടോബറില്‍ ഷൂട്ടിംഗ് ആരംഭിക്കും. നവോദയ ജിജോ തിരക്കഥ രചിക്കുന്നു. നിര്‍മ്മാതാവാകുന്നത് ആന്റണി പെരുമ്പാവൂരാണ്. ഛായാഗ്രഹണം കെ യു മോഹനന്‍. ബോളിവുഡില്‍ നിന്നുമുള്ള അഭിനേതാക്കളും വിദേശതാരങ്ങളും സിനിമയിലെത്തും. വിവിധ ഭാഷകളില്‍ സിനിമ ഡബ്ബ് ചെയ്തെത്തും. ഗോവ, പോര്‍ച്ചുഗീസ് തുടങ്ങിയ സ്ഥലങ്ങളായിരിക്കും പ്രധാന ലൊക്കേഷനുകള്‍.
Premium Lifestyle and Entertainment website
അക്ഷയ് കുമാറിനും മോഹന്‍ലാലിനൊപ്പം വിഷ്ണു മഞ്ചു ചിത്രം കണ്ണപ്പ'യില്‍ പ്രഭാസും; ചിത്രത്തില്‍ നടനെത്തിയ സന്തോഷം പങ്ക് വച്ച് വിഷ്ണു മഞ്ചു
ഏതൊരു റിയാലിറ്റി ഷോയിലും ഫിനാലെയില്‍ എങ്ങനെ പെര്‍ഫോം ചെയ്യുന്നു എന്ന് നോക്കിയാണ് ഫസ്റ്റ് പ്രൈസ് നല്കുക; അഞ്ചാം സ്ഥാനം കിട്ടിയപ്പോള്‍ ഇറങ്ങിപ്പോയത് ഒരു കലാകാരനും കലാകാരിയും ചെയ്യാന്‍ പാടില്ലാത്തത്; അമ്മയും മകളും റിയാലിറ്റി ഷോ വിവാദങ്ങളോട് പ്രതികരിച്ച് സ്വാസിക.