സ്‌നേഹം വിരഹം പ്രതികാരം; പാതിരാത്രിയില്‍ കൈയ്യടി നേടി സണ്ണി വെയ്‌നും ആന്‍ ആഗസ്റ്റിനും

നവ്യ നായര്‍, സൗബിന്‍ ഷാഹിര്‍ എന്നിവരെ കേന്ദ്ര കഥാപാത്രമാക്കി സംവിധായിക രത്തീന ഒരുക്കിയ ക്രൈം ഡ്രാമ ഇന്‍വെസ്റ്റിഗേഷന്‍ ത്രില്ലര്‍ ചിത്രമാണ് പാതിരാത്രി. തിയേറ്റര്‍ റിലീസിനെത്തിയ ചിത്രം മികച്ച പ്രേക്ഷക അഭിപ്രായങ്ങളാണ് ഇതിനോടകം നേടിയിരിക്കുന്നത്. കുടുംബപ്രേക്ഷകരുടെ ഗംഭീര പിന്തുണ ചിത്രത്തിന് ലഭിക്കുന്നുണ്ട്. രാത്രി പട്രോളിംഗിനിറങ്ങുന്ന പൊലീസ് ഡ്രൈവറും പ്രൊബേഷന്‍ എസ് ഐയും ഒരു പാതിരാത്രിയില്‍ നേരിടുന്ന പ്രശ്‌നങ്ങളാണ് സിനിമ പറയുന്നത്.

കൊലപാതകം, ദുരൂഹത, അന്വേഷണം എന്നിങ്ങനെ വ്യത്യസ്ത ലെയറുകളിലായ് പറഞ്ഞു പോകുന്ന കഥ കുടുംബപ്രേക്ഷകര്‍ക്കും എല്ലാത്തരം പ്രേക്ഷകര്‍ക്കും ഒരുപോലെ കണ്ടിരിക്കാന്‍ പറ്റുന്ന രീതിക്കാണ് ഒരുക്കിയിരിക്കുന്നത്. ചിത്രത്തില്‍ മറ്റു പ്രധാന കഥാപാത്രങ്ങളായി വന്നിരിക്കുന്ന സണ്ണി വെയ്‌നും ആന്‍ അഗസ്റ്റിനും തങ്ങളുടെ പെര്‍ഫോമന്‍സിന് ഒരുപോലെ കൈയ്യടി നേടുന്നുണ്ട്.

സണ്ണി വെയ്‌നിന്റെ ജേര്‍ണലിസ്റ്റ് അന്‍വര്‍ അലി, ആന്‍ അഗസ്റ്റിന്റെ യാസ്മിന്‍ എന്നീ രണ്ട് കഥാപാത്രങ്ങള്‍ പ്രധാനപ്പെട്ട കഥാപാത്രങ്ങളായാണ് സിനിമയിലെത്തുന്നത്. ഭാര്യ - ഭര്‍ത്താക്കന്മാരായി വരുന്ന കഥാപാത്രങളെ ഇരുവരും കുടുംബപ്രേക്ഷകരിലേക്ക് ആഴത്തിലിറങ്ങി ചെല്ലും വിധത്തിലാണ് ചെയ്തിരിക്കുന്നത്. സമകാലിക ലോകത്തു ഏറെ പ്രസകതമായ വിഷയമാണ് ഇരുവരുടെയും കഥാപാത്രങ്ങളിലൂടെ സിനിമ പറയുന്നത്. സണ്ണി വെയ്‌നിന്റെ കഥാപാത്രവും കഥാപാത്ര മികവും ശ്രദ്ധേയമാണ്. ആന്‍ അഗസ്റ്റിന്റെ യാസ്മിന്‍ ഏറെ ചിന്തിപ്പിക്കുന്ന കഥാപാത്രം കൂടിയാണ്. കുടുംബ ബന്ധങ്ങളുടേയും ജീവിതത്തിനു മുമ്പില്‍ പകച്ചു പോകലിന്റേയുമെല്ലാം നിമിഷങ്ങളെ പരമാവധി നല്ലപോലെ തന്നെ ഇരുവരും ചെയ്തിട്ടുണ്ട്. 

ആത്മീയ രാജന്റെ അഞ്ജലി, ഹരിശ്രീ അശോകന്റെ എസ് ഐ റഷീദ് ഇന്ദ്രന്‍സിന്റെ സഹദേവന്‍ അച്യുത് കുമാറിന്റെ സുരേഷ് കുമാര്‍ മേനോന്‍, ശബരീഷ് വര്‍മയുടെ ഫെലിക്‌സ് എന്നിങ്ങനെയുള്ള മറ്റു കഥാപാത്രങ്ങളും ശ്രദ്ധേയമാണ്. ജേക്‌സ് ബിജോയിയാണ് ചിത്രത്തിന് സംഗീതം ചെയ്തിരിക്കുന്നത്. ഷാജി മാറാടിന്റേതാണ് തിരക്കഥ. ഷഹ്നാദ് ജലാല്‍ ക്യാമറയും ശ്രീജിത്ത് സാരംഗ് എഡിറ്റിംഗും നിര്‍വ്വഹിച്ചിരിക്കുന്നു. ചിത്രം നിര്‍മ്മിച്ചിരിക്കുന്നത് ബെന്‍സി പ്രൊഡക്ഷന്‍സിന്റെ ബാനറില്‍ ഡോ. കെ.വി. അബ്ദുള്‍ നാസര്‍, ആഷിയ നാസര്‍ എന്നിവര്‍ ചേര്‍ന്നാണ്. ഡ്രീം ബിഗ് ഫിലിംസാണ് വിതരണം.