ചെങ്കോട്ട തിരുമലക്കോവിലില്‍ മുരുകനെ തൊഴാനെത്തി മോഹന്‍ലാല്‍; നടന്‍ മടങ്ങിയത് ചെമ്പില്‍ തീര്‍ത്ത വേല്‍ സമര്‍പ്പിച്ച്; ചിത്രങ്ങള്‍ സോഷ്യല്‍മീഡിയയില്‍

ചെങ്കോട്ട തിരുമലക്കോവിലില്‍ ദര്‍ശനം നടത്തി നടന്‍ മോഹന്‍ലാല്‍. മുരുകന് കാണിക്കായി ചെമ്പില്‍ പൊതിഞ്ഞ വേല്‍ നടന്‍ നടക്കല്‍ സമര്‍പ്പിച്ചു. വ്യാഴാഴ്ച രാവിലെ ആറരയോടെയാണ് മോഹന്‍ലാലും സുഹൃത്തുക്കളും പന്‍പൊഴി തിരുമല കുമാരസ്വാമിക്ഷേത്രത്തില്‍ ദര്‍ശനം നടത്തിയത്. ഇതിന്റെ ചിത്രങ്ങള്‍ സോഷ്യല്‍ മീഡിയയില്‍ വൈറലായിരുന്നു. 

ദക്ഷിണപഴനിയെന്നപേരില്‍ അറിയപ്പെടുന്ന മുരുകക്ഷേത്രമായ തിരുമലക്കോവില്‍ വിശ്വാസികള്‍ക്കും വിനോദസഞ്ചാരികള്‍ക്കും പ്രിയപ്പെട്ട ഇടമാണ്. അല്ലു അര്‍ജുന്റെ പുഷ്പ സിനിമയടക്കം ഇവിടെ ചിത്രീകരിച്ചിട്ടുണ്ട്. 600 വര്‍ഷത്തിനപ്പുറമാണ് തിരുമലകോവിലിന്റെ പഴക്കം കണക്കാക്കുന്നത്. 

നിത്യേന കേരളത്തില്‍നിന്ന് നൂറുകണക്കിന് പേര്‍ സന്ദര്‍ശിക്കുന്ന ക്ഷേത്രമാണ് മലമുകളില്‍ നുറ്റാണ്ടുകള്‍ക്ക് മുമ്പ് നിര്‍മ്മിച്ച തിരുമലക്കോവില്‍. ഇനിയും ക്ഷേത്രത്തിലെത്തുമെന്ന് അറിയിച്ചാണ് താരം മടങ്ങിയത്.

ചെങ്കോട്ട പന്‍പൊഴിയില്‍ പശ്ചിമഘട്ടത്തോടു ചേര്‍ന്ന് കുന്നിന്‍മുകളിലാണ് മുഴുവനും കരിങ്കല്ലുകൊണ്ട് നിര്‍മിച്ച ക്ഷേത്രമുള്ളത്. നൂറ്റാണ്ടുകള്‍ക്കുമുന്‍പ് ശിവകാമി അമ്മയാറാണ് തിരുമലക്കോവില്‍ പണിതീര്‍ത്തതെന്ന് ക്ഷേത്രം രേഖയിലുണ്ട്. ക്ഷേത്രത്തിന്റെ ആദ്യ ഭാഗങ്ങള്‍ നിര്‍മിച്ചത് പന്തളം രാജാവാണെന്നും പറയപ്പെടുന്നു.