ചേച്ചി ഞങ്ങള്‍ക്ക് ഒരു ധൈര്യമായിരുന്നു; അതിലൊരാള്‍ ഇനിയില്ല എന്നത് സങ്കല്‍പിക്കാന്‍ പറ്റാത്തതാണ്;കലാഭവന്‍ മണിയുടെ മൂത്ത സഹോദരി ഓര്‍മ്മയായി; കുറിപ്പുമായി ആര്‍എല്‍വി രാമകൃഷ്ണന്‍

കലാഭവന്‍ മണിയുടെ സഹോദരി അമ്മിണി ഓര്‍മയായ ദു:ഖം പങ്കുവെച്ച് ഇളയ സഹോദരന്‍ ആര്‍എല്‍വി രാമകൃഷ്ണന്റെ കുറിപ്പ്. മാര്‍ച്ച് 26 നായിരുന്നു അന്ത്യം. ഉദര സംബന്ധമായ അസുഖത്താല്‍ ചികിത്സയിലായിരുന്നു. മണിയുടെ കുടുംബത്തിലെ മൂത്ത സഹോദരിയാണ്. 

കുറിപ്പ് ഇങ്ങനെയാണ്:
'ഞങ്ങളുടെ പ്രിയ സഹോദരിയുടെ വേര്‍പാടില്‍ ഞങ്ങളുടെ ദുഃഖത്തോടൊപ്പം ചേര്‍ന്നു നില്‍ക്കുകയും ഞങ്ങളെ ആശ്വസിപ്പിക്കുകയും ചെയ്ത എല്ലാവരോടുള്ള നന്ദിയും കടപ്പാടും അറിയിച്ചുകൊള്ളുന്നു.

എന്നെക്കാള്‍ കുറച്ചധികം വയസ് വ്യത്യാസമുണ്ട് ചേച്ചിയ്ക്ക്. അതുകൊണ്ടു തന്നെ  അമ്മയുടെ സ്ഥാനമാണ് ചേച്ചിക്ക്. കുട്ടിക്കാലത്തെ സ്‌കൂള്‍ അവധികാലം ആഘോഷിക്കുന്നത് മറ്റു ചേച്ചിമാര്‍ ഉണ്ടെങ്കിലും മൂത്ത ചേച്ചിയുടെ വീട്ടിലേക്ക് പോകാനാണ് ഏറെ താല്‍പര്യം.

ചേച്ചിയുടെ രണ്ട് മക്കള്‍ എന്നെക്കാള്‍ മുതിര്‍ന്നവരാണ്. അവരുടെ കുഞ്ഞു അമ്മാവനായിരുന്നു ഞാന്‍. വൈകുന്നേരങ്ങളില്‍ എല്ലാവരും കൂടി ചേര്‍ന്ന സമയങ്ങളിലെ പാട്ടും കൂത്തും എന്നിലെ കലാകാരന് വലിയ പ്രോത്സാഹനമായിരുന്നു. ആ സമയത്ത് കിട്ടുന്ന കപ്പലണ്ടിയും കട്ടന്‍ കാപ്പിയുടെ രുചി ഇന്നും നാവിലുണ്ട്.

ആ പട്ടിണികാലത്ത് സ്‌കൂള്‍ തുറക്കുമ്പോള്‍ അളിയനും പെങ്ങളും കൂലി പണിയെടുത്ത് കിട്ടുന്ന തുച്ഛമായ വരുമാനത്തില്‍ നിന്ന് പിടിച്ച് അവിടെ ആഴ്ചകള്‍ തോറും തുണികച്ചവടത്തിന് വരുന്ന തമിഴന്റെ കയ്യില്‍ നിന്നും വാങ്ങി തരുന്ന ഒരു ജോഡി ട്രൗസറിന്റെയും ഷര്‍ട്ടിന്റെയും തുണി വാങ്ങി തന്ന് സന്തോഷത്തോടെയാണ് വീട്ടിലേക്ക് തിരികെ കൊണ്ടു വിടുക.

ചേച്ചി ഞങ്ങള്‍ക്ക് ഒരു ധൈര്യമായിരുന്നു. ഞങ്ങളുടെ 5 സഹോദരിമാരും ഒരുമിച്ചായിരുന്നു ഞങ്ങളുടെ യാത്രകള്‍. അതിലൊരാള്‍ ഇനിയില്ല എന്നത് സങ്കല്‍പിക്കാന്‍ പറ്റാത്തതാണ്' രാമകൃഷ്ണന്‍ കുറിച്ചു.