കമല്‍ഹാസന് നായിക കാജല്‍ അഗര്‍വാള്‍; ഇന്ത്യന്‍ 2 അണിയറയിലൊരുങ്ങുന്നു

ഉലകനായകന്‍ കമല്‍ഹാസന്റെ ഹിറ്റ് ചിത്രം ഇന്ത്യന്‍ 2 അണിയറയിലൊരുങ്ങുകയാണ്. 22 വര്‍ഷങ്ങള്‍ക്ക് ശേഷമാണ് ചിത്രത്തിന് രണ്ടാം ഭാഗമൊരുക്കുന്നത്. ചിത്രത്തില്‍ കമല്‍ഹാസന് നായികയായി കാജല്‍ അഗര്‍വാള്‍ എത്തുമെന്നാണ് ഏറ്റവും പുതിയ റിപ്പോര്‍ട്ടുകള്‍. ചിത്രത്തില്‍ ബോളിവുഡ് താരം അജയ് ദേവ്ഗണ്‍ പ്രധാന വേഷത്തിലെത്തുന്നുണ്ട്. വിജയുടെ മെര്‍സലായിരുന്നു കാജലിന്റേതായി അവസാനം പുറത്തിറങ്ങിയ ചിത്രം. ഡിസംബറിലാണ് ചിത്രത്തിന്റെ ഷൂട്ടിംഗ് തുടങ്ങുക. ഹൈദരാബാദാണ് ചിത്രത്തിന്റെ പ്രധാന ലൊക്കേഷനുകളിലൊന്ന്. തമിഴിന് പുറമെ തെലുങ്ക്, ഹിന്ദി ഭാഷകളിലും ചിത്രം പുറത്തിറങ്ങും.

200 കോടി രൂപ ബഡ്ജറ്റുള്ള സിനിമയാകും ഇന്ത്യന്‍2 എന്നാണ് റിപ്പോര്‍ട്ടുകള്‍. എ.ആര്‍ റഹ്മാന്‍ തന്നെയാകും ചിത്രത്തിന് സംഗീതം ഒരുക്കുന്നത്.സാബു സിറിലാണ് കലാസംവിധാനം. പീറ്റര്‍ ഹെയ്‌നാണ് ചിത്രത്തിന് സംഘട്ടനമൊരുക്കുന്നത്. രവിവര്‍മ്മനാണ് ഛായാഗ്രഹണം നിര്‍വഹിക്കുന്നത്. മുന്‍ ചിത്രത്തിലെ കഥാപാത്രങ്ങള്‍ പുതിയതിലും ഉണ്ടാകുമോ എന്ന് വ്യക്തമല്ല.

ആദ്യ ഭാഗത്തിന്റെ ക്ലൈമാക്‌സില്‍ ചിത്രത്തിന് രണ്ടാം ഭാഗമുണ്ടാകുമെന്ന സൂചനയോടെയാണ് അവസാനിച്ചത്. ചിത്രത്തിന്റെ ഫസ്റ്റ് ലുക്ക് പോസ്റ്റര്‍ അടുത്തിടെ പുറത്തിറക്കിയിരുന്നു. വമ്പന്‍ പേക്ഷക പ്രതികരണമാണ് ഫസ്റ്റ് ലുക്കിന് കിട്ടിയത്.