ഷൈനിന്റെ എല്ലാ കുസൃതിക്കും ചിരിച്ചിട്ടുണ്ട്, ദേഷ്യം പിടിച്ചിട്ടുണ്ട്, ഉപദേശിക്കാന്‍ ശ്രമിച്ചിട്ടുണ്ട്..കുറ്റപ്പെടുത്തിയിട്ടുണ്ട്; പക്ഷെ ഇപ്പോള്‍ വേണ്ടത് പിന്തുണ: ആസിഫ് അലി

ഷൈന്‍ ടോം ചാക്കോയുടെ പിതാവിന്റെ മരണത്തില്‍ അനുശോചനം അറിയിച്ച് ആസിഫ് അലി. ഇപ്പോള്‍ കുറ്റപ്പെടുത്തലല്ല ആവശ്യമുള്ളതെന്നും ഷൈനിനും കുടുംബത്തിനും പിന്തുണയാണ് വേണ്ടതെന്നും ആസിഫ് അലി പറഞ്ഞു. കഴിഞ്ഞ ദിവസമാണ് ഷൈനിന്റെ പിതാവ് സി.പി ചാക്കോ വാഹനാപകടത്തില്‍ മരണമടഞ്ഞത്.

ഷൈന്‍ ടോം ചാക്കോയുടെ കുസൃതികള്‍ക്കെല്ലാം നമ്മളെല്ലാം ചിരിക്കുകയും ദേഷ്യം പിടിക്കുകയും കുറ്റപ്പെടുത്താന്‍ ശ്രമിക്കുകയും ചെയ്തിട്ടുണ്ട്. പക്ഷേ, ഇപ്പോള്‍ എല്ലാരുടെയും പിന്തുണ ആ കുടുംബത്തിന് ആവശ്യമാണ് എന്നാണ് ആസിഫ് അലി പറയുന്നത്.

''വളരെ സങ്കടത്തോടെ കേട്ടൊരു വാര്‍ത്തയാണ് ഷൈന്‍ ടോമിന്റെ കുടുംബത്തിന് സംഭവിച്ച അപകടം. ഷൈനിന്റെ എല്ലാ കുസൃതിക്കും നമ്മള്‍ ചിരിച്ചിട്ടുണ്ട്, ദേഷ്യപ്പെട്ടിട്ടുണ്ട്, ഉപദേശിക്കാന്‍ ശ്രമിച്ചിട്ടുണ്ട്, കുറ്റപ്പെടുത്തിയിട്ടുണ്ട്. ഇനിയങ്ങോട്ട് നമ്മുടെയെല്ലാവരുടെയും പിന്തുണ ഏറ്റവും കൂടുതല്‍ ആവശ്യമുള്ള സമയമായിരിക്കും.''

നിങ്ങളുടെ എല്ലാവരുടെയും പിന്തുണ ആ കുടുംബത്തിനു ശക്തമായി മുന്നോട്ട് പോവാന്‍ ആവശ്യമുണ്ട്'' എന്നാണ് ആസിഫ് അലി മാധ്യമങ്ങളോട് പ്രതികരിച്ചത്. അതേസമയം, ഷൈന്‍ ടോം ചാക്കോയുടെ ചികിത്സയ്ക്കായി ബെംഗളൂരുവിലേക്ക് പോകുന്നതിനിടയിലാണ് കുടുംബം അപകടത്തില്‍പ്പെട്ടത്. നേരത്തെ തൊടുപുഴയിലെ ലഹരി വിമോചന കേന്ദ്രത്തില്‍ ചികിത്സയിലായിരുന്നു ഷൈന്‍.

തുടര്‍ ചികിത്സയ്ക്കായാണ് കുടുംബത്തോടൊപ്പം ബെഗളൂരുവിലേക്ക് പുറപ്പെട്ടത്. വ്യാഴാഴ്ച രാത്രി പത്ത് മണിയോടെയാണ് കുടുംബം കൊച്ചിയില്‍ നിന്ന് യാത്ര തിരിച്ചത്. തമിഴ്‌നാട് സേലത്തിനടുത്ത് ധര്‍മ്മപുരിയില്‍ വച്ചാണ് ഇവര്‍ സഞ്ചരിച്ചിരുന്ന കാര്‍ ലോറിയുമായി ഇടിച്ച് അപകടം ഉണ്ടാകുന്നത്. അപകടത്തില്‍ ഷൈനിന്റെ അച്ഛന്‍ സിപി ചാക്കോ തല്‍ക്ഷണം മരിച്ചു.

ഷൈന്‍ ടോം ചാക്കോയും അമ്മ മരിയയും തൃശൂര്‍ സണ്‍ ഹോസ്പിറ്റലില്‍ ചികിത്സയില്‍ തുടരുകയാണ്. ഇന്നലെ രാത്രിയാണ് ഇരുവരെയും പ്രത്യേക ആംബുലന്‍സില്‍ തൃശൂരില്‍ എത്തിച്ചത്. വിദേശത്തുള്ള മക്കള്‍ കൂടി എത്തിയ ശേഷമാകും പിതാവ് സിപി ചാക്കോയുടെ സംസ്‌കാരം നടക്കുക.