അംഗത്വമെടുക്കാന്‍ കരുതി വച്ച പണം കൊണ്ട് 'സ്വര്‍ണം' വാങ്ങി; അന്ന് വാങ്ങിവെച്ച ഗോള്‍ഡിന്റെ വില ഇന്ന് ഇരട്ടിയായി; 'അമ്മ'യില്‍ ചേരുന്നില്ലേയെന്ന ചോദ്യത്തിന് അന്ന രാജന്റെ മറുപടി വൈറല്‍; കൈയ്യടിച്ച് സോഷ്യല്‍മീഡിയയും

'അങ്കമാലി ഡയറീസ്' എന്ന ഒറ്റ ചിത്രത്തിലൂടെ മലയാളി പ്രേക്ഷകരുടെ പ്രിയങ്കരിയായി മാറിയ താരമാണ് അന്ന രാജന്‍. ലിച്ചി എന്ന കഥാപാത്രത്തിലൂടെ വെള്ളിത്തിരയില്‍ അരങ്ങേറ്റം കുറിച്ച അന്ന ഇന്ന് സിനിമകളിലും ഉദ്ഘാടന വേദികളില്‍ ഒരുപോലെ സജീവമാണ്. സിനിമയുമായി ബന്ധപ്പെട്ട വിഷയങ്ങളിലും അല്ലാതെയും തന്റെ നിലപാടുകള്‍ കൃത്യമായി തുറന്നു പറയാറുള്ള അന്ന, താരസംഘടനയായ 'അമ്മ'യെക്കുറിച്ച് (AMMA) പറഞ്ഞ കാര്യങ്ങളാണ് ഇപ്പോള്‍ സോഷ്യല്‍ മീഡിയയില്‍ വലിയ ചര്‍ച്ചയാകുന്നത്. 

ഇത്രയും വര്‍ഷമായിട്ടും താന്‍ 'അമ്മ' സംഘടനയില്‍ അംഗത്വം എടുത്തിട്ടില്ലെന്ന് അന്ന രാജന്‍ വെളിപ്പെടുത്തി. സംഘടനയില്‍ ചേരുന്നതിനായി മാറ്റിവെച്ച തുക കൊണ്ട് താന്‍ സ്വര്‍ണം വാങ്ങിയെന്നും അന്ന് എടുത്ത ആ തീരുമാനം സാമ്പത്തികമായി വലിയ ലാഭമാണ് ഉണ്ടാക്കിയതെന്നും താരം പറയുന്നു. അംഗത്വം എടുക്കാന്‍ വലിയൊരു തുക വേണമായിരുന്നു എന്നും, ആ പൈസയ്ക്ക് അന്ന് വാങ്ങിയ സ്വര്‍ണത്തിന് ഇന്ന് വിപണിയില്‍ ഇരട്ടിയിലധികം വിലയുണ്ടെന്നുമാണ് അന്ന വ്യക്തമാക്കിയത്. 

താരസംഘടനയായ 'അമ്മ'യില്‍ അടുത്തിടെയുണ്ടായ ആഭ്യന്തര തര്‍ക്കങ്ങളെക്കുറിച്ചും നേതൃമാറ്റങ്ങളെക്കുറിച്ചും അന്ന തന്റെ നിലപാട് വ്യക്തമാക്കി. സംഘടനയുടെ നേതൃസ്ഥാനത്തേക്ക് സ്ത്രീകള്‍ കടന്നുവന്നപ്പോള്‍ തനിക്ക് വലിയ സന്തോഷം തോന്നിയിരുന്നതായി താരം പറഞ്ഞു. സ്ത്രീകള്‍ നേതൃത്വത്തിലേക്ക് വന്നതോടെ ഇനി ധൈര്യമായി സംഘടനയില്‍ അംഗത്വമെടുക്കാം എന്ന് കരുതിയിരിക്കുമ്പോഴാണ് അപ്രതീക്ഷിതമായി വലിയ പ്രശ്‌നങ്ങളും തര്‍ക്കങ്ങളും ഉണ്ടായതെന്നും, അതോടെ ആ തീരുമാനം മാറ്റുകയായിരുന്നെന്നും അന്ന കൂട്ടിച്ചേര്‍ത്തു. 

അന്ന രാജന്റെ ഈ തുറന്നുപറച്ചില്‍ അടങ്ങിയ വീഡിയോ പുറത്തുവന്നതിന് പിന്നാലെ സോഷ്യല്‍ മീഡിയയില്‍ അനുകൂലിച്ചും പ്രതികൂലിച്ചും നിരവധി പ്രതികരണങ്ങളാണ് വരുന്നത്. ഭൂരിഭാഗം പേരും അന്നയുടേത് വളരെ ബുദ്ധിപരമായ തീരുമാനമാണെന്ന് പ്രശംസിക്കുന്നുണ്ട്. സംഘടനകളിലെ അനാവശ്യ തര്‍ക്കങ്ങളില്‍ ചെന്ന് ചാടുന്നതിനേക്കാള്‍ നല്ലത് സ്വന്തം സമ്പാദ്യം സുരക്ഷിതമാക്കുന്നതാണെന്നും പലരും കമന്റ് ചെയ്യുന്നു. 

അതേസമയം, താരത്തിന്റെ നിലപാടിനെ വിമര്‍ശിക്കുന്നവരും കുറവല്ല. 'അമ്മ' എന്ന സംഘടനയില്‍ ചേരുന്നത് വെറുമൊരു പണം കൊടുക്കല്‍ മാത്രമല്ലെന്നും, ഇതിലൂടെ ലഭിക്കുന്ന തുക സിനിമയിലെ മുന്‍കാല പ്രതിഭകള്‍ക്കും പാവപ്പെട്ട കലാകാരന്മാര്‍ക്കും കൈത്താങ്ങായി മാറുന്നുണ്ടെന്നും ഇവര്‍ ചൂണ്ടിക്കാണിക്കുന്നു. ഒട്ടനവധി അഭിനേതാക്കളുടെ കുടുംബം പുലരുന്നത് ഈ സംഘടന നല്‍കുന്ന ആനുകൂല്യങ്ങള്‍ കൊണ്ടാണെന്നും, അതുകൊണ്ട് തന്നെ ഇത്തരം പ്രസ്താവനകള്‍ ഒഴിവാക്കാമായിരുന്നു എന്നുമാണ് മറുവിഭാഗത്തിന്റെ വാദം.