ഈ പ്രായത്തിലും നടന വൈഭവം സൃഷ്ടിക്കുന്ന മമൂക്കയ്ക്ക് എന്തെ പദ്മ ഭൂഷണ് നല്‍കിയില്ല;ഏത് അളവ് കോലെടുത്ത് അളന്നാലും ഒരുപടി മുന്നിലായിരിക്കും ആ പ്രതിഭ'; അഖില്‍ മാരാരുടെ കുറിപ്പ് ചര്‍ച്ചയാകുമ്പോള്‍

കഴിഞ്ഞ ദിവസമാണ് പദ്മ പുരസ്‌കാരങ്ങള്‍ പ്രഖ്യാപിച്ചത്. അടുത്തിടെ അന്തരിച്ച സാഹിത്യകാരന്‍ എം.ടി വാസുദേവന്‍ നായര്‍ക്ക് മരണാന്തര ബഹുമതിയായി പദ്മവിഭൂഷണ്‍ നല്‍കിയിരുന്നു.കൂടാതെ നടി ശോഭനയ്ക്ക് പത്മഭൂഷണും ലഭിച്ചു.പദ്മഭൂഷണ്‍ ലഭിച്ച താരങ്ങളുടെ പട്ടികയില്‍ ഇത്തവണ തെലുങ്ക് സൂപ്പര്‍ താരം നന്ദമൂരി ബാലകൃഷ്ണയുമുണ്ട്.

പട്ടിക പുറത്ത് വന്നത് മുതല്‍ പ്രതിഷേധം പ്രകടിപ്പിച്ചുള്ള നിരവധി കുറിപ്പുകളും പോസ്റ്റുകളും ആളുകള്‍ സോഷ്യല്‍മീഡിയയില്‍ പങ്കുവെക്കുന്നുണ്ട്. അക്കൂട്ടത്തില്‍ ചര്‍ച്ചയാകുന്നത് സംവിധായകനും ബി?ഗ് ബോസ് മലയാളം സീസണ്‍ അഞ്ച് വിജയിയുമായ അഖില്‍ മാരാര്‍ സോഷ്യല്‍മീഡിയയില്‍ പങ്കുവെച്ച പോസ്റ്റാണ്. മമ്മൂട്ടിക്ക് എന്തേ പദ്മ ഭൂഷണ്‍ നല്‍കിയില്ലെന്നും മതവും രാഷ്ട്രീയവുമല്ലാതെ മറ്റൊരു അയോഗ്യതയും ആ മഹാ പ്രതിഭയ്ക്ക് ഇല്ലെന്നുമാണ് അഖില്‍ മാരാര്‍ കുറിച്ചത്. 

കുറിപ്പ് ഇങ്ങനെ:

റിപബ്ലിക് ദിനത്തില്‍ രാജ്യം നല്‍കുന്ന ആദരവ് ഏതൊരു ഭാരതീയ പൗരന്റെയും അഭിമാന നിമിഷങ്ങളില്‍ ഒന്നാണ്..നിരവധി പ്രാഞ്ചിയേട്ടന്‍മാര്‍ പണം ഉപയോഗിച്ച് മുന്‍കാലങ്ങളില്‍ പദ്മശ്രീ പട്ടം നേടി എടുത്തിരുന്നു എന്നതില്‍ നിന്നും വ്യത്യസ്തമായി അര്‍ഹത ഉള്ള സാധാരണക്കാരന് പദ്മശ്രീ ലഭിച്ചതായി കണ്ടത് മോദി സര്‍ക്കാര്‍ വന്ന ശേഷമാണ്..

എന്നാല്‍ കഴിഞ്ഞ ദിവസം പദ്മ പുരസ്‌കാരങ്ങള്‍ പ്രഖ്യാപിചപ്പോള്‍ സന്തോഷവും വിഷമവും തോന്നി.... PR ശ്രീജേഷ് എന്ന രാജ്യത്തിന്റെ പോരാളിക്ക് പദ്മ ഭൂഷണ് ലഭിച്ചതില്‍ വലിയ സന്തോഷം തോന്നി.. എന്നാല്‍ മലയാള സിനിമയുടെ അഭിമാനവും ഇന്ത്യന്‍ സിനിമയില്‍ അത്ഭുതമായി ഈ പ്രായത്തിലും നടന വൈഭവം സൃഷ്ടിക്കുന്ന മമൂക്കയ്ക്ക് എന്തെ പദ്മ ഭൂഷണ് നല്‍കിയില്ല..

ഏത് അളവ് കോലെടുത്തു അളന്നാലും ലഭിച്ച മറ്റുള്ളവരേക്കാള്‍ ഒരു പടി മമ്മൂക്ക മുന്നിലായിരിക്കും..
ഭരണഘടനയും ജനാധിപത്യവും ഏറ്റവും മഹത്തരമാകുന്ന മഹാ ദിനത്തില്‍ രാജ്യത്തെ പൗരനെ രാഷ്ട്രീയത്തിന്റെയും മതത്തിന്റെയും പേരില്‍ വേര്‍ തിരിച്ചു ആദരിക്കേണ്ട ഗതി കേടിലേക്ക് എന്റെ രാജ്യം പോകുന്നതില്‍ വിഷമം ഉണ്ട്..

എത്രയൊക്കെ കൂട്ടിയും കുറച്ചും ഗുണിച്ചും ഹരിച്ചുമൊക്കെ നോക്കിയിട്ടും മാറ്റി നിര്‍ത്താന്‍ മമ്മൂക്കയുടെ മതവും രാഷ്ട്രീയവുമല്ലാതെ മറ്റൊരു അയോഗ്യതയും ആ മഹാ പ്രതിഭയ്ക്ക് ഉള്ളതായി എനിക്ക് തോന്നുന്നില്ല...

NB :പ്രതിഷേധ കുറിപ്പല്ല അല്ലു അര്‍ജുനന് നഷ്ണല്‍ അവാര്‍ഡ് കൊടുത്തും ബാലയ്യ്ക്ക് പദ്മ ഭൂഷണ് കൊടുത്തും ആദരിച്ചപ്പോള്‍ ഒഴിവാക്കിയത് ആണ് മമൂക്കയ്ക്ക് ലഭിച്ച വലിയ പുരസ്‌കാരം എന്ന് ഓര്‍മപ്പെടുത്താന്‍ വേണ്ടി എഴുതിയതാണ്.