'പ്രിയം' റിലീസ് ചെയ്ത കാലത്ത് അയാള്‍ സ്‌കൂള്‍ വിദ്യാര്‍ഥിയായിരുന്നു; എന്നെ ആദ്യം തിരിച്ചറിഞ്ഞതും അദ്ദേഹമാണ്; അപ്രതീക്ഷിതമായ നിമിഷം; ദീപയെ ഞെട്ടിച്ച് അജു വര്‍ഗീസ്

ഒരു സിനിമ മാത്രം ചെയ്‌തെങ്കിലും മലയാളി പ്രേക്ഷകരുടെ മനസ്സില്‍ ഇടം നേടിയ നടിയാണ് ദീപ നായര്‍. 'പ്രിയം' എന്ന ചിത്രത്തില്‍ കുഞ്ചാക്കോ ബോബനൊപ്പം നായികയായെത്തിയ അവര്‍, പിന്നീട് കുടുംബജീവിതത്തെയാണ് തിരഞ്ഞെടുത്ത്. വര്‍ഷങ്ങള്‍ക്ക് ശേഷം അവധി ആഘോഷിക്കാന്‍ ഇന്ത്യയിലെത്തിയ ദീപ, മുംബൈയില്‍ ഉണ്ടായ ഒരു പ്രത്യേക അനുഭവം ആരാധകരുമായി പങ്കുവെച്ചിരിക്കുകയാണ്.

ഐടിസി മറാത്ത ഹോട്ടലിന്റെ ലിഫ്റ്റിലാണ് ആ ഓര്‍മ്മപ്പെടുത്തുന്ന കൂടിക്കാഴ്ച നടന്നത്. പഴയൊരു ആരാധകന്‍ തന്നെയായിരുന്നു ആ വ്യക്തി. എന്നാല്‍ ഇന്ന് മലയാളത്തിലെ പ്രമുഖ നടനും നിര്‍മാതാവുമാണ് അദ്ദേഹം. 'പ്രിയം' റിലീസ് ചെയ്ത കാലത്ത് സ്‌കൂള്‍ വിദ്യാര്‍ഥിയായിരുന്നു ആ യുവാവ്. ഇന്ന് മികച്ച ഹാസ്യതാരത്തിനുള്ള പുരസ്‌കാരം നേടിയിട്ടുള്ള, 'ഫണ്‍ടാസ്റ്റിക് ഫിലിംസ്' എന്ന പ്രൊഡക്ഷന്‍ ഹൗസിന്റെ ഉടമസ്ഥരില്‍ ഒരാളായ, 'മലര്‍വാടി ആര്‍ട്സ് ക്ലബ്' വഴിയാണ് സിനിമയില്‍ അരങ്ങേറ്റം കുറിച്ച അജു വര്‍ഗീസാണ് ആ ആരാധകന്‍ എന്ന് ദീപ വെളിപ്പെടുത്തി.

ഈ കണ്ടുമുട്ടലിന്റെ പ്രത്യേകത, അജുവാണ് ആദ്യം ദീപയെ തിരിച്ചറിഞ്ഞത്. ''എനിക്ക് നേരില്‍ കാണാന്‍ കഴിഞ്ഞിട്ടില്ലെങ്കിലും, പലതവണ സംസാരിച്ചു പരിചയപ്പെട്ട ആളാണ് അദ്ദേഹം. അതുകൊണ്ടുതന്നെ അപ്രതീക്ഷിതമായ ആ നിമിഷം എനിക്ക് ഏറെ സന്തോഷം നല്‍കി. ഇന്ന് ഞാനാണ് അദ്ദേഹത്തിന്റെ വലിയൊരു ആരാധക,'' എന്നാണ് ദീപ പറഞ്ഞത്.

വിവാഹശേഷം വിദേശത്ത് ഭര്‍ത്താവിനും മക്കള്‍ക്കുമൊപ്പമാണ് ദീപ താമസം. സിനിമയില്‍ വീണ്ടും സജീവമാകാനുള്ള ആലോചനകളൊന്നുമില്ലെങ്കിലും, പഴയ ഓര്‍മ്മകളും ഇത്തരത്തിലുള്ള പ്രത്യേക സംഭവങ്ങളും ആരാധകരുമായി പങ്കിടുന്നതില്‍ താരം എപ്പോഴും സന്തോഷം പ്രകടിപ്പിക്കുന്നു.