'സ്ഥിരോത്സാഹവും ഉള്ളിലെ തീയുമാണ് അച്ഛനെ ഇവിടെ എത്തിച്ചത്'; പുതിയ യാത്ര കാണുന്നതില്‍ ഞങ്ങള്‍  ത്രില്ലിലും ആവേശത്തിലുമാണ്; ഏത്  കാര്യത്തിലും പരമാവധി നല്‍കുന്ന ശൈലി ഈ ഉത്തരവാദിത്വത്തിലും ഉണ്ടാകും; കൃഷ്ണകുമാറിനെ അഭിനന്ദിച്ച് അഹാന

ദേശീയ ചലച്ചിത്ര വികസന കോര്‍പ്പറേഷന്‍ (എന്‍എഫ്ഡിസി) ചെയര്‍മാനായി നിയമിതനായ നടനും ബിജെപി നേതാവുമായ കൃഷ്ണകുമാറിന് അഭിനന്ദനങ്ങളുമായി മകളും നടിയുമായ അഹാന കൃഷ്ണ. അച്ഛന്റെ സ്ഥിരോത്സാഹവും ഉള്ളിലെ തീയുമാണ് അദ്ദേഹത്തെ ഈ നേട്ടത്തിലേക്ക് എത്തിച്ചതെന്ന് അഹാന ഇന്‍സ്റ്റാഗ്രാമില്‍ കുറിച്ചു. ഒരു കുടുംബമെന്ന നിലയില്‍ ഈ പുതിയ യാത്ര കാണുന്നതില്‍ വലിയ ആവേശമുണ്ടെന്നും താരം വ്യക്തമാക്കി.

ഇന്ത്യന്‍ സിനിമയുടെ വികസനത്തിനും ക്ഷേമത്തിനും വേണ്ടി പ്രവര്‍ത്തിക്കാന്‍ ലഭിച്ച ഈ അവസരം വിലമതിക്കാനാവാത്ത ഒന്നാണെന്ന് അഹാന പറയുന്നു. 'കേന്ദ്രമന്ത്രി അശ്വനി വൈഷ്ണവിന്റെ സാന്നിധ്യത്തില്‍ എന്‍എഫ്ഡിസി ചെയര്‍മാനായി അച്ഛന്‍ ചുമതലയേല്‍ക്കുന്ന ഈ നിമിഷം ഞങ്ങള്‍ക്ക് വലിയ സന്തോഷം നല്‍കുന്നതാണ്. ചെയ്യുന്ന ഏത് കാര്യത്തിലും പരമാവധി നല്‍കുന്ന അച്ഛന്റെ ശൈലി ഈ പുതിയ ഉത്തരവാദിത്വത്തിലും ഉണ്ടാകുമെന്ന് ഉറപ്പാണ്,' - അഹാന കുറിച്ചു.

എന്‍എഫ്ഡിസി ചെയര്‍മാനായി നിയമിതനായതിന് അഭിനന്ദനങ്ങള്‍ അച്ഛാ. കേന്ദ്ര ഇന്‍ഫര്‍മേഷന്‍ & ബ്രോഡ്കാസ്റ്റിങ്, റെയില്‍വേ, ഇലക്ട്രോണിക്‌സ് & ഐടി മന്ത്രി ശ്രീ അശ്വനി വൈഷ്ണവ് ജിയുടെ സാന്നിധ്യത്തില്‍, എന്‍എഫ്ഡിസി ചെയര്‍മാനായി ചുമതലയേല്‍ക്കുകയും ഉത്തരവാദിത്വങ്ങളിലേക്ക് കടക്കുകയും ചെയ്യുന്ന ഇന്ന്, ഒരു കുടുംബമെന്ന നിലയില്‍ നിങ്ങളുടെ ഈ പുതിയ യാത്ര കാണുന്നതില്‍ ഞങ്ങള്‍ വളരെ ത്രില്ലിലും ആവേശത്തിലുമാണ്.

ഇന്ത്യന്‍ സിനിമയുടെ വികസനത്തിനും ക്ഷേമത്തിനും വേണ്ടി പ്രവര്‍ത്തിക്കാന്‍ അവസരം ലഭിക്കുന്നത് വിലമതിക്കാനാവാത്ത ഒന്നാണ്, നിങ്ങള്‍ ചെയ്യുന്ന ഏതൊരു കാര്യത്തിനും എപ്പോഴും നിങ്ങളുടെ പരമാവധി നല്‍കുന്നതു പോലെ, ഈ റോളിനോടുള്ള നിങ്ങളുടെ സമീപനവും വ്യത്യസ്തമായിരിക്കില്ലെന്ന് എനിക്ക് ഉറപ്പുണ്ട്.ഒരു കുട്ടിയെന്ന നിലയില്‍, നിങ്ങളുടെ മാതാപിതാക്കള്‍ നേട്ടങ്ങള്‍ കൈവരിക്കുന്നതും വിജയിക്കുന്നതും നിരന്തരം ലക്ഷ്യബോധത്തോടെ മുന്നോട്ട് പോകുന്നതും കാണാന്‍ നിങ്ങള്‍ എപ്പോഴും ആഗ്രഹിക്കുന്നുണ്ടാകും.

ഇന്ന്, അത് കാണാന്‍ കഴിയുന്ന ഈ സന്ദര്‍ഭത്തില്‍, എന്റെ അച്ഛനെ ഇത്രയും അഭിമാനകരമായ ഒരു ഉത്തരവാദിത്വത്തിന് യോഗ്യനായി കണ്ടെത്തിയതിന് ബഹുമാനപ്പെട്ട രാഷ്ട്രപതി ശ്രീമതി ദ്രൗപതി മുര്‍മുവിനും നമ്മുടെ പ്രിയപ്പെട്ട പ്രധാനമന്ത്രി ശ്രീ നരേന്ദ്ര മോദിജിക്കും നന്ദി പറയാന്‍ ഞാന്‍ ആഗ്രഹിക്കുന്നു. ലക്ഷ്യം, വെളിച്ചം, സന്തോഷം എല്ലാമാണ് അദ്ദേഹത്തിന്റെ ജീവിതത്തില്‍ ഇന്ന് നിറഞ്ഞു നില്‍ക്കുന്നത്. നിങ്ങളുടെ സ്ഥിരോത്സാഹവും ഉള്ളിലെ തീയുമാണ് നിങ്ങളെ ഇവിടെ എത്തിച്ചത് അച്ഛാ. എല്ലാവിധ ആശംസകളും.