നീണ്ട ഇടവേളയ്ക്ക് ശേഷം മമ്മൂട്ടിയും സുരേഷ് ഗോപിയും ഒന്നിക്കുന്നു; മഹേഷ് നാരയണന്‍ ചിത്രത്തില്‍ അണി നിരക്കുക വമ്പന്‍ താരനിരകളെന്ന് റിപ്പോര്‍ട്ട്

അറിയിപ്പ്, ടെക്ക് ഓഫ് തുടങ്ങിയ ചിത്രങ്ങളിലൂടെ ശ്രദ്ധേയനായ സംവിധായകന്‍ മഹേഷ് നാരയണനും മ്മൂട്ടിയും മഒന്നിക്കുന്ന ചിത്രം അണിയറയില്‍ ഒരുങ്ങുന്ന റിപ്പോര്‍ട്ടുകള്‍ പുറത്ത് വരാന്‍ തുടങ്ങിയിട്ട് നാളുകളായി. വലിയ ബഡ്ജറ്റില്‍ കഥ പറയുന്ന സിനിമയില്‍ കുഞ്ചാക്കോ ബോബനും ഫഹദ് ഫാസിലും ഉള്‍പ്പടെ വമ്പന്‍ താരനിര ഭാഗമാകുമെന്ന വാര്‍ത്തകള്‍ക്കൊപ്പം താരനിരയിലേക്ക് സുരേഷ് ഗോപിയുടെ പേര് കൂടി ചേര്‍ക്കപ്പെട്ടിരിക്കുകയാണ് ഇപ്പോള്‍.

ചിത്രത്തില്‍ സുപ്രധാന വേഷത്തിലാണ് സുരേഷ് ഗോപി എത്തുന്നത്. ഏപ്രിലില്‍ ചിത്രീകരണം ആരംഭിക്കും. യു.എസിലും യു.കെയിലും ഡല്‍ഹിയിലുമായാണ് ചിത്രീകരണം. തൊണ്ണൂറു ദിവസത്തെ ചിത്രീകരണമാണ് പ്‌ളാന്‍ ചെയ്യുന്നത്. ആന്റോ ജോസഫും കുഞ്ചാക്കോ ബോബനും ഫഹദ് ഫാസിലും ചേര്‍ന്നാണ് നിര്‍മ്മാണം.

ഇടവേളയ്ക്കുശേഷമാണ് മമ്മൂട്ടിയും സുരേഷ് ഗോപിയും ഒരുമിക്കുന്നത്. ന്യൂഡല്‍ഹി, നായര്‍സാബ്, ഒരു സി .ബി.ഐ ഡയറിക്കുറിപ്പ്, ഒരു വടക്കന്‍ വീരഗാഥ തുടങ്ങി നിരവധി ചിത്രങ്ങളില്‍ മമ്മൂട്ടിയും സുരേഷ് ഗോപിയും ഒരുമിച്ചിട്ടുണ്ട്. ഷാജി കൈലാസ് സംവിധാനം ചെയ്ത ദി കിംഗ് ആന്‍ഡ് ദ കമ്മിഷണര്‍ സിനിമയിലാണ് ഇരുവരും ഒടുവില്‍ ഒന്നിച്ച് അഭിനയിച്ചത്.അതേസമയം ടര്‍ബോ ആണ് റിലീസിന് ഒരുങ്ങുന്ന മമ്മൂട്ടി ചിത്രം. മേയ് 9ന് ടര്‍ബോ റിലീസ് ചെയ്യും.