യുദ്ധകാഹളം മുഴക്കി മമ്മൂട്ടി; മാമാങ്കത്തിന്റെ ഫസ്റ്റ് ലുക്ക് പോസ്റ്റര്‍ പുറത്തു വിട്ടത് താരം തന്റെ ഔദ്യോഗിക പേജിലൂടെ; കാത്തിരിപ്പുകള്‍ക്കൊടുവില്‍ കിട്ടിയ സമ്മാനം ഏറ്റെടുത്ത് ആരാധകരും

മമ്മൂട്ടി നായകനായി എത്തുന്ന ബ്രഹ്മാണ്ഡ ചിത്രമായ മാമാങ്കത്തിന്റെ ഫസ്റ്റ് ലുക്ക്് പുറത്തുവിട്ടു.താരം തന്നെയാണ് തന്റെ ഔദ്യോഗിക പേജിലൂടെ ചിത്രത്തിന്റെ ആദ്യ പോസ്റ്റര്‍ പുറത്തുവിട്ടത്. ഫസ്റ്റ് ലുക്ക് റിലീസുമായി ബന്ധപ്പെട്ടു മമ്മൂട്ടി ഇന്നലെ ഇന്‍സ്റ്റാഗ്രാമില്‍ കുറിച്ച ചിത്രത്തിന്റെ ശകലം തന്നെ ആരാധകരെ വല്ലാതെ ആവേശം കൊള്ളിച്ചിരുന്നു.  പിന്നാലെയാണ് ഇന്ന് 'മാമാങ്കം' ഫസ്റ്റ് ലുക്ക് റിലീസ് ചെയ്തിരിക്കുന്നത്.

പന്ത്രണ്ടു വര്‍ഷത്തിലൊരിക്കല്‍ മലപ്പുറം ജില്ലയിലെ തിരുന്നാവായ മണപ്പുറത്ത് മാഘമാസത്തിലെ വെളുത്തവാവില്‍ നടക്കുന്ന മാമാങ്കത്തിന്റേയും ചാവേറായി പൊരുതിമരിക്കാന്‍ വിധിക്കപ്പെട്ട യോദ്ധാക്കളുടേയും കഥയാണ് ചിത്രം പറയുന്നത്. ചിത്രത്തില്‍ മമ്മൂട്ടിക്കൊപ്പം വന്‍ താരനിര തന്നെയുണ്ട്. പ്രാചി തെഹ്ലാന്‍ ആണ് നായിക.

നവാഗതനായ  സജീവ് എസ്.പിള്ളയുടെ സംവിധാനത്തില്‍ തുടങ്ങിയ ചിത്രം നിര്‍മ്മാതാക്കളുമായുള്ള അഭിപ്രായ ഭിന്നതയില്‍പ്പെട്ടതോടെ പിന്നീട് എം പദ്മകുമാര്‍ ഏറ്റെടുക്കുകയായിരുന്നു.  കാവ്യാ ഫിലംസിന്റെ ബാനറില്‍ വേണു കുന്നപ്പള്ളിയാണ് 'മാമാങ്കം' നിര്‍മ്മിക്കുന്നത്.  അമ്പതു കോടിയോളം രൂപ മുടക്കിയാണ് സിനിമ നിര്‍മ്മിക്കുന്നതെന്നും റിപ്പോര്‍ട്ടുകളുണ്ട്.

മലയാളത്തിന് പുറമെ തമിഴിലും തെലുങ്കിലും ഹിന്ദിയിലും ഇംഗ്ലീഷിലുമായി 'മാമാങ്കം' മൊഴി മാറ്റുന്നുണ്ട്. കൂടാതെ മലേഷ്യയിലും ഇന്തോനേഷ്യയിലും ചിത്രം റിലീസ് ചെയ്യും.