2024ലെ ഏറ്റവും കൂടുതല്‍ പ്രതിഫലം വാങ്ങുന്ന നടിയായി ദീപിക; ഒരു സിനിമയ്ക്കായി നടി വാങ്ങുന്നത് 15 കോടി മുതല്‍ 30 കോടി വരെ; കങ്കണയും ആലിയയും ഐശ്വര്യയുമ കത്രീനയും പിന്നില്‍

2024-ല്‍ ഇന്ത്യന്‍ സിനിമയില്‍ ഏറ്റവും കൂടുതല്‍ പ്രതിഫലം വാങ്ങിയ ഇന്ത്യന്‍ നടിമാരുടെ ലിസ്റ്റ് പുറത്ത്. നടി ദീപികാ പദുക്കോണ്‍ ആണ് ഏറ്റവും കൂടുതല്‍ പ്രതിഫലം വാങ്ങിയിരിക്കുന്നത്. ഐഎംഡിബിയുടെ സഹായത്തോടെ ഫോര്‍ബ്‌സ് ആണ് ഈ റിപ്പോര്‍ട്ട് പുറത്തുവിട്ടത്. ഒരു സിനിമയ്ക്ക് 15 മുതല്‍ 30 കോടി രൂപവരെയാണ് ദീപിക വാങ്ങുന്നത്. 

ആലിയാ ഭട്ട്, കങ്കണ റണൗട്ട്, പ്രിയങ്കാ ചോപ്ര, ഐശ്വര്യാ റായ് എന്നിവരെ പിന്തള്ളിയാണ് ദീപിക ഈ നേട്ടം കൈവരിച്ചത്. ഈ ലിസ്റ്റില്‍ സൗത്ത് ഇന്ത്യയില്‍ നിന്നുമുള്ള ആരും ഇല്ല.അടുത്തിടെ ഇറങ്ങിയ താരത്തിന്റെ മിക്ക സിനിമകളും ഹിറ്റായിരുന്നു. അതോടെ 2024ലെ ഏറ്റവും കൂടുതല്‍ പ്രതിഫലം വാങ്ങുന്ന നടിയായി മാറിയിരിക്കുകയാണ് ദീപിക.

രണ്ടാം സ്ഥാനം നടിയും രാഷ്ട്രീയ നേതാവുമായ കങ്കണ റണാവത്തിനാണ്. ഒരു സിനിമയ്ക്ക് 15മുതല്‍ 27കോടി വരെയാണ് അവര്‍ വാങ്ങുന്നത്. 15 മുതല്‍ 25 കോടി വരെ പ്രതിഫലം വാങ്ങുന്ന പ്രിയങ്ക ചോപ്രയാണ് പട്ടികയില്‍ മൂന്നാം സ്ഥാനത്ത്. കത്രീന കൈഫ് ആണ് നാലാം സ്ഥാനത്ത് (15മുതല്‍ 25 കോടി വരെ). 10 മുതല്‍ 20 കോടി വരെയാണ് ആലിയ ഭട്ട് വാങ്ങുന്നത്. പട്ടികയില്‍ അഞ്ചാം സ്ഥാനത്താണ് ആലിയ.

കരീന കപൂര്‍ എട്ട് കോടി മുതല്‍ 18കോടി വരെയാണ് ഒരു സിനിമയ്ക്ക് വാങ്ങുന്നത്. വിദ്യാ ബാലനും ഒരു സിനിമയ്ക്ക് എട്ട് കോടി മുതല്‍ 14 കോടി വരെ പ്രതിഫലം ലഭിക്കുമെന്നാണ് റിപ്പോര്‍ട്ട്. 2024ല്‍ ഏറ്റവും കൂടുതല്‍ പ്രതിഫലം വാങ്ങുന്ന 10 നടിമാരുടെ പട്ടികയില്‍ അനുഷ്‌ക ശര്‍മ്മയും ഐശ്വര്യ റായ് ബച്ചനും അവസാനമാണ്. എട്ട് മുതല്‍ 12 കോടിവരെയാണ് അനുഷ്‌ക വാങ്ങുന്നതെങ്കില്‍ ഐശ്വര്യ റായ് 10 കോടി രൂപയാണ് പ്രതിഫലമായി വാങ്ങുന്നത്.