പൊതുവേ സിനിമകളുടെ രണ്ടാംഭാഗം ചെയ്യാനിഷ്ടമല്ല; 'ബാഷ 2' എന്ന ആശയവും, 'പേട്ട 2'ന്റെ പ്രൊപ്പോസലും താന്‍ വേണ്ടെന്നു വെച്ചതാണ്; എന്നിട്ടും ജയിലര്‍ 2 ചെയ്തു; കാരണം വ്യക്തമാക്കി സൂപ്പര്‍സ്റ്റാര്‍ രജനീകാന്ത് 

സിനിമകളുടെ രണ്ടാം ഭാഗങ്ങള്‍ (സീക്വലുകള്‍) ചെയ്യുന്നതിനോട് പൊതുവേ തനിക്ക് താല്‍പ്പര്യമില്ലെന്ന് സൂപ്പര്‍താരം രജനീകാന്ത്. എന്നാല്‍ നെല്‍സണ്‍ ദിലീപ്കുമാറിന്റെ സംവിധാനത്തില്‍ എത്തിയ 'ജയിലര്‍' എന്ന ചിത്രത്തിന്റെ വിജയം ആ പതിവ് മാറ്റിവെക്കാന്‍ തന്നെ പ്രേരിപ്പിച്ചതായി താരം വ്യക്തമാക്കി. 'ജയിലര്‍ 2' ചിത്രത്തിന്റെ പ്രീ-റിലീസ് ചടങ്ങിലാണ് ടൈഗര്‍ മുത്തുേവല്‍ പാണ്ടിയന്റെ ലോകത്തേക്ക് തിരികെടാന്‍ ഉണ്ടായ കാരണം രജനീകാന്ത് തുറന്നുപറഞ്ഞത്. 

മുമ്പ് 'ബാഷ 2' എന്ന ആശയവും, കാര്‍ത്തിക് സുബ്ബരാജ് വിജയ് സേതുപതിയുടെ കഥാപാത്രത്തെ മുന്‍നിര്‍ത്തി അവതരിപ്പിച്ച 'പേട്ട 2'ന്റെ പ്രൊപ്പോസലും താന്‍ വേണ്ടെന്നു വെച്ചതാണെന്ന് രജനീകാന്ത് ഓര്‍മിച്ചു. ആദ്യ ഭാഗത്തിന്റെ വിജയത്തോടൊപ്പം കുറെക്കൂടി ഫ്ലേവര്‍ ചേര്‍ത്ത് മറ്റൊരു ചിത്രമാക്കി മാറ്റുക മാത്രമാണ് സീക്വലുകള്‍ ചെയ്യുമ്പോള്‍ സാധാരണയായി സംഭവിക്കാറുള്ളതെന്നാണ് തന്റെ വിശ്വാസമെന്നും അദ്ദേഹം കൂട്ടിച്ചേര്‍ത്തു. 

ജയിലര്‍ 2 വ്യത്യസ്തമാകുന്നത് എങ്ങനെയെന്ന് താരം വിശദീകരിക്കുന്നു: ചിത്രം ഒടിടിയില്‍ റിലീസ് ചെയ്തതിനുശേഷം താന്‍ വീണ്ടും കണ്ടപ്പോഴാണ് ഒരു രണ്ടാം ഭാഗത്തിനുള്ള സാധ്യതയെക്കുറിച്ച് ചിന്തിച്ചതെന്ന് രജനീകാന്ത് പറഞ്ഞു. ചിത്രത്തിന്റെ ക്ലൈമാക്സില്‍ വര്‍മയുടെ കഥാപാത്രം അവസാനിക്കാന്‍ നില്‍ക്കുമ്പോള്‍, തങ്ങള്‍ക്ക് പിന്നില്‍ വലിയൊരു അധോലോക ശൃംഖലയുണ്ടെന്നും അവരൊന്നും ജയിലറെ വെറുതെ വിടില്ലെന്നും ഓര്‍മിപ്പിക്കുന്ന രംഗമുണ്ട്. ഈ സംഭാഷണവും ചിത്രത്തിലുടനീളം നെല്‍സണ്‍ ഒളിപ്പിച്ചുവെച്ച സൂചനകളുമാണ് രണ്ടാം ഭാഗത്തിന് കൃത്യമായ അടിത്തറയിട്ടത്. 

പോലീസിനെപ്പോലും ഭയപ്പെടുത്തുന്ന അന്താരാഷ്ട്ര ബിസിനസ് ബന്ധങ്ങളും, ജയിലറുടെ പക്കലുള്ള കോടികള്‍ വിലമതിക്കുന്ന മൂന്ന് കണ്ടെയ്നറുകളും കഥയെ സ്വാഭാവികമായി അടുത്ത ഘട്ടത്തിലേക്ക് നയിക്കുന്നു. ഒപ്പം നാഗ്പൂര്‍ ജയിലിലുള്ള ശക്തരായ അധോലോക ഡോണുകളുടെ പിന്തുണയും ചേരുമ്പോള്‍ 'ജയിലര്‍ 2' കേവലം കാശുണ്ടാക്കാന്‍ വേണ്ടി മാത്രം ഉണ്ടാക്കിയ ഒരു തുടര്‍ച്ചയല്ലെന്ന് വ്യക്തമാകും. ഈ മികച്ച പ്ലോട്ട് ആണ് താന്‍ നെല്‍സണെ വിളിച്ച് സിനിമ ചെയ്യാന്‍ സമ്മതിക്കാന്‍ കാര്യമെന്നും താരം വ്യക്തമാക്കി.

ഒക്ടോബര്‍ 15-ന് തിയേറ്ററുകളിലെത്തുന്ന 'ജയിലര്‍ 2'ല്‍ രജനീകാെന്നിനൊപ്പം രമ്യാ കൃഷ്ണന്‍, യോഗി ബാബു, വിനായകന്‍, മിര്‍ന, റിത്വിക് എന്നിവര്‍ക്കൊപ്പം എസ്.ജെ. സൂര്യ, മിഥുന്‍ ചക്രവര്‍ത്തി, സുരാജ് വെഞ്ഞാറമൂട്, വിദ്യ ബാലന്‍, അന്നാ രാജന്‍, ജതിന്‍ സര്‍ണ തുടങ്ങിയവരും അണിനിരക്കുന്നുണ്ട്. മോഹന്‍ലാല്‍, ശിവരാജ്കുമാര്‍, ജാക്കി ഷെറോഫ് എന്നിവരും ചിത്രത്തില്‍ അതിഥി വേഷങ്ങളില്‍ തിരിച്ചെത്തുന്നുണ്ട്.