നിങ്ങള്‍ക്കൊപ്പമുള്ള ഓരോ യാത്രയും വിലമതിക്കുന്നു;ഭയപ്പെടുത്തുന്നവ പോലും; രാജ് കുന്ദ്രയ്‌ക്കൊപ്പം ഒരു റിക്ഷ റൈഡും ഒപ്പം അടിപൊളി പാട്ടും; ശില്പ ഷെട്ടി വിവാഹവാര്‍ഷികം ആഘോഷിച്ചത് ഇങ്ങനെ

ബോളിവുഡില്‍ വര്‍ഷങ്ങളായി തിളങ്ങി നില്‍ക്കുന്ന താരമാണ് ശില്പ ഷെട്ടി. റിയാലിറ്റി ഷോ ജഡ്ജായും ഫിറ്റ്‌നസ് വീഡിയോകള്‍ പങ്കിട്ട് സോഷ്യല്‍ മീഡിയകളിലും താരം നിറഞ്ഞു നില്‍ക്കാറുണ്ട്. ഇപ്പോഴിതാ രാജ് കുന്ദ്രയ്‌ക്കൊപ്പമുള്ള തന്റെ 15-ാം വിവാഹ വാര്‍ഷികത്തിന്റെ സന്തോഷം പങ്കിടുകയാണ് താരം. രാജിനൊപ്പമുള്ള ഓട്ടോ റിക്ഷ നൈറ്റ് റൈഡിന്റെ വീഡിയോയാണ് താരം പങ്കിട്ടിരിക്കുന്നത്. വീഡിയോയില്‍ രാജ് ശില്പയ്ക്ക് വേണ്ടി പാടുന്നതും കേള്‍ക്കാം. കൂടാതെ ബാക്ക് ഗ്രൗണ്ടില്‍ പഴയ ഹിന്ദി ഗാനങ്ങളും വീഡിയോയില്‍ കേള്‍ക്കാം. 

'15 വര്‍ഷവും... ഇനിയും എത്രയെന്നു എണ്ണുന്നില്ല...ഹാപ്പി ആനിവേഴ്‌സറി കുക്കി...നിങ്ങള്‍ക്കൊപ്പമുള്ള ഓരോ യാത്രയും വിലമതിക്കുന്നു, ഭയപ്പെടുത്തുന്നവ പോലും...ഇനിയും നിരവധി സാഹസിക യാത്രകളും റൈഡുകളും വര്‍ഷങ്ങളും ഇവിടെയുണ്ട്... ' എന്ന ക്യാപ്ഷന്‍ നല്‍കിയാണ് ശില്പ വീഡിയോ പങ്കിട്ടിരിക്കുന്നത്. 

വിഡിയോയ്ക്ക് താഴെ നിരവധി സഹപ്രവര്‍ത്തകരും ആരാധകരും താരദമ്പതിമാര്‍ക്ക് ആശംസകള്‍ കുറിക്കുന്നുണ്ട്.

നിരവധി ഹിറ്റ് ചിത്രങ്ങളുടെ ഭാഗമായ ശില്‍പ്പ ഡാന്‍സ് റിയാലിറ്റി ഷോയിലെ വിധികര്‍ത്താവ് കൂടിയായിരുന്നു. 2009-ലാണ് ശില്‍പ്പ ബിസിനസുകാരനായ രാജ് കുന്ദ്രയെ വിവാഹം ചെയ്തത്. ഐപിഎല്ലില്‍ രാജസ്ഥാന്‍ റോയല്‍സ് ടീമിന്റെ സഹ ഉടമ എന്ന നിലയില്‍ കായിക പ്രേമികള്‍ രാജിനെ ഓര്‍ക്കുന്നുണ്ടാകും. 15 വര്‍ഷം നീണ്ട ദാമ്പത്യ ജീവിതത്തിനിടെയില്‍ പല പരീക്ഷണഘട്ടങ്ങളിലൂടെയും കടന്ന് പോയെങ്കിലും ശില്‍പ-രാജ് ബന്ധം അനുദിനം ദൃഢമാകുന്ന കാഴ്ചയാണ് നാം കാണുന്നത്. 

ജീവിതത്തിലെ ചെറിയ ചെറിയ നിമിഷങ്ങള്‍ പോലും ആഘോഷമാക്കുന്ന ദമ്പതികള്‍ അതുകൊണ്ടാണ് തങ്ങളുടെ വിവാഹ വാര്‍ഷികം ഓട്ടോറിക്ഷയില്‍ ആഘോഷിക്കാന്‍ തീരുമാനിച്ചത്.ഈ വീഡിയോ വൈറലകാന്‍ കാരണം എന്താണെന്ന് ചോദിച്ചാല്‍ ശില്‍പ്പയുടെയും ഭര്‍ത്താവ് രാജ് കുന്ദ്രയുടെയും മൊത്തം ആസ്തി ഏകദേശം 3000 കോടി രൂപ വരും. കോടികള്‍ മുടക്കി സ്വന്തമാക്കിയ പ്രൈവറ്റ് ജെറ്റ് പോലും ഇവര്‍ക്കുണ്ട്. കോടികള്‍ വില മതിക്കുന്ന ലക്ഷ്വറി കാറുകളുടെ നിരയാണ് ഇവരുടെ ഗരാജില്‍ കാണാന്‍ സാധിക്കുക. കോടികള്‍ പൊടിച്ച് ആനിവേഴ്സറി രാത്രി ആഘോഷമാക്കാന്‍ ശേഷിയുള്ള ദമ്പതികള്‍ സാധാരണക്കാരെ പോലെ ഓട്ടോയില്‍ ചുറ്റിയടിക്കുന്നതാണ് ആരാധകര്‍ക്ക് ഇഷ്ടപ്പെട്ടത്.