പ്രണയവും പ്രതികാരവുമായി നീലി എത്തുന്നു; മംമ്ത മോഹൻദാസ് നായികയാവുന്ന നീലിയുടെ ട്രെയിലർ പുറത്തിറക്കി മമ്മൂട്ടി

പ്രണയവും പ്രതികാരവുമായി എത്തുകയാണ് 'നീലി'. നിലാവും നിശബ്ദതയും അരിച്ചിറങ്ങുന്ന തണുപ്പുമെല്ലാം അകമ്പടയായി എത്തുന്ന നീലിയടെ ട്രെയിലർ പുറത്തിറങ്ങി. മംമ്ത മോഹൻദാസ് നായികയാവുന്ന 'നീലി'യുടെ ട്രെയിലർ മമ്മൂട്ടിയാണ് തന്റെ ഫേസ്‌ബുക് പേജിലൂടെ റിലീസ് ചെയ്തത്.

'തോർത്ത്' എന്ന ഷോർട്ട് ഫിലിമിലൂടെ പ്രശസ്തനായ അൽത്താഫ് റഹ്മാനാണ് 'നീലി' സിനിമയുടെ സംവിധായകൻ. അനൂപ് മേനോൻ നായകനാകുന്ന ചിത്രത്തിന്റെ തിരക്കഥ ഒരുക്കിയിരിക്കുന്നത് റിയാസ് മാരാത്ത്, മുനീർ മുഹമ്മദുണ്ണി എന്നിവരാണ്.

ബാബുരാജ്, മറിമായം ശ്രീകുമാർ, സിനിൽ സൈനുദ്ദീൻ എന്നിവരാണ് ചിത്രത്തിലെ മറ്റ് പ്രധാന താരങ്ങൾ. സൺ ആൻഡ് ഫിലിംസിന്റെ ബാനറിൽ ഡോ. സുന്ദർ മേനോൻ നിർമ്മിക്കുന്ന ചിത്രം ഓഗസ്റ്റിൽ പുറത്തിറങ്ങും.

ചിത്രത്തിൽ മമ്ത ഒരു സ്പീച്ച് തെറാപ്പിസ്റ്റായാണ് എത്തുന്നത്. ആറേഴു വയസുള്ള ഒരു മകളുമുള്ള വിധവയാണ് ഈ കഥാപാത്രം. മമ്തയുടെ കഥാപാത്രത്തെ ചുറ്റിപ്പറ്റിയാണ് ചിത്രം പ്രധാനമായും മുന്നേറുന്നത്. അനൂപ് മേനോൻ ചിത്രത്തിൽ ഒരു പാരാ നോർമൽ ഗവേഷകന്റെ കഥാപാത്രമായാണ് എത്തുന്നത്.