മകന്റെ സിനിമാ ലൊക്കേഷനില്‍ ക്ലാപ് ബോയ് ആയും ലൊക്കേഷന്‍ മാനേജര്‍ ആയും സംവിധാന സഹായിയായും ഓടി നടന്ന് വിക്രമും;  ജീവിതത്തില്‍ പലപ്പോഴും പ്രതീക്ഷയറ്റ് നിന്നപ്പോള്‍ വഴി കാണിച്ചത് ഈ മനുഷ്യനെന്ന് കുറിച്ച് അച്ഛനൊപ്പമുള്ള ലൊക്കേഷന്‍ ചിത്രങ്ങള്‍ പങ്ക് വച്ച് ധ്രുവ്

വികമിന്റെ മകന്‍ ധ്രുവ് വിക്രം നായകനാവുന്ന തമിഴ് ചിത്രം ആദിത്യ വര്‍മ്മ ഏറെ പ്രതീക്ഷയുയര്‍ത്തുന്ന ചിത്രമാണ്. ചിത്രത്തിന് പിന്നില്‍ പിതാവായ വിക്രമിന്റെ സാന്നിധ്യമുണ്ടെന്ന് ധ്രുവ് വിക്രം പല അഭിമുഖങ്ങളിലും തുറന്നുപറഞ്ഞിട്ടുമുണ്ട്. ഇപ്പോളിതാ സോഷ്യല്‍മീഡിയയില്‍ ശ്രദ്ധ നേടുകയാണ് വിക്രവും മകന്‍ ധ്രുവ് വിക്രവും ഒരുമിച്ചുള്ള ചില സ്നേഹനിമിഷങ്ങളുടെ ചിത്രങ്ങള്‍. ആദിത്യ വര്‍മയുടെ സെറ്റില്‍ നിന്നുള്ള അച്ഛന്റെയും മകന്റെയും ചിത്രങ്ങളാണ് സമൂഹമാധ്യമങ്ങളില്‍ ഇപ്പോള്‍ തരംഗമാകുന്നത്.ട

സ്വന്തം സിനിമയുടെ തിരക്കുകള്‍ പോലും മാറ്റിവച്ചാണ് വിക്രം മകന്റെ സിനിമയ്ക്കായി സഹകരിച്ചത്. ചിത്രീകരണവേളയില്‍ക്ലാപ് ബോയ് ആയും ലൊക്കേഷന്‍ മാനേജര്‍ ആയും സംവിധാന സഹായി ആയിമൊക്കെ വിക്രത്തെ സെറ്റില്‍ കാണാമായിരുന്നു. ചില രംഗങ്ങള്‍ എങ്ങനെ അഭിനയിക്കണമെന്ന് മകന് പറഞ്ഞുനല്‍കാനും വിക്രം ശ്രമിച്ചിട്ടുണ്ട്.തന്റെ സിനിമയ്ക്കായി അച്ഛന്‍ ത്യജിച്ച സമയവും പരിശ്രമമും മറ്റൊരു സിനിമയ്ക്കും ഉപയോഗിച്ചുകാണില്ല എന്നാണ് ധ്രുവിന്റെ വാക്കുകള്‍.

ഇപ്പോള്‍ ജീവിതത്തില്‍ എന്തെങ്കിലുമാണെങ്കില്‍ അതെല്ലാം തന്റെ അച്ഛന്റെ പരിശ്രമത്തിന്റെയും ആദിത്യ വര്‍മ്മ എന്ന ഈ ചിത്രം പുറത്തിറക്കണം എന്ന വാശിയുടെയും ഫലമാണ് എന്നാണ് ധ്രുവ് പറയുന്നത്. താന്‍ പലപ്പോഴും പ്രതീക്ഷയറ്റു നിന്നപ്പോഴും തനിക്കു വഴി കാണിച്ചു മുന്നില്‍ നിന്നതു അച്ഛന്‍ ആണെന്നും ധ്രുവ് തുറന്നു പറയുന്നു.ആദിത്യ വര്‍മ്മ ഒരു റീമേക്ക് ആണെങ്കിലും താന്‍ എന്നും ആരാധിച്ച തന്റെ അച്ഛന്റെ കൂടെ ജോലി ചെയ്തു, ആ മനുഷ്യനില്‍ നിന്ന് ഏറെ പഠിക്കാന്‍ സഹായിച്ചത് ഈ ചിത്രമാണെന്നും അത് കൊണ്ട് തന്നെ ആദിത്യ വര്‍മ്മ എന്നും തന്റെ ഹൃദയത്തോട് ചേര്‍ന്ന് നില്‍ക്കുമെന്നും ധ്രുവ് ഇന്‍സ്റ്റഗ്രാമില്‍ പങ്ക് വച്ച് കുറിപ്പിലൂടെ പറയുന്നു.

അച്ഛന്റെ വിഷന്‍ ആണ് തന്നെ ഇവിടെ എത്തിച്ചത് എന്നും അത് കൊണ്ട് തന്നെ അച്ഛന്റെ സ്വപ്നങ്ങള്‍ പൂര്‍ത്തീകരിക്കാന്‍ താന്‍ എത്ര വേണമെങ്കിലും പരിശ്രമിക്കുമെന്നും ധ്രുവ് പറയുന്നു. അച്ഛനെ പോലെ ഒരു ഇതിഹാസമാകാന്‍ നിക്കു ഒരിക്കലും കഴിയില്ല എന്നും ധ്രുവ് വിക്രം ആരാധകരോട് പറയുന്നു.

ആദിത്യ വര്‍മയുടെ സെറ്റില്‍ എല്ലാ ദിവസവും എത്തിയിരുന്ന അച്ഛന്‍ ചെറിയ കാര്യങ്ങളില്‍പ്പോലും ശ്രദ്ധിച്ചിരുന്നതായി ധ്രുവ് നേരത്തെ പറഞ്ഞിരുന്നു. അച്ഛന്‍ നല്ല നടനാണെന്ന് എനിക്കറിയാം, അതിലുപരി നല്ല അച്ഛന്‍ കൂടിയാണ് അദ്ദേഹം. അപ്പയില്ലാതെ ഞാന്‍ ഒന്നുമില്ല. എന്റെ അഭിനയവും സംസാരവും നടപ്പവുമൊക്കെ അപ്പ തന്നെയാണ്. അപ്പയുടെ മറ്റൊരു അവതാരത്തെയാണ് നിങ്ങള്‍ കാണുന്നത്. അദ്ദേഹത്തിനൊരു 22 വയസ്സിരുന്നാല്‍ എന്ത് ചെയ്യുമോ അത് തന്നെയാണ് സിനിമയില്‍ അഭിനയിച്ചരിക്കുന്നത് ആദിത്യ വര്‍മയുടെ ഓഡിയോ ലോഞ്ചില്‍ ധ്രുവ് പറഞ്ഞിരുന്നു.