സിനിമയ്ക്കായി കാരാട്ടെ പഠിച്ചെടുക്കുന്ന ഫഹദിന്റെ ചിത്രം പങ്ക് വച്ച് അണിയറപ്രവര്‍ത്തകര്‍; പ്രേമലുവിന്റെ വിജയത്തിന് പിന്നാലെ കരാട്ടെ ചന്ദ്രന്റെ വിശേഷം പങ്ക് വച്ച് ഭാവന സ്റ്റുഡിയോസ്

പ്രേമലു നേടുന്ന വിജയത്തിനു പിന്നാലെ പുതിയ ചിത്രം പ്രഖ്യാപിച്ച് ഭാവന സ്റ്റുഡിയോസ് . കരാട്ടെ ചന്ദ്രന്‍ എന്നു പേരിട്ട ചിത്രത്തില്‍ ഫഹദ് ഫാസിലാണ് നായകന്‍. പ്രേമലു നന്ദിലു, ഭാവന സ്റ്റുഡിയോസിന്റെ അടുത്ത ചിത്രത്തിന്റെ വിവരങ്ങള്‍ ഈ നല്ല സമയത്ത് പങ്കുവെക്കാന്‍ ആഗ്രഹിക്കുകയാണ്. കരാട്ടെ ചന്ദ്രന്‍.', ഫഹദ് ഫേസ്ബുക്കില്‍ കുറിച്ചു. 

'മഹേഷിന്റെ പ്രതികാരം' എന്ന ചിത്രത്തില്‍ അസ്സോസിയേറ്റ് സംവിധായകന്‍ ആയിട്ടും ജോജിയില്‍ കോ ഡയറക്ടര്‍ ആയും പ്രവര്‍ത്തിച്ച റോയ് ആണ് ചിത്രം സംവിധാനം ചെയ്യുന്നത്. എസ് ഹരീഷും വിനോയ് തോമസും ചേര്‍ന്ന് തിരക്കഥ രചിക്കുന്ന ചിത്രത്തിന്റെ ട്രയല്‍ വേഷത്തിലാണ് നടന്‍ ഫോട്ടോസ് പങ്കുവെച്ചിരിക്കുന്നത്.

സിനിമയുടെ പ്രഖ്യാപനത്തിനോടൊപ്പം ചിത്രത്തിലെ ഫഹദിന്റെ കോസ്റ്റ്യൂം ട്രയല്‍ ചിത്രങ്ങളും അണിയറ പ്രവര്‍ത്തകര്‍ പുറത്ത് വിട്ടിട്ടുണ്ട്. അതേസമയം ചിത്രത്തിന്റെ മറ്റ് അണിയറപ്രവര്‍ത്തകരുടെ വിവരങ്ങള്‍ ഇതുവരെ പുറത്തുവിട്ടിട്ടില്ല.

അതേസമയം, ഭാവന സ്റ്റുഡിയോസിന്റെ ബാനറില്‍ ഫഹദ് ഫാസിലും ദിലീഷ് പോത്തനും ശ്യാം പുഷ്‌കരനും ചേര്‍ന്ന് നിര്‍മ്മിച്ച 'പ്രേമലു' വിജകരമായി പ്രദര്‍ശനം തുടരുകയാണ്. ഗിരീഷ് എ ഡി സംവിധാനത്തില്‍ മമിത ബൈജുവും നസ്‌ലെനും പ്രധാന കഥാപാത്രങ്ങളായെത്തിയ ചിത്രത്തിന് മികച്ച പ്രേക്ഷക പ്രതികരണമാണ് ലഭിച്ചുകൊണ്ടിരിക്കുന്നത്. ചില തിയേറ്ററുകളില്‍ ഷോയുടെ എണ്ണം തിരക്ക് കാരണം വര്‍ധിപ്പിച്ചുവെന്നാണ് റിപ്പോര്‍ട്ട്.