ആക്ഷന്‍ ത്രില്ലറുമായി നടി തൃഷ ഒപ്പം അനശ്വര രാജനും;ആക്ഷന്‍ രംഗങ്ങളുമായി രാംഗി 30 ന് തിയറ്ററുകളില്‍

തെന്നിന്ത്യന്‍ പ്രേക്ഷകരുടെ താരറാണിയായ  തൃഷയുടെ ഏറ്റവും പുതിയ ആക്ഷന്‍ ചിത്രമാണ് രാംഗി. ഇപ്പോഴിതാ ചിത്രത്തിന്റെ റിലീസ് തീയതി അണിയറ പ്രവര്‍ത്തകര്‍ പ്രഖ്യാപിച്ചിരിക്കുകയാണ്. ഡിസംബര്‍ 30ന് ചിത്രം തിയേറ്ററില്‍ എത്തും എന്നാണ് ചിത്രത്തിന്റെ അണിയറ പ്രവര്‍ത്തകര്‍ അറിയിച്ചിട്ടുള്ളത്. 

എങ്കിലും എപ്പോഴും എന്ന ഹിറ്റ് ചിത്രത്തിനുശേഷം എം ശരവണന്റെ സംവിധാനത്തില്‍ ഒരുങ്ങുന്ന തൃഷ ചിത്രമാണ് രാംഗി.പ്രമുഖ സംവിധായകനായ എ ആര്‍ മുരുഗദോസിന്റെ കഥയ്ക്കാണ്  എം ശരവണന്‍ തിരക്കഥയും സംഭാഷണവും ഒരുക്കിയിട്ടുള്ളത്. ചിത്രത്തിന്റെ ഛായാഗ്രഹണം നിര്‍വഹിക്കുന്നത് ശക്തിയാണ്. ഒരു ആക്ഷന്‍ ത്രില്ലര്‍ ഗണത്തില്‍പ്പെട്ട ചിത്രമാണ് രാംഗി. 

സംഗീതസംവിധാനം നിര്‍വഹിക്കുന്നത് സി സത്യയാണ്. മലയാളി താരമായ അനശ്വര രാജനും ചിത്രത്തില്‍ ഒരു കഥാപാത്രമായി എത്തുന്നുണ്ട്. പല തവണയായി റിലീസ് നീണ്ടു പേയിരുന്ന ചിത്രമാണ് രാംഗി. ചിത്രത്തിന്റെ ടീസര്‍ 2019 ല്‍ ചിത്രത്തിന്റെ അണിയറ പ്രവര്‍ത്തകര്‍ പുറത്തു വിട്ടിരുന്നു. എതിരാളികളെ നേരിടുന്ന തൃഷയുടെ ആക്ഷന്‍ രംഗങ്ങളായിരുന്നു ടീസറിന്റെ ഹൈലൈറ്റ്.

തൃഷ പ്രധാന കഥാപാത്രമായി  അവതരിച്ച ചിത്രമായ പൊന്നിയന്‍ സെല്‍വനിലൂടെയാണ് താരം  ഏറ്റവും ഒടുവില്‍  പ്രേക്ഷകര്‍ക്കു മുന്നിലെത്തിയത്. ഇതിഹാസ സാഹിത്യകാരന്‍ കല്‍ക്കിയുടെ വിശ്വ പ്രസിദ്ധമായ ചരിത്ര നോവലിനെ ആധാരമാക്കി മണിരത്നത്തിന്റെ  സംവിധാനത്തില്‍ ഒരുങ്ങിയ ചിത്രമായിരുന്നു  'പൊന്നിയിന്‍ സെല്‍വന്‍'. ചിത്രം വളരെ പെട്ടെന്നു തന്നെ വന്‍ ഹിറ്റായി മാറിയിരുന്നു. ചിത്രത്തില്‍ വലിയ താരനിരയാണ് അണിനിരന്നത്. ചോഴ രാജകുമാരിയായ 'കുന്ദവൈ' എന്ന കഥാപാത്രത്തെയാണ് ചിത്രത്തില്‍  തൃഷ അവതരിപ്പിച്ചിരുന്നത്.

തൃഷയ്ക്ക് പുറമേ വിക്രം , ജയം രവി, കാര്‍ത്തി, റഹ്മാന്‍, പ്രഭു, ശരത് കുമാര്‍, ജയറാം, പ്രകാശ് രാജ്, ലാല്‍, വിക്രം പ്രഭു, പാര്‍ത്ഥിപന്‍, ബാബു ആന്റണി, അശ്വിന്‍ കാകുമാനു, റിയാസ് ഖാന്‍, ഐശ്വര്യാ റായ് ബച്ചന്‍, ശോഭിതാ ദുലിപാല, ജയചിത്ര തുടങ്ങിവര്‍ ചിത്രത്തില്‍ അഭിനയിച്ചിരുന്നു. 'ആദിത്യ കരികാലന്‍' എന്ന കഥാപാത്രത്തെ വിക്രം അവതരിപ്പിച്ചു.ചിത്രത്തിന്റെ  ഛായാഗ്രഹണം രവി വര്‍മ്മന്‍ ആണ് നിര്‍വഹിക്കുന്നത്. തോട്ട ധരണിയും വാസിം ഖാനും കലാ സംവിധാനവും ശ്യാം കൗശല്‍ ആക്ഷന്‍ കൊറിയോഗ്രഫിയും നിര്‍വഹിച്ചു.