പുഴ എങ്ങിനെ ഒഴുകിയാലും കടലില്ലാതെ എവിടെയെത്താനാണ്'! എന്തൊരു ചേലാണ്, നെഞ്ചില് നേരാണ്... എന്റെ കിനാവാണ് എന്തിനും നീയാണ്... ഞാനും എന്റെ ചേച്ചിയും, ലക്ഷ്മിയും, ലേഖയും; ചേച്ചിയെ ചേര്‍ത്തുപിടിച്ച് എം.ജി; അകല്‍ച്ചയുടെ പ്രചരണങ്ങള്‍ക്ക് വിരാമം, മേടയില്‍ വീട്ടില്‍ വീണ്ടും സംഗീത താളലയം

സംഗീത പ്രേമികള്‍ക്കും ആരാധകര്‍ക്കും ഒരുപോലെ സന്തോഷം നല്‍കുന്ന ഹൃദ്യമായ ഒരു ചിത്രം പങ്കുവെച്ചിരിക്കുകയാണ് മലയാളത്തിന്റെ പ്രിയ ഗായകന്‍ എം.ജി. ശ്രീകുമാര്‍. ദീര്‍ഘകാലമായി നിലനിന്നിരുന്ന കുടുംബപരമായ അകല്‍ച്ചയെക്കുറിച്ചുള്ള വാര്‍ത്തകള്‍ക്ക് വിരാമമിട്ടുകൊണ്ട്, തന്റെ ജ്യേഷ്ഠസഹോദരിയും പ്രശസ്ത സംഗീതജ്ഞയുമായ കെ. ഓമനക്കുട്ടിക്കൊപ്പമുള്ള ചിത്രമാണ് അദ്ദേഹം സോഷ്യല്‍ മീഡിയയില്‍ പോസ്റ്റ് ചെയ്തത്. 'എന്തൊരു ചേലാണ്, നെഞ്ചില് നേരാണ്, എന്റെ കിനാവാണ് എന്തിനും നീയാണ്... ഞാനും എന്റെ ചേച്ചിയും, ലക്ഷ്മിയും, ലേഖയും' എന്ന മനോഹരമായ വരികളോടെയാണ് എം.ജി ചിത്രം പങ്കുവെച്ചത്. 

 മലയാള സംഗീത ലോകത്തെ പ്രശസ്തമായ 'മേടയില്‍' കുടുംബത്തില്‍ എം.ജി. ശ്രീകുമാറും സഹോദരി ഓമനക്കുട്ടിയും തമ്മില്‍ വര്‍ഷങ്ങളായി പിണക്കത്തിലാണെന്ന തരത്തില്‍ വലിയ തോതിലുള്ള പ്രചരണങ്ങള്‍ ഉണ്ടായിരുന്നു. ജ്യേഷ്ഠനും സംഗീത സംവിധായകനുമായ എം.ജി. രാധാകൃഷ്ണന്റെ മരണസമയത്ത് പോലും എം.ജി. ശ്രീകുമാര്‍ കുടുംബവീട്ടില്‍ എത്തിയില്ല എന്നത് ഈ അഭ്യൂഹങ്ങള്‍ക്ക് ആക്കം കൂട്ടി. അന്ന് അമേരിക്കയിലെ ഒരു പരിപാടിയിലായിരുന്നതിനാലാണ് എത്താന്‍ കഴിയാതിരുന്നതെന്ന് അദ്ദേഹം പിന്നീട് വ്യക്തമാക്കിയെങ്കിലും സോഷ്യല്‍ മീഡിയയിലും മറ്റും വിവാദങ്ങള്‍ കെട്ടടങ്ങിയിരുന്നില്ല. 

എന്നാല്‍, ആ വാര്‍ത്തകളെല്ലാം വെറും കെട്ടുകഥകളാണെന്ന് തെളിയിക്കുന്നതാണ് പുതിയ ചിത്രം. കെ. ഓമനക്കുട്ടിയുടെ മകളും യുവ ഗായകന്‍ കെ.എസ്. ഹരിശങ്കറിന്റെ അമ്മയുമായ ലേഖയും ചിത്രത്തിലുണ്ട്. എം.ജി. ശ്രീകുമാറിന്റെ ഭാര്യ ലേഖ ശ്രീകുമാറും കുടുംബാംഗങ്ങളും ഒത്തുകൂടിയ ഈ നിമിഷം ആരാധകര്‍ ഇരുകൈയ്യും നീട്ടിയാണ് സ്വീകരിച്ചിരിക്കുന്നത്. 'പുഴ എങ്ങിനെ ഒഴുകിയാലും കടലില്ലാതെ എവിടെയെത്താനാണ്' എന്ന ആരാധകന്റെ കമന്റ് ഈ ഒത്തുചേരലിന്റെ ആഴം വ്യക്തമാക്കുന്നു.

 സംഗീത കുടുംബത്തിലെ ഈ കൂടിച്ചേരല്‍ വലിയൊരു മാറ്റത്തിന് വഴിയൊരുക്കുമെന്ന പ്രതീക്ഷയിലാണ് സംഗീത ലോകം. മലയാളത്തിലെ ഇന്നത്തെ തിരക്കുള്ള ഗായകരില്‍ ഒരാളായ ഹരിശങ്കറും എം.ജി. ശ്രീകുമാറും ഉടന്‍ തന്നെ ഒരു ഗാനത്തിനായി ഒന്നിച്ചേക്കാം എന്ന സൂചനകളും ഉയരുന്നുണ്ട്. കുടുംബാംഗങ്ങള്‍ക്കിടയിലുണ്ടായ മഞ്ഞുരുകല്‍ മേടയില്‍ വീട്ടില്‍ വീണ്ടും പഴയ കാലത്തെ താളലയങ്ങള്‍ തിരികെ കൊണ്ടുവരികയാണ്. 

'രണ്ടുപേരുടെയും സംഗീതവിരുന്ന് കൂടി കണ്ടാല്‍ മനസ്സ് നിറയും' എന്നാണ് പലരും ചിത്രത്തിന് താഴെ കുറിക്കുന്നത്. തെന്നിന്ത്യന്‍ സംഗീതത്തിലെ അതികായരായ ഈ സഹോദരങ്ങള്‍ ഒരേ ഫ്രെയിമില്‍ എത്തിയതോടെ സൈബര്‍ ഇടങ്ങളില്‍ ഈ ചിത്രം തരംഗമായിക്കഴിഞ്ഞു. കണ്‍കുളിര്‍ക്കുന്ന ഈ കാഴ്ച മലയാള സംഗീതത്തിലെ തന്നെ ഏറ്റവും വലിയ സന്തോഷവാര്‍ത്തകളില്‍ ഒന്നായി മാറുകയാണ്.