മധുരരാജയുടെ പോസ്റ്ററിൽ സണ്ണിലിയോൺ വന്നതെങ്ങനെയെന്ന് അറിയാൻ സൈബർ സെല്ലിന്റെ സഹായം തേടി അണിയറ പ്രവർത്തകർ; പോസ്റ്ററുകൾ വ്യാജമെന്നും വിശദീകരണം; സമൂഹമാധ്യമങ്ങളിൽ വ്യാജ പോസ്റ്റർ പ്രചരിച്ചത് ഔദ്യോഗിക പോസ്റ്റർ എന്ന വ്യാജേന

മധുരരാജയുടെ ഔദ്യോഗിക പോസ്റ്റർ എന്ന വ്യാജേന സണ്ണിലിയോണിന്റെ പോസ്റ്റർ സമൂഹ മാധ്യമങ്ങളിലൂടെ പ്രചരിപ്പിച്ചതിനെതിരെ സൈബർ സെല്ലിൽ പരാതി നൽകി ചിത്രത്തിന്റെ അണിയറ പ്രവർത്തകർ. മധുരരാജയിലെ എന്ന പേരിൽ സണ്ണി ലിയോണിന്റേതായി പുറത്തു വന്ന പോസ്റ്ററുകൾ വ്യാജമാണെും ചിത്രത്തിന്റെ അണിയറ പ്രവർത്തകർ വ്യക്തമാക്കി. സണ്ണി ലിയോണിന്റെ ഔദ്യോഗിക പോസ്റ്റർ പുറത്തു വിട്ടട്ടില്ലെന്നും സിനിമയെ ആക്ഷേപിക്കാനും താഴ്‌ത്തിക്കെട്ടാനുമുള്ള ഇത്തരം നീക്കത്തിനെതിരെ സൈബർ സെല്ലിൽ പരാതിപ്പെട്ടിട്ടുണ്ടെന്നും ഔദ്യോഗിക വൃത്തങ്ങൾ അറിയിച്ചു. സണ്ണി ലിയോണിന്റെ ചിത്രം ഉൾപ്പെടുത്തി മധുരരാജയുടെ ഔദ്യോഗിക പോസ്റ്റർ എന്ന രീതിയിൽ വ്യാജ പോസ്റ്റർ വ്യാപകമായി പ്രചരിച്ചതോടെയാണ് സ്ഥിരീകരണവുമായി അണിയറ പ്രവർത്തകർ രംഗത്തെത്തിയിരിക്കുന്നത്.

മമ്മൂട്ടിക്കൊപ്പമുള്ള സണ്ണിയുടെ ചിത്രം സോഷ്യൽ മീഡിയയിൽ വൈറലായിരുന്നു. ചിത്രത്തിലെ ഒരു ഗാനരംഗത്തിലാണ് സണ്ണി ലിയോൺ അഭിനയിക്കുന്നത്. ചിത്രത്തിന്റെ പ്രൊമോഷൻ പരിപാടികളും പൊടിപൊടിക്കുകയാണ്. പോക്കിരിരാജയുടെ രണ്ടാം ഭാഗമാണ് മധുരരാജ. വൈശാഖ് സംവിധാനം ചെയ്യുന്ന ചിത്രത്തിൽ മമ്മൂട്ടിക്കൊപ്പം തമിഴ് താരം ജയ്യും പ്രധാന വേഷത്തിലെത്തുന്നു.

ഉദയകൃഷ്ണയാണ് ചിത്രത്തിന് തിരക്കഥ ഒരുക്കുന്നത്. വമ്പൻ ബജറ്റിൽ ഒരുങ്ങുന്ന ചിത്രം നിർമ്മിക്കുന്നത് നെൽസൺ ഐപ്പാണ്. നെടുമുടി വേണു, സിദ്ദിഖ്, സലിം കുമാർ, വിജയരാഘവൻ, അജു വർഗീസ്, ജയ്, ജഗപതി ബാബു, നരേൻ, രമേശ് പിഷാരടി, കലാഭവൻ ഷാജോൺ, നോബി, ജോൺ കൈപ്പള്ളിൽ, സന്തോഷ് കീഴാറ്റൂർ, അനുശ്രീ, മഹിമ നമ്പ്യാർ, ഷംന കാസിം, രേഷ്മ അന്ന രാജൻ, തെസ്‌നി ഖാൻ, പ്രിയങ്ക എന്നിവർ പ്രധാന കഥാപാത്രങ്ങളെ അവതരിപ്പിക്കുന്നു. ചിത്രം ഏപ്രിൽ 12 ന് തിയേറ്ററുകളിലെത്തും. ചിത്രത്തിന്റെ റിലീസിങ് അടുത്തതോടെ ഏറെ ആവേശത്തിലാണ് ആരാധകർ.