സംവിധായകന്‍ അരുണ്‍ ഗോപി സഞ്ചരിച്ച ബിഎംഡബ്ല്യു കാര്‍ അപകടത്തില്‍ പെട്ടു; മദ്യലഹരിയില്‍ ഡ്രൈവര്‍ ഓടിച്ച ലോറി കാറിലേക്ക് പാഞ്ഞു കയറി; രാമലീല സംവിധായകന്‍ രക്ഷപെട്ടത് തലനാരിഴയ്ക്ക്‌

ദിലീപ് ചിത്രമായ രാമലീലയിലുടെ പ്രേക്ഷകരുടെ പ്രിയപ്പെട്ട സംവിധായകനായി മാറിയ ആളാണ് അരുൺഗോപി. രാമലീലയ്ക്ക് ശേഷം സംവിധാനം ചെയ്ത പ്രണവ് മോഹൻലാൽ ചിത്രം ഇരുപത്തിയൊന്നാം നൂറ്റാണ്ടും വിജയത്തോടെയാണ് മുന്നേറിയത്. സോഷ്യൽ മീഡിയയിൽ തന്റെ എല്ലാ വിശേഷങ്ങളും പങ്കുവയ്ക്കാറുള്ള അരുൺഗോപി തന്റെ ഉറ്റ സുഹൃത്തും നടിയുമായ മീരാ ജാസ്മീനൊപ്പം നിന്ന് പകർത്തിയ സെൽഫിയും കഴിഞ്ഞ ദിവസം സോഷ്യൽ മീഡിയയിൽ പങ്കുവച്ചിരുന്നു. ഇത് വൈറലായി മാറിയിരുന്നു. എന്നാൽ ഇപ്പോൾ അരുൺ ഗോപിയുടെ കാർ അപകടത്തിൽ പെട്ടു എന്ന വാർത്തയാണ് സിനിമാലോകത്തെ ഞെട്ടിരിക്കുന്നത്.

ഇന്നലെ രാത്രിയാണ് അരുൺ ഗോപി സഞ്ചിരിച്ച കാർ ആക്‌സിഡന്റ് ആയത്. തലനാരിഴയ്ക്കാണ് സംവിധായകൻ രക്ഷപ്പെട്ടത്. അരുൺഗോപിയുടെ ബിഎംഡബ്ല്യുവിലേക്ക് ഒരു ലോറി ഇടിച്ച് കയറിയാണ് അപകടമുണ്ടായത്. ഇന്നലെ രാത്രി പത്തേമുക്കാലോടെ കൊച്ചി മരടിന് സമീപമായിട്ടാണ് അപകടമുണ്ടായത്. അരൂരിൽ നിന്ന് കുടുംബവുമായി കൊച്ചിയിലെ വീട്ടിലേക്ക് പോകുമ്പോൾ രാത്രി 10.45 നാണ് അപകടം. കൊച്ചി ലേമെർഡിയൻ ഹോട്ടലിന് മുന്നിലെ പാലത്തിൽ വെച്ച് പുറകിൽ നിന്നു അമിത വേഗത്തിൽ എത്തിയ ലോറി മറ്റൊരു കാറിനെ മറികടക്കാൻ ശ്രമിക്കവേ അരുൺ സഞ്ചരിച്ചിരുന്ന വാഹനത്തിൽ ഇടിക്കുകയായിരുന്നു.

വാഹനമിടിച്ചതറിഞ്ഞെങ്കിലും ലോറിയുടെ ഡ്രൈവർ നിർത്താതെ പോയി. തുടർന്നു പൊലീസിന്റെ സഹായത്തോടെ ലോറിയെ പിന്തുടർന്നു പിടിച്ചു. ഇടിയുടെ ശക്തിയിൽ ബിഎംഡബ്ല്യുവിന്റെ ഒരു ഭാഗം തകർന്നു. മദ്യപിച്ച് ബോധമില്ലാതെ ഡ്രൈവർ ലോറി ഓടിച്ചതാണ് അപകടത്തിന് കാരണമായത്. സംഭവത്തിൽ ഡ്രൈവർക്കെതിരെ മരട് പൊലീസിൽ സംവിധായകർ പരാതി നൽകി.

ബിഎംഡബ്യു കാർ ആയതിനാൽ മാത്രമാണ് താൻ രക്ഷപ്പെട്ടതെന്ന് സംഭവത്തിന് ശേഷം അരുൺ ഗോപി പ്രതികരിച്ചു. ചുരുങ്ങിയ ചിത്രങ്ങൾ സംവിധാനം ചെയ്ത് മലയാളത്തിലെ ഹിറ്റ് സംവിധായകരുടെ പട്ടികയിൽ ഇടം നേടിയ താരമാണ് അരുൺഗോപി. ദിലീപിനെ നായകനാക്കി സംവിധാനം ചെയ്ത രാമലീല തകർപ്പൻ വിജയമാണ് നേടിയെടുത്തത്. രാമലീലയ്ക്ക് ശേഷം പ്രണവ്  മോഹൻലാലിനെ നായകനാക്കി ആക്ഷൻ എന്റർടെയ്ന്മെന്റ് ഒരുക്കിയ ഇരുപത്തിയൊന്നാം നൂറ്റാണ്ടും തീയറ്ററുകളിൽ നിറഞ്ഞോടിയിരുന്നു.

നീണ്ടനാളത്തെ പ്രണയത്തിനൊടുവിൽ അരുൺഗോപി രണ്ട് മാസങ്ങൾക്ക് മുൻപാണ് വിവാഹിതനായത്. സെന്റ് തെരേസാസ് കോളജ് അദ്ധ്യാപികയായ കൊച്ചി വൈറ്റില സ്വദേശിനി സൗമ്യ ജോണാണ് ഭാര്യ. ഹിന്ദു ക്രിസ്ത്യൻ മാരേജ് ആയതിനാൽ പ്രത്യേക ഉടമ്പടികൾ പ്രകാരം ക്രിസ്തീയ ആചാരപ്രകാരമായിരുന്നു വിവാഹച്ചടങ്ങുകൾ നടന്നത്.