അല്ലുവിനും ഭാര്യയ്ക്കുമെതിരേ അധിക്ഷേപ വീഡിയോ; യൂട്യൂബ് ചാനല്‍ ഉടമയെക്കൊണ്ട് മാപ്പ് പറയിപ്പിച്ച് ആരാധകര്‍

അല്ലു അര്‍ജുനും ഭാര്യയ്ക്കുമെതിരേ അധിക്ഷേപ വീഡിയോ നിര്‍മിച്ചെന്ന് ആരോപിച്ച് യുട്യൂബ് ചാനലിനെതിരേ രംഗത്തെത്തി ആരാധകര്‍. ഹൈദരാബാദിലെ റെഡ് ടിവിയെന്ന യുട്യൂബ് ചാനലിനെതിരെയാണ് ആരാധകര്‍ പ്രതിഷേധം ഉയര്‍ത്തിയത്. അല്ലുവിനെതിരെയും കുടുംബത്തിനെതിരെയും യുട്യൂബ് ചാനല്‍ ഉടമ കഴിഞ്ഞ കുറച്ച് മാസങ്ങളായി മോശം വീഡിയോകള്‍ പങ്കുവെക്കുന്നുണ്ട് എന്നാണ് ആരാധകരുടെ ആരോപണം.

അല്ലുവിനെതിരെയുള്ള മോശം വീഡിയോകള്‍ പിന്‍വലിക്കണമെന്ന് ആവശ്യപ്പെട്ട ആരാധകര്‍ യുട്യൂബ് ചാനല്‍ ഉടമയെക്കൊണ്ട് മാപ്പ് പറയിപ്പിക്കുകയും ചെയ്തു. ഇതിന്റെ ദൃശ്യങ്ങളും ആരാധകര്‍ സമൂഹ മാധ്യമങ്ങളിലൂടെ പങ്കുവെച്ചിട്ടുണ്ട്. സോഷ്യല്‍ മീഡിയയെ സുരക്ഷിതമായി ഉപയോഗിക്കണമെന്നും ഇത്തരം അധിക്ഷേപങ്ങള്‍ക്കെതിരെ ശക്തമായി പ്രതികരിക്കുമെന്നും ആരാധകര്‍ മുന്നറിയിപ്പ് നല്‍കുന്നുമുണ്ട്.

അതേസമയം അല്ലു അര്‍ജുന്റെ പുതിയ ചിത്രം പുഷ്പ 2 അടുത്ത മാസം റിലീസിന് ഒരുങ്ങുകയാണ്. സുകുമാര്‍ സംവിധാനം ചെയ്യുന്ന ചിത്രം അടുത്ത മാസം അഞ്ചിന് തിയേറ്ററുകളില്‍ എത്തും. പുഷ്പയുടെ തിയേറ്റര്‍ അവകാശം വിറ്റഴിച്ചത് 600 കോടി രൂപയ്ക്കാണെന്നും ഓവര്‍സീസിലൂടെ മാത്രം 125 കോടി രൂപ സ്വന്തമാക്കിയെന്നും ഇ ടൈംസ് മുന്‍പ് റിപ്പോര്‍ട്ട് ചെയ്തിരുന്നു. റിലീസിന് മുന്നേ തന്നെ ചിത്രം പ്രീ സെയിലില്‍ 1,085 കോടി രൂപയുടെ നേട്ടമുണ്ടാക്കിയതായാണ് റിപ്പോര്‍ട്ടുകള്‍.

അല്ലു അര്‍ജുനും രശ്മിക മന്ദാനയും കേന്ദ്ര കഥാപാത്രങ്ങളെ അവതരിപ്പിക്കുന്ന ചിത്രത്തില്‍ ഫഹദ് ഫാസില്‍, സുനില്‍, അനസൂയ ഭരദ്വാജ് തുടങ്ങിയവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. മൈത്രി മൂവി മേക്കേഴ്‌സാണ് ചിത്രം നിര്‍മിക്കുന്നത്.